1 Yeoba tatobalan. Yaluyaluwagu, Yeoba kutobalan.

2 Yeoba kani yatobalan yawasigu meuloina koina, kani Yaubada koina yawali-tobali yagu miyamiya meuloina koina.

3 Tabu ami meli kwapepei toloinao yo towasawasao kolili siya kani nige sileleboimiu.

4 Saugana siboita sipileyoi bwatano mena, bwaine kaliyatenane koina ali nuwatu meuloina ilaoma iyamala ginauli bwagabwaga.

5 Analiyao siya sagu silobai yo ali meli sipei Yeoba koina iya tomo Isileli ali Yaubada kani siyaliyaya, 6 kaiwena iya bulibuli yo yanuwa yaulina kali toyamayale yo besiele kalita kalona mena ginauli meuloina simiyamiya kali toyamayale.

Yeoba ana waloyameli inuwatu-kalatagili, 7 kabo yatala koina siya kamkamnali isaguili, yo toguliyam kan iwolegili.

Yeoba tolusae deli ilivasili, 8 toman-gibugibu manli iyalalali yo tonuwalobi ikeleisinagili kaiwena Yeoba imulolo todudulai kolili.

9 Yeoba tolaolaoma, kwabukwabuliwo yo sinasinageliyao igitagitaili yo isagusaguili, na tonaenaeli ikalaili ilawagili kaba sibayanae koina.

10 Yeoba iya kin miyamiya yaina. Komiu Saiyon tomonliyao, ami Yaubada ana loina kani imiyayai kani nige ilolotom.

Yeoba tatobalan.