Luda yã takada kũ Bisã yão Sɑkɑri 11

Bɑ dɑmgibu kɔsukɑ

1 Bɛɛ Libɑnigibu, i bɛɛn kɔnnɔsu kɛniɔ

kpɑ dɔ̃ɔ u bɛɛn dɑ̃ɑ ye bɑ mɔ̀ sɛduru di.

2 Bɛɛ dɑ̃ɑ ye bɑ mɔ̀ sipɛrɛ, i weeweenu koowo.

Domi sɛdurubɑ bɑ wɔrukɑ.

Be bɑ tii sue mi, bɑ kpeerɑ.

Bɛɛ Bɑsɑnin dɑ̃ɑ bɑkɑnu, i weeweenu koowo.

Domi dɑ̃ɑ sɔ̃ɔ ge bɑ ǹ dɑɑ kpɛ̃ bu du gɑ wɔrukɑ.

3 Kpɑrobu bɑ wuri mɔ̀,

domi ben bɛɛrɛ yɑ kpɑ.

Gbee sinɑnsu su kukirimɔ,

domi Yuudɛnin dɑ̃ɑ sɔ̃ɔn bɛɛrɛ yɑ kpɑ.

Kpɑrobu yiru

4 Amɛniwɑ Yinni Gusunɔ u Sɑkɑri sɔ̃ɔwɑ. U nɛɛ, ɑ yɑ̃ɑnu kpɑro ni bɑ koo go. 5 Be bɑ nu dwemɔ bɑ goomɔ bɑ ǹ bu sɛɛyɑsiɑmɔ. Be bɑ mɑɑ nu dɔrɑmɔ bɑ mɔ̀, bɑ nɛ, Gusunɔ siɑrɑ, domi bɑ gobi mɔ. Nin kpɑrobu bɑ ku rɑ mɑɑ kɑ nu yinɛ. 6 Nɛ, Yinni Gusunɔ nɑ ǹ mɑɑ tɔmbun wɔnwɔndu mɔ̀ tem mɛ sɔɔ. Kon bɑɑwure bɛriwɑ win winsim nɔmuɔ kɑ win sunɔn nɔmuɔ. Bɑ koo ben tem ɑrumɑni gurɑwɑ. Nɑ ǹ mɑɑ bu wɔrɑmɔ ben yibɛrɛbɑn nɔmun di.

7 Yerɑ Sɑkɑri u yɑ̃ɑnu kpɑrɑbu wɔri ni bɑ koo go. Yɑ̃ɑ niyɑ nu kɔ̃suru bo. Mɑ u kpɑrɑ dɛki yiru kɑsu. U tiɑ sokɑ durom, tiɑ mɑɑ nɔɔ tiɑ. Mɑ u dɑ u yɑ̃ɑ ni nɔɔri. 8 Suru tiɑn bɑɑ sɔɔ u nin kpɑrobu itɑ go. Mɑ u kɑ nu tii kpɑrɑ u tɛmɑnɑbu kpɑnɑ. Mɑ nin tii nu nùn tusɑ. 9 Mɑ u nɛɛ, nɑ ǹ mɑɑ nu kpɑrɑmɔ. Nin ni nu koo gbi, nu gbio. Ni nu koo mɑɑ tiɑrɑ nu tennɔ.

10 Mɑ u win dɛkɑ ye u sokɑ durom bɔɔkɑ u kɑ sɔ̃ɔsi mɑ u win ɑrukɑwɑni kusiɑ ye u rɑɑ kɑ bwesenu kpuro bɔkuɑ. 11 Yen tɔ̃ɔ terɑ u ɑrukɑwɑni ye kusiɑ. Mɑ yɑ̃ɑ kɔ̃su ni nu nùn mɛɛrɑ mi, nu giɑ mɑ Yinni Gusunɔn gɑriyɑ yi koorɑmɔ. 12 Mɑ u bu sɔ̃ɔwɑ u nɛɛ, yɑ̀ n bu wɛ̃re, bu nùn kɔsiɑru wɛ̃ɛyɔ, yɑ kun mɑɑ bu wɛ̃re, bu derio.

Yerɑ bɑ sii geesun gobi tɛnɑ yĩirɑ bɑ nùn kɔsiɑ. 13 Mɑ Yinni Gusunɔ u nùn sɔ̃ɔwɑ u nɛɛ, ɑ sii geesun gobi tɛnɑ ye bɑ mɛɛrɑ burɛ mi, mɔmɔ wɛ̃ɛyɔ.

Mɑ u gobi yi suɑ u yɑri Gusunɔn sɑ̃ɑ yerɔ yi kɑ ko mɔmɔgii. 14 Yen biru, u mɑɑ win kpɑrɑ dɛkɑ yiruse ye u sokɑ nɔɔ tiɑ mi, bɔɔkɑ u kɑ sɔ̃ɔsi mɑ Yudɑbɑ kɑ Isirelibɑn bɑɑ sɔɔ nɔɔ tiɑ mɑɑ sɑri. 15 Yinni Gusunɔ u mɑɑ nùn sɔ̃ɔwɑ u nɛɛ, ɑ kpɑro nge kpɑro gɑri bɔkɔ. 16 Domi kon kpɑro goo seeyɑ tem mɛ sɔɔ, wi u kun yɑ̃ɑnu nɔɔrimɔ ni nu gɔɔ dɔɔ. U ǹ nin binu kɑsum dɔɔ. U ǹ ni nu mɛɛrɑ wɑ tim kuɑmmɛ. Mɛyɑ u ǹ mɑɑ ni nu bwɑ̃ɑ do nɔɔrimɔ. Adɑmɑ u koo ni nu gum mɔn yɑɑ tem sere kɑ nin kɔ̃riɔ.

17 Bɔ̃rurowɑ kpɑro gɑri bɔkɔ wi u yɑ̃ɑnu derimɔ.

Tɑkobi yu win gɑ̃seru kɑ win nɔm geun nɔnu kɔsukuo,

kpɑ gɑ̃se te, tu gberɑ kpɑ nɔnu ge, gu gbi.