74
Wikilɛna Ludai a kpɛ́ kũ ò wì yãi
Asafa lɛ̀ɛ.
1 Luda, bↄ́yãi n giwái ari gↄrↄ sĩnda pínkii?
À kɛ̀ dera n pɛ̃tɛ̃ tɛn futɛ n kpàsa sãnↄii?
2 Ǹ tó gbɛ̃ kũ n ń sí zaa zĩnↄ yã dↄngu,
buri kũ n bò ò gↄ̃̀ n pↄ́ ũnↄ
kũ Zaiↄ̃ kpi kũ n kɛ̀ n kúki ũo.
3 N ibɛrɛnↄ n kúki wì ò dàtɛ mámmam,
ǹ dↄdↄi ǹ gwa, à gbòro pínki.
4 N zãngurinↄ zuka kàkara gu kũ odì danlɛn,
ò ń zĩda tutanↄ pɛ̀tɛ gwe sèeda ũ.
5 O è, ń kpása dↄ musu,
òtɛn kɛ lákũ òdigↄ̃ dàko gbɛ̃ nà.
6 Lí ana mana kũ ò nàna n kpɛ́ kpataaa,
ò gbɛ̃̀ ò gbòro kũ kpásao kũ adao.
7 Ò tɛ́ sↄ̃̀ n kúkia à kↄ̀tɛ,
ò tò kpɛ́ kũ n tↄ́ kúaa pìi gbã̀a lɛ̀.
8 Ò ò ń nɛ̀sɛn: Ò ↄ tↄ̃ḿma mámmam.
Ò tɛ́ sↄ̃̀ ó bùsu aduakɛkpɛnↄa.
9 N kpɛ́ sèedanↄ kun doro,
annabi ke kun doro.
Ónigↄ̃ kun lɛ ari bↄrɛmɛɛ?
Ó gbɛ̃ke dↄ̃ro.
10 Luda, ĩni tó n ibɛrɛnↄ gↄ̃ n yáa dↄ ari bↄrɛmɛɛ?
N zãngurinↄ nigↄ̃ n gya bo lakanaa sarin yá?
11 Bↄ́yãin n ↄ kakũnnaa?
Ǹ ↄ go n kùaaa ǹ ń dɛdɛ.
12 Ludamɛ ma kína ũ zaa káaku,
àkũ mɛ́ àdi gbɛ̃ sura ba andunia gũn.
13 Mↄkↄ̃n mɛ́ n ísira zↄ̃̀kↄ̃rɛ kũ n gbãnao,
n kwã kàsaraa mìnↄ wìwi í gũn.
14 N Misilanↄ kàkatɛ gwe,
n ń gɛ̀nↄ kpà gbáranna nↄ̀bↄnↄa pↄ́ble ũ.
15 N swanↄ bò n zɛ́ wɛ̃̀ ísɛ̃bokinↄnɛ,
n swa kũ a í babana vĩro zↄ̃̀kↄ̃rɛ.
16 Fãnantɛ̃ kũ gwãanio de n pↄ́ ũ,
n mↄvura kũ ifãntɛ̃o kúki kɛ̀ńnɛ.
17 Mↄkↄ̃n mɛ́ n andunia lɛ́zɛkinↄ dà pínki,
n sakare kũ bunsirɛɛo gↄrↄ dìtɛ.
18 N yá kũ n ibɛrɛnↄ dↄ̀ yã dↄngu Dikiri,
yↄ̃nkↄnↄ n tↄ́ gya bò.
19 Ǹsun n potɛ̃nɛ kpá nↄ̀bↄ pãsĩnↄaro,
n gbɛ̃ wɛ̃ndadenↄ yã sún sãnguro.
20 Ǹ laakari dↄ n bàka kunna kũoooa,
zaakũ ó bùsu gusarɛnↄ pãsĩ kũ̀ pínki.
21 Ǹsun tó ó gↄ̃nawɛ̃ndadenↄ boru kpɛ kũ wé'ioro,
ǹ tó wɛ̃ndadenↄ kũ takasidenↄ n táaki lɛ́.
22 Luda, ǹ futɛ ǹ gí kũ n zĩdao,
ǹ n yá kũ yↄ̃nkↄnↄ tɛn dↄ zɛnaa sari ma dé!
23 Ǹsun zuka kũ n ibɛrɛnↄ tɛn kányĩ kpá sãkotoro,
n zãngurinↄ kĩni dìgↄ̃ dↄ lakanaa sari.