17 An sheeru, yuwamun Ijiptosh tsap shitungarangana anumun minam masach izuuru tushiyramchu, putamsha anush Apanlleem pang' pangumaama chtaranganaya 18 Ashiri tputs ichinguru maachi wayam iwapayarusin, Móysissha; Ashiri na panguyani, tárangiya. Ichtaru patuzinazee tuxiykeeranganaya.

19 Sheeru, unambeem wayayaru, wanupsheemsha wayarangitamanaya. Sheeru, kamisshat unambeem kunaranganaya. Sheeru, iwapayarusin, anumun kaapara pur kamis k'tam anpat puranganaya. Sheeru, anumunsha taspat panguranganaya. Yuwaa Taarashipan kamachtarangu anuritam ichinguru tuminaranganaya. 20 Sheeru, anumunsha patumbcheetssha yuwaa Taarashipan waanaatsi kamachtamarinee yandarangu anoo Apanllish kajonarini wayaranganaya. Sheeru, anumunsha kajonee washtangashpat shtandaranganaya. Anumunsha, kajonimun unambeem pshtamaam ipunpunar tstsaranganaya. Sheersin, unambee anush pshingaranganaya kumaama. 21 Kuyarusin, Apanllish pang' waantsush wayaranganaya. Sheeru, anumunsha kamispasha kámanarangiya. Yuwari Taarashipan waana kamachtarangu anuritam tuminuranganaya.

22 Ashiriya, anumunsha Móysissha mesaa, kamisaa kámanaru anoo, ningari mbazinungich wayarangiya. 23 Sheeru, mesamunsha pangaa wayarangiya. Yuwari Taarashipan waana kamachtarangu anuritam ichinguru tuminuranganaya. 24 Sheeru, anumunsha mbarinaa wantsushtam wayarangiya; mbatsutsunungich mesanungiri tasaseeru wayarangiya. 25 Sheeru, Nambarinaatssha wayat wayat sheersin, tirooranganaya yuwari waana Taarashipan kamachtarangu anuritamta. 26-27 Anumunsha, kajonee orpat tinam kzammashee mbutamaam Apanllush pang' wantsshutam wayarangitamanaya. Kamis kámanaru annung tasaseeru wayarangana. Sheeru, kajonushsha kzammashee mbutarangtamanaya. Yuwari Taarashipan tárangu anuritam tuminaranganaya. 28 Sheeru, anumunsha Móysis Apanllish pang' pshtushishinung kamispat kámanarangiya.

29 Sheeru, anumunsha kajontam ngusambaam bronsi tinamaa wishchip wayayaru, chinootssha, wakaraa, mishat opeejaa ashiru pachayarusin, Taarashipanee ungirtamaam muchiranganaya. Mishat, tirikootstam Apanlleem muchirangtamanaya. Yuwari Taarashipan kamachtarangu anuri tuminaranganaya. 30-31 Anumunsha, shtashee kapungumashi wishchiptam wayarangana. Apanllish pang' tasaseeru kajoninung ush wayaranganaya. Sheeru, shtashishsha kungoo tatsitaranganaya. 32 Ashiri anushsha Móysisi, misha Aaronatam, misha Aarontam wip kungoo tipayarusin, uw kuxirangana, mishat watseetstam kuparanganaya. Ndatuma Apanllish pang' pshtursin, mishat ndatuma kajonush kuseersin, uru ichtaru watseetsima kupayarusin, anumunsha kuxiranganaya. Yuwari Taarashipan kamachtarangu anuri tuminaranganaya. 33 Anumunsha, Móysis ichinguru iwapayaru, kamispatshat tipuranllizee ichinguru kámanarangiya. Anamunshat, pshtushishinung kamispat wishchip pshtumaam kámanarangiya. Amb sheersin, ichinguru Taarashipanee wamachtash iwaparanganaya.

Ashiri na kamaneena yuwaa Apanlleem panguyarusin, anush Apanllee ungirtarangana anootsi.

34 Ashiri pangumaam iwapurangusin, anuritam msassha karuweeru, Apanllee pang' yambutarangiya. Anumunsha, Taarashipansha wizpur waanaatsi pang' izuuru tatsitarangu tuwasineerangiya. 35 Ashiri Móysissha nda Apanllish pang' pshtumaam waritarangiya, watam msas kizpur tuwapimunuwa. Mishat, Taarashipansha wizpur kizpur tuwasinirangiya. Izuuru 'sin Apanllush pang' tatsitarangiya. Msas uru Apanllee pang' yambutarangiya. 36 Itaru, msassha pakich íwar káritara ashkachu, anush Israelchichsha pangoo yáyarandsin, naataranganaya. 37 Itaru, nduma msas íwar káru, Israelchich nduntam naamaam waritarangana. Msas íwar káreemasa atusin kutaranganaya. 38 Ashiri yuwapur Israelchichi naarangana anpur uru tputs Apanllish pang' msas yambutaru anoo parangana. Anumunsha, tputs psaantam napkusin, sumas tamapari ashiru msasush 'sinee ashirangiya.

Ashiriya, na kamaneena yuwaa msas Apanllimun pangu karuwarangu anootsi.

[Ashiriya, nuw Móysisi: wapparee, atina siyaatsi. Na kamaneena yuwaa Apanll Israelchichee tashitungarangu anootsi.]