1 Dikiri, ǹ ma yãzɛde ma,

ǹ sã kpá ma wikilɛnaai,

ǹ ma wɛ́kɛna sí,

zaakũ matɛn kɛ kũ manafikioro.

2 N kĩnaan mani yã nna len,

n wɛ́ tɛn yã kũ à zɛ́ vĩ e sãnsãn.

3 N ma swɛ̃̀ɛ gwà, n wɛ́ tɛ́mai gwãani,

n ma tàasii kà, ńdi yãke emaro,

zaakũ ma zɛo kũ ma lɛ́ ni ma kari boro.

4 Madì tɛ́ bisãsiri yãkɛnanↄiro,

madì gbɛ̃ pãsĩnↄ turuba sɛ́ro.

5 Ma kure n zɛ́n súsu,

mádi pã n yãnɛro.

6 Matɛn lɛ́ zunyĩ, zaakũ ĩni wema.

Luda, ǹ sã kpá ma aduakɛnaai.

7 Ǹ n gbɛ̃kɛ yãbonsarɛ kɛmɛnɛ,

ǹ gbɛ̃ kũ ò nànyĩnↄ bo ń ibɛrɛnↄ ↄĩ.

8 Ǹ laakari dↄma lán n wɛ́nɛ bà,

ǹ ma sↄtↄ n orun.

9 Ǹ ma sí gbɛ̃ pãsĩ kũ òdi wari dↄmanↄa,

ma ibɛrɛ kũ ò likanamai pìnↄ.

10 Òdi gbɛ̃ke wɛ́ gwaro,

ń lɛ́ dì zĩda sɛna lei yã o.

11 Ò pɛ̀tɛmai ò lìkamai,

ò wɛ́ pìtima de ò le ò ma pãtɛ zĩtɛ.

12 Ò ye ò ma kɛ yákiyaki

lákũ músu nàdɛri dì kɛ nà,

lán músu kũ à natɛna gukpado bà.

13 Dikiri, ǹ futɛ ǹ dańlɛ ǹ ń nɛ,

ǹ ma sí gbɛ̃ pãsĩnↄa kũ n fɛ̃nɛdao.

14 Ǹ ma bo ń ↄĩ kũ n gbãnao.

Ń baka kú andunia díkĩna gũn,

ń aruzɛkɛ dìgↄ̃ dińyĩ, ń nɛ́nↄ dì kã,

òdi pↄ́ kũ à dìńyĩnↄ kátɛ ń nɛ́nↄnɛ.

15 Makũ sↄ̃, mani wɛ́ kɛ pla kũnwo ma nɛ̀sɛmana yãi,

tó ma n e ma vugↄrↄa, abirekũ ni ma kã.