59
Ǹ ma sí ma ibɛrɛnↄa
Lɛ̀ kũ Dauda dà gↄrↄ kũ Solu gbɛ̃nↄ zĩ̀ ò a dãdã a bɛa ò a dɛ.
1 Ma Luda, ǹ ma sí ma ibɛrɛnↄa,
ǹ ma bo gbɛ̃ kũ ò fùtɛmainↄ ↄĩ.
2 Ǹ ma sí yãvãnikɛrinↄa,
ǹ ma bo gbɛ̃dɛrinↄ ↄĩ.
3 Ǹ gwa, òtɛni ma kpákpa,
gbɛ̃ pãsĩnↄ tɛn fìti kɛ kũmao.
Dikiri, mádi taari ke durunna kɛńnɛro,
4 mádi zãńnɛ yãkearo,
akũ ò kú kũ soruo ò nakarama.
Ǹ ma wɛ̃nda gwa ǹ futɛ ǹ mↄ́ ǹ kpámai!
5 Mↄkↄ̃n Dikiri Luda Zĩ̀karide, Isarailanↄ Luda,
ǹ futɛ ǹ wɛ́ tã buri kũ̀nↄa ń pínki.
Ǹsun bonkpɛde vãni kũ̀nↄ wɛ̃nda gwaro.
6 Òdi ɛra ò su ↄkↄsi dↄ,
òdi likara zↄ̃ wɛ̃tɛn,
òdi hũ̀u kɛma lán gbɛ̃nↄ bà.
7 Ǹ gwa, ń lɛ́'i tɛn tↄ,
fɛ̃nɛ kpá ń lɛ́n,
òdi pi gbɛ̃ke tɛni ń maro.
8 Mↄkↄ̃n sↄ̃ Dikiri, ndì ń yáa dↄ,
ndì buri pìnↄ lalandi kɛ ń pínki.
9 Luda ma gbãna, ma wɛ́ dↄnyĩ,
mↄkↄ̃mmɛ ma aafialeki ũ.
10 Luda ni domɛnɛ arɛ a gbɛ̃kɛ gũn,
ani tó mà yↄ̃̀gↄ̃ kɛ ma zãngurinↄa.
11 Dikiri ó sɛ̃gbako, ǹsun ń dɛdɛro,
de ń yã sún sã ma gbɛ̃nↄguro yãi.
Ǹ tó ò likara zↄ̃ ǹ ń kↄ́tɛ kũ n gbãnao.
12 Yã kũ àdi bo ń lɛ́n bi durunna yãmɛ.
Ǹ tó ń karambaanikɛna ń kũ,
zaakũ òdi ɛ́kɛ to òdi gbɛ̃ ká.
13 Ǹ ń kakatɛ kũ pↄfɛ̃o,
ǹ ń dúgu zↄ̃, òsungↄ̃ kun doro,
gbasa ògↄ̃ dↄ̃ ari andunia lɛ́a
kũ Luda tɛn kí ble Yakubu burinↄa.
14 Òdi ɛra ò su ↄkↄsi dↄ,
òdi likara zↄ̃ wɛ̃tɛ gũn,
òdi hũ̀u kɛ lán gbɛ̃nↄ bà.
15 Òdi likara ògↄ̃ pↄ́ble wɛtɛ,
tó odi kãro, òdi wiki lɛ́.
16 Makũ sↄ̃, mani lɛ̀ sí n gbãna yã musu,
mà ayuwii kɛ kↄnkↄ n gbɛ̃kɛ yãi,
zaakũ mↄkↄ̃mmɛ ma aafialeki ũ,
mↄkↄ̃mmɛ ma utɛki ũ warikɛgↄrↄa.
17 Luda ma gbãna, mani n táaki lɛ́,
zaakũ mↄkↄ̃mmɛ ma aafialeki ũ,
Luda kũ àdi gbɛ̃kɛ kɛmɛnɛ.