29
1 Gbɛ̃ kũ ò kpã̀kɛ̃i manamana, akũ à gì mai,
ade ni kakatɛ kãnto yↄ̀rↄↄ sari.
2 Tó gbɛ̃ mananↄ dàgula, gbɛ̃nↄ pↄ dìgↄ̃ nnamɛ,
tó gbɛ̃ pãsĩ kú kpatan, òdigↄ̃ n damɛ.
3 Gbɛ̃ kũ à ye ↄ̃ndↄ̃ii dì a de pↄ kɛ nna,
karuanↄ bɛ zɛ́sɛrii dì a ↄgↄ yaka.
4 Kína dì tó a bùsu gbãna kũ yãzɛde musu,
gusarɛgbasiri sↄ̃ àdi a bùsu dɛmɛ.
5 Gbɛ̃ kũ àtɛn lɛ́nna kɛ a gbɛ̃dakenɛ
tɛn bà kpákpa a zĩdanɛ.
6 Gbɛ̃ vãni taarikɛnaa dì a kũ tankutɛ ũmɛ,
gbɛ̃ mana dì ayuwii kɛ kũ pↄnnao.
7 Gbɛ̃ mana dì laakari dↄ takaside yãgↄ̃gↄ̃naaa,
yãvãnikɛri sↄ̃ àdi a yã daro.
8 Lalandikɛrinↄ dì wɛ̃tɛ wã,
ↄ̃ndↄ̃rinↄ dì gbɛ̃nↄ laakari kpátɛńnɛ.
9 Tó ↄ̃ndↄ̃de gɛ̀ɛ yãkpatɛ kɛ kũ yↄ̃nkↄo,
yↄ̃nkↄ pìi dì pↄ fɛ̃ àdi yáa dↄ, a lɛ́ dì nakↄ̃aro.
10 Gbɛ̃dɛrinↄ dì zã taarisaridegumɛ,
òdigↄ̃ gbɛ̃ mananↄ wɛtɛ ò ń dɛ.
11 Yↄ̃nkↄ pↄfɛ̃ dì pisi a wɛ́amɛ,
ↄ̃ndↄ̃de sↄ̃, àdi mɛna fↄ̃mɛ.
12 Tó gbãnade tɛn sã kpá ɛ́kɛyãi,
a ìbanↄ dì gↄ̃ yãvãnikɛrinↄ ũ ń pínkimɛ.
13 Takaside kũ gbãnamↄnnɛriio yã mɛ̀n do dí vĩ,
Dikiri mɛ́ à tò ń wɛ́ tɛn gu e ń pínki.
14 Kína kũ àdi yãkpatɛ kɛ takasidenↄnɛ kũ yãpurao,
a kpata zĩnipɛtɛna nigↄ̃ gbãna gↄrↄ sĩnda pínki.
15 Totona kũ flã̀ao dì tó gbɛ̃ ↄ̃ndↄ̃ kũ,
nɛ́ kũ ò tò a zĩdanɛɛ dì wé'i da a daamɛ.
16 Tó yãvãnikɛrinↄ dàgula, taarikɛnaa dì kↄ̃mɛ,
ama gbɛ̃ mananↄ ni ń kpɛ e.
17 Ǹ n nɛ́ toto, ani n laakari kpátɛnnɛ,
ani tó n pↄ kɛ nna.
18 Gu kũ Luda yã kunlo, òdigↄ̃ ń zĩdakũna dↄ̃ro.
Arubarikaden gbɛ̃ kũ à a doka kũna ũ.
19 Òdi zↄ̀ↄ toto kũ lɛ́oro,
bee tó à mà, ani zĩ kɛaro.
20 N gbɛ̃ kũ àdi wã à yã o è yá?
Yↄ̃nkↄ sã̀na de adela.
21 Zↄ̀ kũ ò a vã̀ zaa a fíti gↄrↄ,
ani láka à gↄ̃ guturu ũmɛ.
22 Pↄfɛ̃rii dì fìti da,
nɛ̀sɛfutade dì durunna kɛ manamana.
23 Ĩadãnaa dì ń busamɛ,
zĩdabusana mɛ́ àdi ń kara.
24 Gbɛ̃ kũ àdi ble kũ kpãnio zã̀ a zĩdagumɛ,
àdi sí kũ Ludao, ama àdi we à yãpura oro.
25 Vĩnakɛna bisãsirinɛ bi tankutɛmɛ,
gbɛ̃ kũ àdi Dikiri náani kɛ mì nigↄ̃ da íla.
26 Gbɛ̃nↄ dì gbãnade arɛ wɛtɛ dasi,
ama yãkpatɛkɛna bi Dikiri yãmɛ.
27 Gbɛ̃ mana ye ɛ́kɛdeiro,
gbɛ̃ vãni dì zã zɛ́sususɛrigumɛ.