1 Ò Luda dↄ̃ Yudanↄ bùsummɛ,

a tↄ́ zↄ̃kↄ̃ Isarailanↄ tɛ́.

2 A bizakuta kú Salɛmu,

a kúki kú Zaiↄ̃.

3 Zaa gwen à kà wãnanↄ ɛ̀'ɛn

kũ sɛ̃gbakonↄ kũ fɛ̃nɛdanↄ kũ zĩ̀kabↄnↄo.

4 Ndì gu pu ndìgↄ̃ tɛ́ kɛ,

n zↄ̃kↄ̃kɛ de kpi kũ ò kun gↄrↄ sĩnda pínkinↄla.

5 N kùgbãnadenↄ gↄ̃kɛbↄnↄ sìḿma,

ò wutɛna kũ ga'io,

gↄ̃ gbãna pìnↄ doke dí fↄ̃ à a ↄ sɛ̀ro.

6 Yakubu Luda, n kpãkɛ̃ńyĩ,

akũ sↄ̃denↄ kũ ń sↄ̃nↄ gↄ̃̀ katɛna gɛ̀nↄ ũ.

7 Mↄkↄ̃n mɛ́ ń naasi vĩ ndo,

tó n pↄ́ bò n yĩn,

dí mɛ́ ani fↄ̃ à zɛ n arɛɛ?

8 Zaa musu n yãkpatɛ kɛ̀,

akũ vĩna andunia kũ̀, à yĩ̀tɛ kítikiti,

9 zĩ kũ Luda, n futɛ ǹ yã gↄ̃gↄ̃ andunianɛ

de ǹ gbãnasaridenↄ sura ba.

10 N pↄfɛ̃na gbɛ̃nↄi dì n tↄ́ bo,

n pↄfɛ̃ kpara dìgↄ̃ dↄ n pi.

11 À lɛ́ kɛ Dikiri á Ludaa à a fĩna bo.

Ákↄ̃nↄ kũ á likanawáinↄ, à mↄ́

à Luda kũ à de ògↄ̃ a vĩna vĩ gba pↄ́.

12 Àdi kpatablerinↄ kã kpátɛ,

àdi tó vĩna andunia kínanↄ kũ.