Daniela
Walo bagubagunana
Buki bwaitete iwalowalo-masala tawae iyawatagili Daniela yo tomo Isileli tupwaliyao kolili yanuwa Babilon koina. Daniela ana tolo-kaiwe tomo Isileli ali Yaubada koina kaiwena mwa Babilon kana kinyao sitobalan.
Nuwatu lalakiliyao buki bwaite kalona mena bwaite siyaele
Edeededeli toweya talobai?
Isileli kilakaiwo nuwanuwali tano kanna koina sikekan peina 1
Daniela kin Nebukadinesa kenona ibui peina 2
Daniela mekanakavao kokotomo kana pwalou sisikotanan peina 3
Tawae iyawatagili kin Nebukadinesa koina iboma iwalo-masalan peina 4
Daniela lelelele kana katai ibui peina 5
Daniela sigabaen laiyon kali gula koina peina 6
Buki Daniela meuloina nige kabubui bwaimwanamo peina 1 kanasiga peina 6.
1
Daniela me ana eliyamwao sisikulu Babilon koina
1 Saugana Yeoyakim iya Yudiya ali kin, iloiloina bolime yaiyona kalona mena, kabo Nebukadinesa, Babilon ali kin ana tokaleyayao ikalaili yo sisae dedei Yudiya yo mekalikavao Yelusalema sikaleya. Babilon Yelusalema kana kamwasa meuloili simiya-kausili kisi tomoliyao siyawatagili siyabubu. 2 Kabo Yaubada italam Yudiya ali kin Yeoyakim sikabi-kalatan yo tabe Nume Tabu Yelusalema gogona tupwana sikalaili. Gogoliyaone silawagili sipeili Babilon ana yaubada ana nume tabu ana gogo kaba lopei mena. Besiele tabe tomo tupwaliyao sipanli silawagili Babilon. 3 Kabo kin Nebukadinesa iwalo ana topaisowao ali tobaguna koina, esana Asipenasi igite-sipwaili Isileli kilakai panpanli kaloli mena. Gitesipwane ilau tem kin o tem towasawasa natuliyao kolili. 4 Tabu yabo mekana kasiebwa, kali koleya namwanamwana, nuwali sonosonogali, siyasili namwanamwa, yo ali katai imwayamwayau kabo sowasowali sipaisowa kin ana nume mena. Na Asipenasi iyakayakatai kolili kaina Babilon lelelelena yo yasiyasilina. 5 Kin ana topaisowa kali loina ipei kaliyate kaigeda kaigeda kali yo kali oine silawagilimaya ana nume mena. Asipenasi yakato iyakayakataili bolime yaiyona, imwawasi kabo silau kin igitaili, tem sowasowali sipaisowa kin koina o nigele. 6 Siya sigite-sipwaili kaloli mena esaliyao bwaite, Daniela, Ananaya, Miseli yo Asalaya, siya silaomaya susu Yuda koina. 7 Asipenasi esaliyao waluwaluli ipeili. Daniela ipei Belitesesa, Ananaya ipei Setaleki, Miseli ipei Misake yo Asalaya ipei Abedenigo.* Esaliyao waluwaluli kaina Babilon
Daniela yo kanakavao Yaubada ana loina sibenalan
8 Daniela inuwanuwatu tabu kan yo wain silalaoma kin ana nume mena na kolili ikekekan, kaiwena Yaubada ana loina iba tem kan besiele ikan, kani ikabi-yabiki. Kabo ikawanoi tobaguna Asipenasi koina tabu iwowolena.
9 Yaubada Asipenasi katena iyabiga kabo Asipenasi me ana mulolo yo nuwanuwana Daniela isagui. 10 Na iyamo iwalo Daniela koina iba, “Yagu taubala kin yamatausan. Kami loina iwalowen tawae wakan yo tawae kwanuma. Tem kanne nige yaeyawa yo kwapwagege yo yomiu nige kamnali sinanamwanamwa na nige besiele kilakaiwo meuloili kani kin iunuyamateyau.”
11 Na Asipenasi togite-kalatan yabo ipei na yoli esopali igite-kalatagili. Kabo Daniela ilau kali togite-kalatanne koina, 12-13 yo iba, “Tem kutalam kai kakekan tano kanna koina yo waila bwagabwaga koina kanuma, na siya kilakaiwone sikekan kin ana nume kanna koina. Na kaliyate sanaulu (10) simwawasi kabo kulaoma ugite-sipwa kolimai besiele am loina na uginauli besiele am gite-lobai.” 14 Yo italam kabo itonagili kaliyate kali baibaiwa sanaulu. 15 Kaliyate sanaulu imwawasi kabo Daniela mekanakavao yoli yaiyonane kali koleya sinamwanamwasosi yo sikaiwe kabo muli mena kalikavao tokekan kin ana nume kanna koina. 16 Mwa togite-kalatan kin ana nume kanna yo wainna nige iwowolegili na kan bwaite tano kanna iwolegili kolili. 17 Yaubada lelelele meuloina yo sonoga meuloina kana katai yo kana paisowa italamwan kilakaiwone yoli esopaline kolili. Tabe Daniela koina italamwan tomo kenoliyao yo yakenayan meuloili kali bui.
18 Bolime yaiyona simwawasi besiele bwaite kin iwalo ali yakayakatai kaiwena kabo tobaguna Asipenasi kilakai meuloili iyoganli ilawagili Nebukadinesa koina. 19-20 Kin mekanakavao siedeedede kabo ilobai nige yabo ana katai besiele Daniela, Ananaya, Miseli yo Asalaya ali katai. Bwagana toisabo neli kin ineliyan kolili ilobai kilakaiwone yoli esopali ali sonoga yo ali katai silalakisosi kabo muli mena tokukula meuloili ana kaba loina kalona mena. Kabo kin ikalaili siyamala ana topaisowao. 21 Na Daniela imiyamiya kin ana topaisowa kolili kanasiga kin Sailusa tomo Pesiya ana loina iyatubu Babilon koina.