1 Jascasca jaiya hicha joni tsamajaquetaiya jahua pitimahiya jahuen haxenicabo quenaxon jato yohiquin:

2 —Nea tsamajaquetaibahon tah hen shinanai. Quimisha neten sca hehbetan hihxon bi ta jahuabi piyamacanihqui. 3 Pihaxma jaton xobon cahabo raanah ta bahin mehax jaton yora yosmajaquexihcanihqui, caibo rihbi hocho quehabo —jato jaquin. 4 Jascaha jahuen haxenicabaan:

—¿Jenquetsahaxon non nea jonibo pimatihin, neno tsoabi jihueyamahiton? —hahcanquin.

5 —¿Jahuentihi paan man jain? —jato yocaquin.

—Siete rahan —hihcani. 6 Tsamajaquetaibo sca jaan yohiquin, main tsahonon. Jaton siete paan bihxon Papa yocaxon tehcapaquexon jahuen haxenicabo hinanquin, jonibo sca hinannon hihxon. Bihxon sca jato hinanpaquecanquin. 7 Yapa romishin huestibo rihbi cahen jaabo jai. Jaa bihxon Papa yocaxon jato hinanmarihbiquin. 8 Hinanah pihi yanicahincani. Texehi tequebo tsinquirihbixon siete tasa bohasjacanquin. 9 Cuatro mil jonibo jano hihqui bi jato pimaxon cahabo jato camascaquin. 10 Jaatian sca jahuen haxenicaboyabi nontin nanetax Dalmanuta main sca cahi.

11 Fariseobo sca ta Jesus qui jonishqui. Joxon Jesus yohuanquihnquin, joi bichinnanancatsihquin. Papan hinanah hahan honanti jan jato jismanon hihxon yocacanquin. 12 Jascahiboya jointi hihti xecahihnixon jato yohiquin:

—¿Jahua jenquetsahin nea rahma jihuetai jonibaan hahan honanti jiscatsihquiquin? Yohicoin tah hen mato jai: jahuabi hahan honantibi ta mato jismatimahihqui —jato jaquin. 13 Jato banescaax nontin nanerihbihax ramiho quexa sca cahi cahi.

14 Caquin bi piti boti shinanbehnocanquin. Huesti paan res nonti janin jai. 15 Coirametahbo jato yohiquin:

—Jisnahue. Fariseobaan hahan paan soohihmati qui raquenahue. Herodesnen hahan paan soohihmati qui raquenahue —jato jaquin. 16 Jaa jan yohihi jaabo rahsibi sca yocacahcani:

—Non paan yamahiya cahra noque yohihihquin —hihcani. 17 Jascajaquin shinanaibo honanxon Jesusen sca jato yocaquin:

—¿Jahua jenquetsahin man paan yamahi yocacahnananain? ¿Man jiscoinyamaparihin? ¿Man honancoinyamaparihin? ¿Maton shinan chahoma sca quin? 18 ¿Beroyahpaxon bi man jisyamahin? ¿Pabinquiyahpaxon bi man nincayamahin? ¿Cinco mil jonibo pimanoxon pichca paan hen tehcapaquehiya texehi teque tsinquirihbixon jahuentihi tasa man bohasjahoquin? ¿Man shinanyamahin? —jato jaquin.

19 —Doce rahan —hihcani.

20 —¿Siete paan cahran, hahan hen cuatro mil pimahiya texehi teque tsinquixon jahuentihi tasa man bohasjahipiquin? —jato jaquin.

—Siete rahan —hihcani.

21 —¿Man honancoinyamaparihin? —jato jaquin.

22 Betsaida jema janin sca nococani. Nocotaiboya benche joni Jesus qui caibaan hiocanquin. Hioxon hihti yocacanquin, mehexonhue hahquin. 23 Yocacah benche metsonxon hiobonahi jemama qui cahi. Benchen bero qui toshbanhahxon mequeman mehexon sca yocaquin:

—¿Min jisyamabiresain? —hahquin. 24 Jari jisxon:

—Jihui nihcahuanai quescapahbo ta hen joni jisi —hahquin. 25 Jaatian sca jahuen bero meherihbihah coshicahinxon jisribiquin. Siriscaxon jatihibi sca jisquin sirijaquin. 26 Jahuen xobon sca jan catannon:

—Jema janin hihquihaxma catanhue —Jesusen jaquin.

27 Jaatian sca jahuen haxenicaboyabi Jesus cahi, Cesarea de Filipo mai meha jemabo janin sca. Caquin jato yocaquin:

—¿Hea tsoa hihqui shinancaniquin? —jato jaquin.

28 —Nashimanica Juan yamanica tah qui hih ta caibo jaiqui. Elías yamanica tah qui hih ta caibo rihbi jaiqui. Papan joi yohipahoni yamanica tah qui hih ta huetsabo rihbi jaiqui —hihcani jahuen haxenicabo. 29 Jaan sca jato yocarihbiquin:

—¿Maton cahran? ¿Hea tsoa hihqui shinan man jain? —jato jaquin.

—Mia tah min Cristo qui —hahquin Pedronen.

30 —Tsoabi jascajaquin yohiyamanahue —jato jaquin Jesusen.

31 Jaatian sca jato sirijaquin yohiquin:

—Hea noque baque ta tiromajayaxihcanihqui. Hehon ta queenyamayaxihcanihqui hanibo, sacerdote hapobo, huishani honanbo. Hea ta rehteyaxihcanihqui. Rehtehipibo bi tah hen quimisha netenax hahquirihbi hueniyaxihqui —jato jaquin. 32 Jahuabi joi jonexonma jato jascajaquin. Jesus quenabohanxon sca Pedronen yohiquin:

—Jascari yohuanyamahue —hahquin. 33 Rabejaquexon jahuen haxenicabo jisxon Pedro yohiquin:

—Jascayamahue. Hea janinhax catanhue, Satanas. Papan shinanai quescajaquinma bi jonin shinanai quescajaquin tah min shinanai —hahquin.

34 Jahuen haxenicaboya tsamajaquetai jonibo nincaqui jonon sca jato quenaquin. Jato quenaxon:

—Hehchon jocatsihxon tah man matobi man queenaima sca man hahtihi. Hea rehtehibaan bi tah hen heen Hihbo jenetimahi hihnahue, nete tihibi jascanahue. Jaatian tah man heen jihuetahbo jatihi. 35 Non mahuamis hihquibo ta mahuatihiqui. Hehqui hinamehxon heen joi siri nincacoinaibo ta rehtehah bi jihuetihiqui. 36 ¿Mai jatihobi hihbojahax bi mahuatax jahuaya sca man banetihin? 37 ¿Hahquirihbi teehihnoxon non copijaquin jahua hinantihin? 38 Rahma jaibo ta tsini tsinihibo qui, hohchapan baquebo. Hehqui hihtimahpai joni qui tah hen hea rihbi hihtimahyaxihqui. Heen joi qui hihtimahpai joni qui rihbi tah hen hea noquebaque hihtimahyaxihqui Papan yonotibo betan Papan shinanya jahuex jato qui hihtimahpi —jato jaquin.