Luda yã takada kũ Bisã yão RUTU 4

Rutu zãkɛna kũ Bↄazao

1 Bↄaza gɛ̀ɛ à vùtɛ wɛ̃tɛ bĩnilɛa, akũ à è danɛ kãni bòri kũ à a yã òo pì tɛn su. Akũ à pì: Ma gbɛ̃, ǹ mↄ́ ǹ vutɛ. 2 Akũ à wɛ̃tɛ gbɛ̃ zↄ̃kↄ̃nↄ sìsi gbɛ̃nↄn kuri à pì ò vutɛ. 3 Akũ à pì danɛ kãni kũ ani a sura ba pìinɛ: Naomi kũ à sù kũ Mↄabunↄ bùsuuo tɛni ó vĩ̀ni Ɛlimɛlɛki bura kpado yía. 4 Akũ ma è à mana mà a yã onnɛ, de ǹ lú ó gbɛ̃ zↄ̃kↄ̃ kũ ò vutɛna lanↄ wára. Tó ń ye ǹ lúmɛ, ǹ lú. Tó ń ye ǹ lú sↄ̃ro, ǹ omɛnɛ mà ma, zaakũ mↄkↄ̃n mɛ́ ń a luna zɛ́ vĩ. Tó n bakanlo, séde makũ mà lú. Akũ gↄ̃gbɛ̃ pìi pì: Mani lú. 5 Akũ Bↄaza pì: Tó n bura pìi lù Naomi kũ Mↄabu nↄgbɛ̃ Rutuoa, ĩni gbɛ̃ kũ à gà gyaanↄ le dↄ, de a tↄ́ le à gↄ̃ a túbia. 6 Akũ danɛ kãni bòrii pìi pì: Tó lɛn à de lɛ, mani lúro, de màsun ma zĩda túbi yakaro yãi. Ǹ n pↄ́ lú, zaakũ mani fↄ̃ mà lúro. 7 Isarailanↄ bùsun yã tó gbɛ̃ tɛn bura lú ke tó àtɛni a lilin kɛ, tó àtɛn yã mì láka, àdi a kyate gbá do bo à kpá gbɛ̃amɛ yã pì lakana sèeda ũ Isarailanↄnɛ. 8 Kũ danɛ kãni bòrii pìi pì Bↄazanɛ à lú, akũ à a kyate bò à kpà Bↄazaa. 9 Akũ Bↄaza pì gbɛ̃ zↄ̃kↄ̃ↄ pìnↄnɛ kũ gbɛ̃ kparanↄ ń pínki: Ákↄ̃nↄmɛ sèedadenↄ ũ gbãra, kũ ma Ɛlimɛlɛki kũ Malonuo kũ Kiliↄ̃o pↄ́nↄ lù Naomia pínki. 10 Akũ ma Malonu gyaanↄ Rutu, Mↄabu nↄgbɛ̃ lè nↄ ũ dↄ, de gbɛ̃ kũ à gàa pì tↄ́ le àgↄ̃ kú a túbia, de a tↄ́ sún ga a gbɛ̃nↄ tɛ́ ke a wɛ̃tɛ díkĩna gũnlo. Ákↄ̃nↄmɛ yã pìi sèedadenↄ ũ gbãra.

11 Akũ gbɛ̃ zↄ̃kↄ̃ↄ pìnↄ kũ gbɛ̃ kũ ò kú gãnu gũnnↄ pì ń pínki: Ókↄ̃nↄmɛ sèedadenↄ ũ. Dikiri tó nↄgbɛ̃ kũ àtɛn gɛ̃ n ↄnn pì gↄ̃ lán Rahila kũ Leao bà, kũ ò Isarailanↄ buri kɛ̀. Ani tó ǹ gbãna kũ Ɛflata bùsun ǹ tↄ́ bo Bɛtilihamu. 12 Dikiri tó buri kũ ani kpámma kũ nↄgbɛ̃ pìionↄ gↄ̃ lán Pɛrɛzi kũ Tama ì Yudanɛɛ burinↄ bà.

Dauda buri bozirɛ

13 Akũ Bↄaza Rutu sɛ̀ nↄ ũ. À wùtɛ kãao, akũ Dikiri tò à nↄ̀ↄ sì, akũ à nɛ́ ì gↄ̃gbɛ̃ ũ. 14 Akũ nↄgbɛ̃nↄ pì Naominɛ: O Dikiri sáabu kɛ̀, adi n tó buri sari gbãraro. Luda tó nɛ́ pì tↄ́ bo Isarailanↄ tɛ́. 15 Ani n laakari kpátɛnnɛ, ani n gwa n zĩkũnaa gũn, zaakũ n nɛ́ gyaanↄ kũ à yenyĩ mɛ́ à a ìnnɛ, akũsↄ̃ à manannɛ de nɛ́gↄ̃gbɛ̃ gbɛ̃nↄn supplanↄla. 16 Akũ Naomi nɛ́ pìi sɛ̀ à kpà a kùla à gↄ̃̀ a gwàri ũ. 17 Akũ nↄgbɛ̃ kũ ò kú gwenↄ pì: Ò nɛ́gↄ̃gbɛ̃ ì Naominɛ. Akũ ò tↄ́ kpànɛ Ɔbɛdi. Àkũmɛ Yɛsɛ de, Dauda dizi ũ.

18 Pɛrɛzi burinↄ tↄ́n dí:

Pɛrɛzi mɛ́ à Ɛzɛrↄnu ì,

19 Ɛzɛrↄnu Ramu ì, Ramu Aminadabu ì,

20 Aminadabu Nasↄ̃ ì, Nasↄ̃ Salamↄ ì,

21 Salamↄ Bↄaza ì, Bↄaza Ɔbɛdi ì,

22 Ɔbɛdi Yɛsɛ ì, akũ Yɛsɛ Dauda ì.

RUTU
<
4
>