1 Bɛɛ Yerusɑlɛmugibu, Yinni Gusunɔn tɔ̃rɑ wee.

Bɑ koo bɛɛn yɑ̃nu gurɑ bu bɔnu ko bɛɛn nɔni biru.

2 U koo bwesenu kpuro mɛnnɑ nu kɑ Yerusɑlɛmu wɔri.

Bɑ koo ye mwɑ kpɑ bu yen yɛnusu dɔ̃ɔ sɔku.

Bɑ koo kɑ yen tɔn kurɔbu kpunɑ kɑ dɑm.

Kpɑ bu yen tɔmbun bɔnu yoru mwɛɛri bu kɑ doonɑ.

Adɑmɑ bɑ ǹ be bɑ tie goomɔ.

3 Sɑɑ ye sɔɔrɑ Yinni Gusunɔ u koo tii sɔ̃ɔsi

kpɑ u kɑ bwese ni tɑbu ko nge mɛ u rɑ ko tɑbu sɔɔ.

4 Yen tɔ̃ɔ te, u koo win nɑɑsu sɔndi Olifin guurɔ

te tɑ wɑ̃ɑ Yerusɑlɛmun dee deeru, sɔ̃ɔ yɑri yeru giɑ.

Olifin guu te, tɑ koo bɛsirɑ suunuɔ

sɑɑ sɔ̃ɔ yɑri yerun di sere sɔ̃ɔ duu yerɔ.

Wɔwi bɑkɑ yɑ koo yɑri ten suunu sɔɔ.

Guu ten bee tiɑ yɑ koo dɑ sɔ̃ɔ yɛ̃sɑn nɔm geu giɑ

kpɑ bee tiɑ yu mɑɑ dɑ sɔ̃ɔ yɛ̃sɑn mɔm dwɑru giɑ.

5 Sɑɑ ye sɔɔ, i ko i duki dɑwɑ win guunun wɔwɑ sɔɔ.

Domi wɔwɑ ye, yɑ ko n wɑ̃ɑwɑ sere Atisɛliɔ.

I ko i duki suwɑ nge mɛ i rɑɑ kuɑ

sɑnɑm mɛ tem yĩiribu bɛɛ deemɑ

Osiɑsi Yudɑbɑn sinɑ bokon wɑɑti.

Sɑɑ ye sɔɔrɑ Gusunɔ nɛn Yinni u koo nɑ kɑ win tɔn dɛɛrobu.

6 Yen tɔ̃ɔ te, yɑm bururɑm mu ǹ ko n mɑɑ wɑ̃ɑ.

Purɑ yɑ ko n wɑ̃ɑ kɑ sere mɑɑ nim mɛ mu gɔsirɑ nge kperu.

7 Tɔ̃ɔ te, tɑ ko n sɑ̃ɑwɑ nɛnɛm te Yinni Gusunɔ u yɛ̃.

Bɑ ǹ wɔ̃kuru kɑ sɔ̃ɔ sɔɔ wunɑnɑmɔ.

Adɑmɑ yokɑ, yɑm bururɑm mu koo sɔ̃ɔsirɑ.

8 Yen tɔ̃ɔ te, nim gem mu koo yɑri Yerusɑlɛmun di

kpɑ mɛn sukum mu koku mu dɑ nim wɔ̃kuɔ

ge gɑ wɑ̃ɑ sɔ̃ɔ yɑri yeru giɑ,

kpɑ sukum mu dɑ nim wɔ̃ku ge gɑ wɑ̃ɑ sɔ̃ɔ duu yeru giɑ.

Nge mɛyɑ n ko n sɑ̃ɑ sɔ̃ɔ sɑ̃reru kɑ gurɑn sɑɑ.

9 Yinni Gusunɔwɑ u ko n sɑ̃ɑ tem kpuron sunɔ.

Wi turowɑ u ko n sɑ̃ɑ Yinni.

Win turon yĩsirɑ tɔmbu kpuro bɑ koo giɑ.

10 Isirelibɑn tem kpuro mu koo gɔsiɑ wɔwɑ

sɑɑ Gebɑn di sɔ̃ɔ yɛ̃sɑn nɔm geu giɑ

n kɑ dɑ Rimɔɔwɔ Yerusɑlɛmun sɔ̃ɔ yɛ̃sɑn nɔm dwɑru giɑ.

Sɑɑ ye sɔɔ, Yerusɑlɛmu yɑ koo yĩsiru yɑri

kpɑ yɑ n wɑ̃ɑ yen ɑyerɔ.

Yɑ ko n wɑ̃ɑwɑ sɑɑ kɔnnɔ ge bɑ mɔ̀ Bɛnyɑmɛɛn di,

n kɑ dɑ kɔnnɔ gbiikuuɔ,

sere kɑ kɔnnɔwɔ ge bɑ mɔ̀ gɑni gɔmbunu.

Sɑɑ mɑɑ kɔ̃su yee te bɑ mɔ̀ Hɑnɑnɛɛlin di,

n kɑ girɑri sinɑ bokon resɛm gɑmɑ yerɔ.

11 Tɔmbɑ koo sinɑ ye sɔɔ.

Bɑ ǹ mɑɑ ye kɑm koosiɑmɔ.

Yɑ ko n wɑ̃ɑwɑ bɔri yɛndu sɔɔ.

12 Wee nɔni swɑ̃ɑ te Yinni Gusunɔ u koo tɔmbu kpɛ̃ɛ

be bɑ Yerusɑlɛmu tɑbu wɔri.

Ben wɑsi koo kɔ̃siwɑ bɑ n kɑ sĩimɔ.

Ben nɔni yi koo kɔ̃si ben nɔni wɔrusu sɔɔ,

kpɑ ben yɑri yi kɔ̃si ben nɔsɔ.

13 Yen tɔ̃ɔ te, nɛ, Yinni Gusunɔ kon wɑhɑlɑ bɑkɑ doke ben suunu sɔɔ.

Kpɑ bu wɔrinɑ bu soonɑ.

14 Yudɑbɑ bɑ koo tɑbu ko Yerusɑlɛmuɔ,

kpɑ bu bwese tuku ni nu kɑ bu sikerenɛn dukiɑ gurɑmɑ.

Yerɑ, wurɑ kɑ sii geesu kɑ yɑ̃ɑ dɑbinu.

15 Nin dumi kɑ nin birɑkɔsu

kɑ nin yooyoosu kɑ nin kɛtɛkunu

kɑ sere mɑɑ yɑɑ sɑbe ni nu wɑ̃ɑ mi,

kpuro nu koo dumgbɛku mwɑɑrɑ.

Dumgbɛku tiɑ yerɑ yɑ koo nu deemɑ.

16 Bwese ni nu rɑɑ Yerusɑlɛmu ye wɔri,

nin ni nu tie, nu ko n dɑ nɛwɑ wɔ̃ɔ bɑɑgere

nu yiirɑ Gusunɔ sinɑ bokon wuswɑɑɔ,

wi u sɑ̃ɑ wɔllu kɑ tem Yinni,

kpɑ nu Kunun tɔ̃ɔ bɑkɑru ko.

17 Bweseru gɑru tɑ̀ kun de

tu Gusunɔ sinɑ boko wi u sɑ̃ɑ wɔllu kɑ tem Yinni yiirɑ

tu sɑ̃ Yerusɑlɛmuɔ,

gurɑ kun nɛmɔ ten temɔ.

18 Egibitigibu bɑ̀ kun de Yerusɑlɛmuɔ

bu kɑ Kunun tɔ̃ɔ bɑkɑru ko,

gurɑ kun nɛmɔ ben temɔ.

U koo bu wɑhɑlɑ dokewɑ

nge bwese ni nu yinɑ nu dɑ

nu Kunun tɔ̃ɔ bɑkɑru ko.

19 Nge mɛyɑ u koo Egibitigibu kɑ bwese ni nu yinɑ nu Kunun tɔ̃ɔ bɑkɑru dɑ Yerusɑlɛmuɔ kuɑ.

20 Yen tɔ̃ɔ te, bɑ koo dumin yɑngirenu sɔɔ yore bu nɛɛ, Yinni Gusunɔgiɑ.

Sɑ̃ɑ yerun wekenu kpuro nu ko n sɑ̃ɑwɑ nge yɑ̃ku yerun gbɛ̃ɑ.

21 Wekenu kpuro nu ko n sɑ̃ɑwɑ Gusunɔ, wɔllu kɑ tem Yinniginu Yerusɑlɛmuɔ kɑ Yudɑɔ.

Be bɑ koo yɑ̃kuru nɑ,

berɑ bɑ ko n dɑ nu sue

bu kɑ ben yɑ̃ku yɑɑ yike.

Yen tɔ̃ɔ te sɔɔ, bɑ ǹ mɑɑ tenkubɑ wɑsi sɑ̃ɑ yeru mi,

bɑ n yɑ̃nu dɔrɑmɔ.