1 Natugu, yagu walo kubenalagili yo kupeili katem mena. 2 Kuobigaili kabo miya namwanamwana kulotonan, me am yakasisi yagu yakayakatai kaiwena yakato siya ginauli namwanamwasosili. 3 Kupanli nimam gibuli kolili, yo kuleleli katem mena. 4 Sonoga yawasosi kumulolo koina yakato iya besiele dum, yo katai kuyogan besiele am susu yabo. 5 Kabo sonoga yo katai kani sisaguiwo na sine ganaganawalina kulosuwala molosi koina kaiwena sinene iya mekasole nuwanuwana lalakina tem iwoyaiwo ana walo luviluvili kolili.

6 Yagu nume tomlape mena yagitagitai koina, 7 kabo toyauyaule meuloili kaloli mena kilakai yabo yagitai nige me ana katai. 8 Kilakaine ilaulau kamwasa mena sinene ana nume salina mena. 9 Dabwelo isuguko yo iboboniyai. 10 Kabo sinene iyawatagili koina, sinene kalekona yauyaule ilikwa nuwanuwana naenaena iginauli. 11 Sinene mumugana bwaite besiele, iya togamwapakiki, genuwana ana nume igite-kalatan na ilolokeikeile na itakitakikili yanuwa kolili. 12 Kamwasa mena yo tomo ali kaba miyagogo ilaulau kolili yo tatao iloyaloyaili.

13 Kabo kilakaine nimana ikabi-kalatan yo isapwali yo manna imankulakulai, 14 kabo iwalo koina iwaloba, “Kan lalakina iyaele yagu nume mena kaiwena kabona yagu pwaoli paisowana yaemwawasiyako. 15 Yagu nume mena yayawatagilima na yaloyaloyaiwo kabo yalobaiwoko. 16 Yagu kaba keno yakatububu-nagiliko kaleko namwanamwali mena silaomaya Itipita koina. 17 Yo olo bwalaili namwanamwali mula, aloesi yo sinamon yasuwaili. 18 Talau na takeno toyawa na yasapwaliwo kanasiga yanuwa ilayan na tayaliyaya. 19 Yagu taubala nige imimiya, bwaite koina ilaoko ilolokeikeile kelamamalawe mena. 20 Mane lalakina itauli ana tobwa mena ikalai ilau yo kani nige ilolo-mwayamwayauma, nuwana waikena kaigeda imwawasi kabo ipileyoima.”

21 Walo luviluvili kolili sinene kilakaine iwoyai ilawan ana nume mena. 22 Mwa kilakaine mwayamwayau imuliya koina besiele bulumakau ana lau kana tounuyamate koina, besiele yakayakan sokasokana ilalau sipwasipwa yabo koina 23 yo pwawati kana kamkamna ilotonan, kilakaine ilaulau kanasiga boita ilobai, kaiwena nige ikakatai naene maisana.

24 Kabo natuguwao, yagu walo kwabenalagili yo kwanuwatu-kalatagili. 25 Katemiyao wagite-kalatagili kisi kwalau sinene ana kamwasane koina na mumugana wakalai. 26 Kaiwena sinene ana walo luviluvili kolili kilakai sibaibaiwa iwoyaili yo isibayanaeliko. 27 Ana nume kana kamwasa ilalau boita kamwasana kaiwena.