1 Yo Yeoba iwalo Mosese koina iba, “Polowe kaigedamo kani yayawasa Itipita ali kin me ana tomoyao kolili. Kabo mulina mena italamwagimiu kwalowasi. Kani meuloimiu imalimaliwagimiu dedei bwaite koina. 2 Bwaite saugamo kulau Isileli kolili kuwalolau yo kuwaloba, ‘Meuloimiu kwalau Itipita kolili siya simiyamiya salimiu mena, kali galogalo gole yo siliba wakawanoi-yagili.’ ” 3 Yo Yeoba Isileli isaguili kabo Itipita Isileli ali kawanoine sikawa-namwanamwa-yagili kaiwena Yeoba nuwatune ipeiyako kateli mena. Besiele Mosese esana ilalaki Itipita koina, kin kana tosaguwo yo ana tomoyao meuloili manli mena.

4-5 Mosese me ana katepatu ilauyoi kin koina yo iwaloba, “Yeoba iwaloba, ‘Boniyai luwaluwalina koina kani Itipita dedeina yalotakikilan, yo Itipita melumeluwo tobagubaguna tatao meuloili kani siboita. Iyatubu kin natuna, iya yakato naga iyamala kin, koina kanasiga topaisowa pegapega kana togili natuliyao kolili. Yo tabe bulumakau meuloili natuliyao tobagubaguna kani siboita. 6 Itipita kalona meuloina valam yo koyasili lalakina kani iyawatagili, valamne nige sauga yabo bwaite besiele iyayawatagili yo tabe kani nige iyayawatagili yoi. 7 Na Isileli kolili nigele, nige polowe kikiuna yabo kani iyayawatagili kolili, nige miya-kalekaleya yabo, nige besiele bwauwa sikwatukwatu tomo o tem ebaebai kolili. Kabo ukwatai yau Yeoba Isileli yapei-suwalagili kolimiu Itipita.’ ” 8 Mosese iwaloyoi iba, “Kam tosaguwo meuloili kani silaoma tutulili sitalu-sakonayagili koliyau yo sikawanoi koliyau yakato yau yo Isileli meuloili kalowasi. Ee kabo muli mena kani kalowasi.” Mosese me ana munamunai ana walo iyemwawasi kabo kin ilogabaen.

9-10 Na tauna kona Yeoba iwalolau Mosese koina yakato kin Mosese kainana kani nige ibebenalan na mesabana ginauli kaba nuwapwanopwano sibaibaiwa iginauli Itipita dedeina mena. Bwaine besiele ginauli meuloina iyawatagili. Mosese yo Eloni ginauli kaba nuwa-pwanopwanone meuloili siginaulili kin manna mena, na Yeoba kin katena ikabi-yakololo kabo kin nige itatalamwagili silolowasi.