Luda yã takada kũ Bisã yão ZIA YÃ 22

1 Akũ malaikaa pì swa'i wɛ̃̀ndide kũ àtɛn bo Luda kũ Sãnɛ Bↄ̀rↄↄo gbà kĩnaa mↄ̀mɛnɛ, àtɛn tɛ́ kɛ lán gbɛ̀digi bà. 2 Àtɛn bàa lɛ́ wɛ́ra zɛ́da guragura. Lí wɛ̃̀ndide kú a bara dire kũ a bara lao, àdi nɛ́ i wɛ̃̀ do gɛ̃̀n kuri awɛɛpla, mↄ kũ mↄo gɛ̃̀n dodo. Lí pì lánↄ bi burinↄ aafialekiamɛ. 3 Pↄ kũ Luda lɛ́ kɛ̀nɛ ke nigↄ̃ kun doro. Luda kũ Sãnɛ Bↄ̀rↄↄo gbà nigↄ̃ kú wɛ́ra pìi gũn, a zↄ̀blerinↄ sↄ̃ oni doi. 4 Oni a e wɛ́dewɛ, akũsↄ̃ a tↄ́ nigↄ̃ kú ń mì'arɛa. 5 Gwã nigↄ̃ kun doro, gbɛ̃ke bàka nigↄ̃ kú kũ fitila ke ifãntɛ̃ gupuraoro, kũ Dikiri Luda ni gu puńnɛ yãi. Onigↄ̃ kí ble ari gↄrↄ sĩnda pínki. 6 Akũ à òmɛnɛ: Yã birenↄ náani vĩ, akũsↄ̃ yãpuramɛ. Dikiri Luda kũ àdi do annabinↄnɛ arɛ mɛ́ à a malaikaa zĩ̀, de a zↄ̀blerinↄ yã kũ ani su tera dↄ̃.

Yesu ni su tera

7 Ǹ gwa, mani su tera. Arubarikaden gbɛ̃ kũ à zia yã takada díkĩna yã kũna ũ.

8 Makũ Yuhana makũmɛ ma yã birenↄ mà, ma è. Kũ ma mà, akũsↄ̃ ma è, ma kutɛ malaika kũ à yã pìnↄ mↄ̀mɛnɛ gbá sarɛ mà donyĩ kɛnɛ. 9 Akũ à òmɛnɛ: Ǹ abire tó. Ǹ donyĩ kɛ Ludanɛ. N zↄ̀bleri daken ma ũ kũ n annabi gbɛ̃dakenↄ kũ gbɛ̃ kũ ò takada díkĩna yã kũnanↄ. 10 Akũ à òmɛnɛ: Ǹsun pↄ́ kútɛ zia yã kũ à kú takada díkĩna gũnwaro, zaakũ a gↄrↄ kà kãni. 11 Gbɛ̃ vãni wɛ́ tã àgↄ̃ a vãni kɛ. Gbãsĩde wɛ́ tã àgↄ̃ gbãsĩ. Gbɛ̃ mana wɛ́ tã àgↄ̃ a mana kɛ. Gbɛ̃ kũ à kú adona wɛ́ tã àgↄ̃ kú adona.

12 Ǹ gwa, mani su tera, manigↄ̃ láada kũna, de mà fĩna bo baadinɛ a yãkɛnaaa. 13 Alafa kũ Omɛgaon ma ũ, Arɛde kũ Kpɛdeo, Naana kũ Lakanaao. 14 Arubarikadenↄn gbɛ̃ kũ ò ń utagyaba pìpinↄ ũ. Onigↄ̃ zɛ́ vĩ ò gɛ̃ wɛ́ra pì gãnunↄ gũn, ò lí wɛ̃̀ndide nɛ́ ble. 15 Ama kifirinↄ nigↄ̃ kũ gwero, ɛzɛdenↄ kũ pãpãkɛrinↄ kũ gbɛ̃dɛrinↄ kũ tãnagbagbarinↄ kũ gbɛ̃ kũ ò ye manafiki yãkɛnaainↄ.

16 Makũ Yesu ma a malaikaa zĩ̀ àgↄ̃ deárɛ yã pìnↄ sèedade ũ sↄsinɛ. Makũmɛ Dauda buri kpata kũ à bↄ̀tↄↄ pà Kína ũ, gudↄna susunɛ i nna ũ. 17 Luda Nini kũ Sãnɛ Bↄ̀rↄ nↄ dufuo dì pi, ǹ mↄ́. Gbɛ̃ kũ à yã pìi mà sↄ̃, à pi, ǹ mↄ́. Gbɛ̃ kũ ími tɛn dɛ, à mↄ́. Gbɛ̃ kũ à ye í wɛ̃̀ndidei, à sí gba ũ.

18 Matɛn pi gbɛ̃ kũ ò annabikɛtakada díkĩna yã mànↄnɛ ń pínki, tó gbɛ̃ yãke kàra a gũn, Luda ni kisira kũ ń yã kú takada díkĩna gũnnↄ kara adenɛ. 19 Tó gbɛ̃ yãke bò takada díkĩna gũn sↄ̃, Luda ni ade baka bo a wɛ́ran kũ lí wɛ̃̀ndide kũ a yã kú takada díkĩna gũnwo.

20 Gbɛ̃ kũ à de yã pìnↄ sèedade ũ pì: Yãpuramɛ, mani su tera.

Aami! Dikiri Yesu, ǹ mↄ́!

21 Dikiri Yesu gↄ̃ gbɛ̃kɛ vĩ kũ a gbɛ̃nↄ ń pínki. Aami!