14
Kↄ̃ taari'enaa
1 À gbɛ̃ kũ à busɛ ludanaanikɛnaa gũn sí yãkete sari. 2 Gbɛ̃kenↄ ludanaanikɛnaa dì pↄ́ke tɛ̃̀ boro, akũ gbɛ̃ kũ ń ludanaanikɛna busananↄ dì nↄ̀bↄ sóro.*Kↄl 2:16 3 Gbɛ̃ kũ àdi pↄ́ sĩnda pínki ble sún gbɛ̃ kũ àdi pↄ́ sĩnda pínki blero gya boro, akũsↄ̃ gbɛ̃ kũ àdi pↄ́ sĩnda pínki blero sún gbɛ̃ kũ àdi pↄ́ sĩnda pínki ble taari ero, zaakũ Luda a sìmɛ. 4 Dímɛ n ũ kũ ntɛni dakenↄ zĩkɛri taari ee? Tó à fↄ̃̀ ke à fùan yá, a Dikiri yãn gwe. Ani fↄ̃, zaakũ Dikiri gbãna ni tó à fↄ̃. 5 Gbɛ̃kenↄ sì kũ gↄrↄ kenↄ nna de a kenↄla, gbɛ̃ pãndenↄ sì kũ gↄrↄ sĩnda pínki lɛɛlɛmɛ. Baadi laasun gↄ̃ dokↄ̃nↄ kũ yã kũ à zɛ̀ooo. 6 Gbɛ̃ kũ àdi gↄrↄ bo dì bo Dikiri yãimɛ. Gbɛ̃ kũ àdi pↄ́ sĩnda pínki ble dì ble kũ Dikiri gbãnaomɛ, à Luda sáabu kpá. Gbɛ̃ kũ àdi pↄ́ tɛ̃ dì tɛ̃ Dikiri yãimɛ, à Luda sáabu kpá. 7 Gbɛ̃ke dìgↄ̃ kun a zĩda yãiro, gbɛ̃ke dì ga a zĩda yãiro. 8 Tó ó kun, ó kun Dikiri pↄ́ ũmɛ, tó o ga, o ga Dikiri pↄ́ ũmɛ. Ó kunn yá, o gan yá, ó de Dikiri pↄ́ ũmɛ. 9 Zaakũ Kirisi gà à vù de àgↄ̃ de gyãwãndenↄ kũ gbɛ̃ bɛ̃nɛnↄ Dikiri ũmɛ. 10 Kũ ntɛni n gbɛ̃ndo taari e sↄ̃ bi? Mↄkↄ̃n sↄ̃, à kɛ̀ dera ntɛni n gbɛ̃ndo gya bo sↄ̃ↄ? Luda nigↄ̃ vutɛna a tìntinnwa, ó pínki óni bo ò zɛ a arɛ,†2Kↄ 5:10 11 lákũ à kɛ̃na Luda yãn nà Dikiri pì:
Kũ ma kunnaao, gbɛ̃ sĩnda pínki ni kútɛmɛnɛ,
gbɛ̃ sĩnda pínki ni ma ludakɛna dↄ̃.
12 Lɛn baadi ni a zĩda yã baba Ludanɛ lɛ.
Àsun yã kũ ani tó a gbɛ̃ndo fu kɛro
13 Abire yãi òsun kↄ̃ taari e doro. Kũ ani kↄ̃ taari e, à zɛo kũ áni yã kũ ani tó à á gbɛ̃ndo fu kɛro. 14 Kunna Dikiri Yesu gũn má dↄ̃ sãnsãn kũ pↄ́ble ke dìgↄ̃ gbãsĩ a zĩdaro. Ama tó gbɛ̃ dìtɛ kũ pↄ́ gbãsĩ, akũ àdigↄ̃ gbãsĩnɛ. 15 Tó n n gbɛ̃ndo nɛ̀sɛɛ yàkanɛ pↄ́ kũ n blè yãi, ń yenyĩ vĩnɛro. Pↄ́ble kũ n blè yãi ǹsun gbɛ̃ kũ Kirisi gà a yãi kakatɛro. 16 Àsun tó ò pↄ́ kũ a è à mana gya boárɛro, 17 zaakũ kpata kũ à bò Luda kĩnaa bi pↄ́blena kũ pↄ́minaao yãnlo. Yãkɛna a zɛ́a kũ aafiaao kũ pↄnna kũ Luda Nini dì ińnɛo yãmɛ. 18 Gbɛ̃ kũ àtɛn do Kirisii lán abirekũ bà yã dì ká Ludagu, akũsↄ̃ bisãsiri dì a sáabu kpá. 19 Abire yãi ògↄ̃ kↄ̃ aafia wɛtɛ ògↄ̃ gbãna karakↄ̃nɛ. 20 Ǹsun Luda zĩ yaka pↄ́ble yãiro. Pↄ́ble sĩnda pínki manamɛ, ama pↄ́ kũ ani tó n gbɛ̃ndo fu blena manaro. 21 Nↄ̀bↄsonaan yá, wɛ̃minaan yá, yã kũ ani tó n gbɛ̃ndo fu pínki, à mana ǹ tɛ̃mɛ. 22 Pↄ́ kũ ń náani kɛ̀ɛ, ǹ tó à gↄ̃nnɛ kũ Ludao. Arubarikaden gbɛ̃ kũ adi a zĩda taari e kũ pↄ́ kũ à zɛ̀oro ũ. 23 Tó gbɛ̃ tɛn sika kɛ pↄ́ble kũ àtɛn blea sↄ̃, à a zĩda dà yãmmɛ, kũ adi kↄ̃ sɛ́ kũ a ludanaanikɛnaaoro yãi. Yã kũ adi kↄ̃ sɛ́ kũ gbɛ̃ ludanaanikɛnaaoro bi durunnamɛ.