1 À n dɑɑ sɑ̃ɑ nɛn sesu mɛro turosi, kon kɑ nun yinnɑ tɔɔwɔ,

kpɑ n nun bɔkɑsi, goo kun mɑɑ mɑn gɛmmɔ.

2 Kon kɑ nun dɑ nɛn mɛron yɛnuɔ

kpɑ ɑ mɑn bwisi kɛ̃.

Kon nun tɑm nubu durorugim wɛ̃

mɛ nɑ kuɑ kɑ dɑ̃ɑ bii ni bɑ mɔ̀ gerenɑdi.

3 Nɑ kĩ nɑ n nɛn wiru sɔndi win nɔm dwɑrɔ,

kpɑ win nɔm geu gu mɑn bɔkɑsi.

4 Bɛɛ Yerusɑlɛmun wɔndiɑbɑ, nɑ bɛɛ sɔ̃ɔmɔ,

i ku nɛn kĩnɑsi yɑmiɑ sɑɑ ye u ǹ kĩ u se.

5 wɑrɑ u wee gbɑburun di u win kĩnɑsi gbɑlli.

nɑ nun yɑmiɑ dɑ̃ɑ sɑɑrɔ wunɛn yɛnun bɔkuɔ,

mi wunɛn mɛro u wunɛn gurɑ suɑ u nun mɑrɑ.

6 A de nɛ turon gɑri yi n wɑ̃ɑ wunɛn gɔ̃ruɔ.

A de ɑ n nɛ turo bɔkɑsi.

Domi kĩru tɑ dɑm mɔwɑ nge gɔɔ.

Nisinu nu mɑɑ sɑ̃ɑwɑ gɑ̃ɑ gɔbunu nge gɔribun wɑ̃ɑ yeru.

Nin dɑm mu sɑ̃ɑwɑ nge dɔ̃ɔ yɑri.

Yinni Gusunɔn min diyɑ yi wee.

7 Nim wɔ̃kun nim kɑ mɛn kpɑ̃ɑru mu ǹ kpɛ̃ mu kĩrun dɔ̃ɔ go.

Mɛyɑ mɑɑ dɑɑnun nim yiburu tɑ ǹ kpɛ̃ tu kĩi te wukiri.

Tɔnu wi u win dukiɑ kpuro wɛ̃ bu kɑ nùn kĩɑn sɔ̃,

u ǹ kĩi te wɑsi.

Yen kɔkɔrɔ, bɑ koo nùn gɛmwɑ.

8 sɑ sesu piibu mɔ wi u kun ginɑ bwɑ̃ɑ kpiɑ.

Amɔnɑ sɑ ko nùn kuɑ sɑnɑm mɛ bɑ nùn kĩɑn nɑ.

9 Ù n sɑ̃ɑ nge gbɑ̃rɑru,

sɑ ko tu tɑ̃sisiɑwɑ kɑ sii geesu.

Ù n mɑɑ sɑ̃ɑ nge kɔnnɔ,

sɑ ko ge kɔrewɑ kɑ dɑ̃ɑ ye bɑ mɔ̀ sɛdurun gɑmbo.

10 nɑ sɑ̃ɑwɑ nge gbɑ̃rɑru,

mɑ nɛn bwɑ̃ɑ yɑ sɑ̃ɑ nge wuu kɔ̃sobun wɑ̃ɑ yeru.

Nɛn kĩnɑsi u yɛ̃ mɑ nɑ bɔri yɛndu mɔ win mi.

11 Sɑlomɔɔ u resɛm tɔ̃kɑn gbɑɑru mɔ Bɑɑli Hɑmɔɔwɔ.

Mɑ u gbɑɑ te kɔ̃sobu nɔmu sɔndiɑ.

Ben bɑɑwure u rɑ kɑ sii geesun gobi nɔrɔbu (1.000) nɛwɑ

bu sere gbɑɑ ten mɑrum sɔri.

12 Sɑlomɔɔ u win sii geesun gobi nɔrɔbu (1.000) suo u n mɔ,

kpɑ u win gbɑɑ kɔ̃sobu yen goobu (200) wɛ̃.

Nɛnɑ nɑ nɛn tiin resɛm gbɑɑru mɔ,

mɑ nɑ tu kɔ̃su.

13 A de n wunɛn nɔɔ nɔ nɛn kĩnɑsi,

wunɛ wi ɑ rɑ n wɑ̃ɑ dɑ̃ɑ gbɑɑru sɔɔ.

Kpɑɑsibɑ kĩ bu gu nɔ.

14 ɑ wɑsi suo nɛn kĩnɑsi,

kpɑ ɑ n sɑ̃ɑ nge yɑɑ kpiku ǹ kun mɛ nge gini kpɛmɑ

ye yɑ wɑ̃ɑ guuru wɔllɔ mi yɑkɑ nubu durorugisu wɑ̃ɑ.