1 N arubarikaa dà n bùsun, Dikiri,

n su kũ Yakubu burinↄ ń gwena zĩn.

2 N n gbɛ̃nↄ taarinↄ gòḿma,

n ń durunnanↄ kɛ̃̀ḿma pínki.

3 N n pↄ kpã̀kpãa tò pínki,

n n pↄfɛ̃ pãsĩ tò.

4 Ǹ su kũoo ó gwena zĩn, Luda ó Surabari,

ǹ pɛ̃tɛ̃ kũ n kɛ̀ kũoo lago.

5 N pↄ nigↄ̃ fɛ̃nawái gↄrↄ sĩnda pínkin yá?

Ĩnigↄ̃ n pↄfɛ̃gↄrↄ gága wɛ̃̀ kũ wɛ̃̀ɛon yá?

6 Ĩni ɛra ǹ n gbɛ̃nↄ kunna kɛkɛ ǹ kɛńnɛ dↄ,

de ń pↄ le à kɛmma nnaroo?

7 Dikiri, ǹ n gbɛ̃kɛ mↄwɛrɛ,

ǹ ó sura ba kũ n gbãnao.

8 Ma sã dↄ Dikiri Luda yã'onaaa,

zaakũ àdi aafia lɛ́ sɛ́ a yãmarinↄnɛ,

tó odi ɛra ò sù ń yↄ̃̀nkↄyãnↄaro.

9 A vĩnakɛrinↄ surabanaa gↄrↄ zã̀ro,

de a gakuri le àgↄ̃ kú ó bùsun yãi.

10 Gbɛ̃kɛ kũ náanio dì dakarɛ,

yãzɛde kũ aafiaao dì ↄ kpákↄ̃a.

11 Náani dì ↄ poro musu,

yãzɛde dì ↄ nↄnↄ zĩtɛ.

12 Dikiri ni yã mana kɛwɛrɛ,

ó zĩtɛ ni pↄ́ble kɛ.

13 Yãzɛde dìgↄ̃ tɛ́ a arɛ,

àdi zɛ́ kɛkɛnɛ.