1 Dikirimɛ ma gupura ũ kũ ma surabariio,

dín mani vĩna kɛnɛɛ?

Dikirimɛ ma utɛki ũ,

dí vĩnan mani kɛɛ?

2 Tó gbɛ̃ vãninↄ sìmagu de ò ma kɛ yákiyaki

ke tó ma ibɛrɛnↄ kũ ma zãngurinↄ lɛ̀tɛma,

ò gɛ̃̀ sí ò lɛ́tɛ.

3 Bee tó zĩ̀karinↄ lìkamai,

ma kù ni vĩro,

bee tó gbɛ̃nↄ fùtɛma kũ zĩ̀io,

ma laakari nigↄ̃ kpatɛna.

4 Yã mɛ̀n don matɛn gbɛka Dikiria,

yã pìn matɛn wɛtɛ manamana.

Má ye màgↄ̃ kú Dikiri ↄnn ari ma wɛ̃̀ndi lɛ́n,

de mà le màgↄ̃ a arɛ wɛtɛ a kpɛ́n gwe,

má wɛ́ dↄ a manakɛnaai.

5 Ani ma utɛ a kpɛ́n warikɛgↄrↄa,

ani ma gwa a bizakutan,

ani ma zɛ gbɛ̀ɛ musu aafia.

6 Ma mì ni bo ma ibɛrɛ kũ ò likamainↄ pↄ́la,

má sa o Dikiri ↄnn kũ ayuwiikɛnaao,

má lɛ̀ sí mà a sáabu kpá.

7 Tó ma n sisi Dikiri, ǹ wema,

ǹ ma wɛ̃nda gwa, ń ma yã ma.

8 Ma nɛ̀sɛ tɛn lɛ́ dama mà n arɛ wɛtɛ,

Dikiri, matɛni n arɛ wɛtɛ.

9 Ǹsun n mìkpɛrɛ zu makũ n zↄ̀bleriinɛro,

ǹsun kpɛ dↄmɛnɛ kũ pↄfɛ̃oro.

Ma kpanyĩriimɛ n ũ, ǹsun ma zukũnaro,

Luda ma surabarii, ǹsun ma tónlo.

10 Tó ma de kũ ma dao pã kpàmai,

Dikiri ni ↄ likamai.

11 Dikiri, ǹ ma da n zɛ́a,

ǹ domɛnɛ arɛ zɛ́ súsu gũn ma wɛ́tãmmarinↄ yãi.

12 Ǹsun tó ma ibɛrɛnↄ pↄyeina kɛmɛnɛro,

zaakũ sèeda ɛ́kɛdenↄ tɛn yã dima,

gbɛ̃ pãsĩnↄ tɛn yĩ fɛ̃ma.

13 Má yã díkĩna náanikɛna,

kũ Dikiri ni yã mana kɛmɛnɛ andunia díkĩna gũn.

14 Ǹ wɛ́ dↄ Dikirii,

ǹ zɛ gbãna, ń laakari kpátɛ,

ǹ wɛ́ dↄ Dikirii.