1 Bↄ́yãi burinↄ tɛn zuka káa?

À kɛ̀ dera òtɛn lɛ́ pã kpákũsũu?

2 Andunia kínanↄ tɛn zĩ̀ soru kɛ,

kpatablerinↄ tɛn kakara Dikirii

kũ Kína kũ à kào.

3 Òtɛn pi: Ò ń mↄ̀kakↄ̃ananↄ kɛ̃kɛ̃,

ò ń bàa porowá.

4 Dikiri tɛni ń fobo,

à vutɛna musu, àtɛni ń yáa dↄ.

5 Àtɛn pataḿma kũ pↄfɛ̃o,

a pɛ̃tɛ̃ dì ń gba vĩna.

6 À pì a a Kína kà a kpi Zaiↄ̃ musu.

7 Mani yã kũ Dikiri dìtɛmɛnɛ o kũ à pì:

Ma Nɛ́mɛ n ũ, gbãran ma n i.

8 Ǹ wɛ́ kɛma,

mani buri sĩnda pínki kpámma n pↄ́ ũ,

mani n gba andunia kusuru siikↄ̃.

9 Ĩni kí bleḿma kũ mↄ̀ gòoo,

ĩni ń wíwi lákũ òdi oro wíwi nà.

10 Kínanↄ, à lɛ́damma díkĩna ma,

andunia kpatablerinↄ, à ↄ̃ndↄ̃ kũ sà.

11 À do Dikirii kũ vĩnao,

à pↄnna kɛo kũ lukanaao.

12 À lɛ́ pɛ́ a Nɛ́a

de a pↄ sún fɛ̃ái à gaga zɛ́nlo,

zaakũ a pↄ dì fɛ̃ kãntomɛ.

Arubarikaden gbɛ̃ kũ à nài ũ.