10
1 Yja'sakarykon, yturu'po maro imero uta'no wyino unemyrykon 'se wa. Moro poko ro enapa Tamusi 'wa waturupoja. 2 Tamusi 'wano me o'mikatonon me iwairykon irombo samyikapoja. Oty anukuty'pa 'ne te mandon. 3 Moro Tamusi wyino tamambore aino anukuty'pa irombo mandon. Aseke tamambore tywairykon poko kyne'kujaton. Moro Tamusi wyino tamambore aino 'wa te atundymapo'pa mandon. 4 Mo'ko Kristus irombo moro omenano mero'po aike'kanon. Iwara tamambore tywairykon taro pa'poro mo'karon Tamusi amyikanamon mandon.
5 Moro omenano mero'po wyinono tamambore aino poko irombo Moses 'wa tymero man: Levitikus 18:5
Mo'ko omenano mero'po wara aitoto ro kari'na moro omenano wykary wara kynemandan.
6 Moro Tamusi amyikary wyinono tamambore aino te ero wara kynganon: “Aturu'po ta kykai: ‘Noky ko kapu taka nanu'tan, mo'ko Kristus eny'topo tiro?’ Deuteronomium 30:12-14 7 Kykai enapa: ‘Noky ko nony'totan moro ije'pomyn topona taka, mo'karon iromby'san wyino tiro mo'ko Kristus awo'nu'se?’ ” 8 O'to ika'po ko moro nan? Ika'po moro man: “Tyse waty awyino moro auranano man. Onda man. Aturu'po ta man.” Moro ro, moro Tamusi amyikary poko na'na nekarityry auranano moro man. 9 Moro auranano ekari'san ro na'na ero wara: Ondary ke Jopoto me Jesus wairy ekarity'poto o'wa, aturu'po maro iromby'san wyino Tamusi 'wa awonga'po amyika'poto enapa o'wa, uta'no wyino ajunendan Tamusi. 10 Tyturu'po maro Tamusi amyika'poto ty'wa, kari'na tamambore kynaijan. Tyndary ke Tamusi wyino tywairy ekarity'poto i'wa, uta'no wyino kari'na unendan Tamusi. 11 Ero wara irombo moro Tamusi karetary kynganon: “Pa'poro mo'karon amyikanamon epy'i'to'pa kynaita'ton.” Jesaja 28:16 (LXX) 12 Simosu irombo asewara man Simosu me e'ipyn maro. Mo'ko inoro noro Jopoto irombo pa'poro kari'na 'wano me man. Pa'poro mo'karon toty ejatonamon 'wa kurano yry taro imero man. 13 Pa'poro mo'karon toty ejatonamon unendan irombo Tamusi. Joel 2:32
14 One wara ko iro ke Mo'ko tynamyika'torykonymbo ety ejatota'ton? One wara ko namyikata'ton ekary aneta'pa ta'taine? One wara ko ekary etata'ton, ekaro'pa a'ta? 15 One wara ko oka nokarotan ekaro amy emoky'pa a'ta? Tymero irombo man: Jesaja 52:7
Kurano me pore mo'karon iru'pyn oka ene'namon pupuru man.
16 Pa'poro 'ne kapyn te kari'na moro iru'pyn oka 'wa tywepanama mandon. Mo'ko Jesaja irombo kynganon: Jesaja 53:1 (LXX)
Jopoto, noky 'wa ko moro na'na nekarityry oka tamyika nan?
17 Iro ke ko'wu oka etary Tamusi amyikapojan kari'na 'wa. Moro oka ro kynotanon, mo'ko Kristus ekarory jako. 18 Wykaje te: Moro oka aneta'pa iro ke tywaije nandon? Ware 19:4 (LXX)
Pa'poro ero nono tu'po te moro inekarityrykon tywota man. Morokon kari'na waito'kon nono y'matypo 'wa ro moro aurangonymbo tytunda man.
19 Wykaje te: Moro anukuty'pa iro ke tywaije nandon mo'karon Israel pajanymbo? Koromo 'ne Moses kynganon: Deuteronomium 32:21
Awu kamynano'pota'ton ypyitorykon me e'i'non kari'na poko. Oty anukuty'non kari'na poko kare'kopota'ton.
20 Mo'ko Jesaja enari'ma imero kynganon: Jesaja 65:1 (LXX)
Mo'karon yjupi'non kari'na yjeposen. Mo'karon ypoko aturupo'non 'wa wonepon.
21 Mo'karon Israel pajanymbo poko te kynganon: Jesaja 65:2 (LXX)
Yjapory tyngary poko roten wainen typanaja'naramon, yjauran arimanamon kari'na 'wa.