1 wɔ̃ku girirɑ nɑ kpĩ nɛn kpin yeru wɔllɔ.

Nɑ kɑsu wi nɛn gɔ̃ru gɑ kĩ.

Adɑmɑ nɑ ǹ nùn wɑ.

2 Ǹ n mɛn nɑ, kon sewɑ n bɔsu wuu sɔɔ,

gen swɛɛɔ kɑ gen yɑburɔ nɑ n kɑsu wi nɛn gɔ̃ru gɑ kĩ.

Nɑ nùn kɑsu kɑsu, ɑdɑmɑ nɑ ǹ nùn wɑ.

3 Ye wuu gen kɔ̃sobɑ bɔsu bɑ wuu mɛɛrimɔ, bɑ mɑn wɑ,

mɑ nɑ bu bikiɑ nɑ nɛɛ, i nɛn kĩnɑsi wɑ?

4 Ye nɑ bu deri kese, yerɑ nɑ nɛn kĩnɑsi wi wɑ.

Nɑ nùn sɛ̃re, nɑ ǹ nùn yɔ̃su

sere nɑ kɑ nùn dɑ nɛn mɛro wi u mɑn mɑrɑn dirɔ.

5 Bɛɛ Yerusɑlɛmun wɔndiɑbɑ,

nɑ bɛɛ sɔ̃ɔmɔ kɑ yɛɛ kpiki kɑ nɛnnun yĩsinu,

i ku nɛn kĩnɑsi yɑmiɑ sɑɑ ye u ǹ kĩ u se.

6 wɑrɑ u sɑrɑm wee gbɑburun di mɛni nge wii tĩɑ.

U turɑre ye bɑ mɔ̀ miru kɑ turɑre dɛkɑgiɑ bwese bwesekɑn nuburu mɔ.

7 Sɑlomɔɔn kpin yerɑ bɑ sɔɔwɑ bɑ kɑ wee,

Isirelibɑn tɑbu durɔ dɑmgibu wɑtɑ bɑ nùn swĩi bɑ wɑ̃ɑ gɔn gɔnkɑ.

8 Be kpuro bɑ kɑ tɑkobi sɑnnɔ yɛ̃.

Bɑ sɑ̃ɑwɑ tɑbu durɔbu.

Ben bɑɑwure u win tɑkobi bɛki win yɛ̃sɑɔ

u kɑ sɔɔru sɑ̃ɑ bɑɑ yibɛrɛbɑ bɑ̀ n kurɑmɑ wɔ̃kuru.

9 Sinɑ boko Sɑlomɔɔ u derɑ bɑ nùn ɑmɑkɛɛn kitɑru kuɑ kɑ dɑ̃ɑ ye bɑ kɑ nɑ Libɑnin di.

10 Mɑ bɑ ten suɑtiɑn dɛki kuɑ kɑ sii geesu.

Bɑ mɑɑ ten gbɑllitiɑ kuɑ kɑ wurɑ.

Bɑ ten sin yerun leferi beku wunɔmgiru wukiri

te Yerusɑlɛmun wɔndiɑbɑ bɑ burɑru kuɑ kĩrun sɔ̃.

11 I yɑrimɑ bɛɛ Siɔnin wɔndiɑbɑ, i sinɑ boko Sɑlomɔɔ wɑ.

U win furɔ doke ge win mɛro nùn dokeɑ sɑɑ ye u kurɔ kpɑɑru kuɑ.

Dɔmɑ te, u wɑ̃ɑ nuku dobu sɔɔ.