49
Jacob ya' nalanaa naa-inu deeñuba wainmi.
1 Jacob kumuinchi ya' nalanu mikatu tsandimi: Kalen jaidei, tsenmala ajkesha tyee inuuñuba wainnu tsuyu. 2 In nala, wakudidei, tsai' ñulla' apa Israel pantsu meedidei:
3 Rubén, ñaa in avenju na juve,
ñaa in dera, in ajke' keñu na juve,
ñaa kayu balenguramu juve, ñaa kayu pude juve.
4 Tsaaren naake' daatadin tsaa pi deenchuwa juuñu ju' mitya,
tichiba ajke' jumu juu kuran jutyuve,
matyu inchi kama miyandinu shinbuba tsaitu,
ñu' apa' tsuinsha lu', inu balejtu kuraanuu keñu' mitya.
5 Simeón, Levíba naatala deeve;
tsaaren yala' vinguenu jeruchiya na'baasa firu' kenu tirekemu deeve.
6 ¡Yala' dus wa'di' kuinda kensha jayuuba puu mujtyuve!
Yalan ajaavinu uwatalaya chachi tu'muwa deeve,
tsenmin ne tsanguichuyu tya' dajtyamiya
taawasha kemu wagaa nenbujkuwa wa'chuwa daaviimuwa deeve.
7 Mika ajaatya', tsamantsangue firu' kemuwa deeñu,
Diosya tsa mangaatyusa.
Tsa' mitya entsa Israel chachilla' kejtsapala,
iya na'baasa de-erekenu tsuyu.
8 Judá, ñu' naatalala ñunaa yuj urave tinu detsuve.
Ñu' kundaalanu pulla', ti kendya'ba tsa tsanguenu tsuve,
tsenmin ñu' naatalalaren ñu' ajuusha teedinu detsuve.
9 ¡Ñu, in na Judáya!
leun kaana juuñuuve,
naa-uwanu alla ka' fi' bain, tsaa palu'kake',
tunu tsu' lekamu leun tsaave.
¿Maa ñunu bulla kechunga
leun ju' tsun tsanamunu?
10 Tsenmin naa mu bain Judánu bale ruku jutyungue tirenuu dejutyuve,
tsa jutyu'ba, juntsa balen rukula' tyutyan cha'li tanamu jaindyuya,
ya' tyaapanu bale keengayanu tyutyan cha'li tanashu juntsa
muba machi'ken dejutyuve,
tsenmala naaju chachilla bain yanu meedinu detsuve.
11 Uva chitalaren ya' buru teetsure' uikaanu tsuve;
tsenmin ya' jali bain binuchi tene manbipunu tsuve,
¡matyu uva puka pichi!
12 Ya' kapukaya, binunuba kayu pulla yapijtutuve;
ya' tejkuya chu'pinuba kayu pulla fibave.
13 Zabulónya, lamaa pi keetalaa chunu tsuve,
baaku vija' u-udinu pebulu junu detsuve.
Tsenmin ñu' tuya Sidón pebulu jingue bare' tse'kenu tsuve.
14 Isacarya bui pana' nemu dera animaa juuñuuve,
pai kelu buli yangaraa juuñuu.
15 Tu naraañu kata',
uu lekantsunuu katatu,
yaren ya' beenbushu wayu'ka' buli pana',
veelachi uuden i' taawasha kemu tiyaiñuive.
16 Danya balen chachi tiya', ya' chachillanu washkenu tsuve,
matyu Israelnu sera' jimu
masku bulu paande naadejuñuba juntsaa.
17 Danya fimu piñi minguelunu tsumu juuñuunu tsuve,
matyu kawallunu nenbuupijpukanu fi',
junu chuu jimu chachillanu lupajtemu junu tsuve.
18 ¡Yavé, inu livee kika tenna keenayu!
19 Gadnuya, ma aa bulu suutadu vinguenu detsuve,
tsenmala yaa suutadula' beneshaa ja' kenu tsuve.
20 Aser' tuya anbu' fikenuu awakaakaa kenu tsuve,
tsenmin reiren fikenutsumi panda keraa junu tsuve.
21 Neftalíya mana juuñuuve, maali nejuu chumuve,
tsenmin naraa kailla miyanu tsuve.
22 Joséya pi kelunu chi chumu jun tsaave,
puka pure' iimu,
tsai' naa ya' pala jumula bain
veetanu tyaka' luimuve.
23 Arku tya'kemulaya tyutya',
yala' tsuta tyatyu tyatyudekive,
tsangue' naa-uwanuba bulla kitindetsu;
24 tsaanuren Joséya dera pejpe tave.
Jacob' tsamantsa pude Dios kivetentsuñu,
Israelnu deendanamu shupuka juuñuuchi,
matyu Israelnu washkemu Dios kivetentsuñu,
ya' arku denguijtyuna tanave.
25 ¡Ñu' apa' Dios ñunu kivetenu tsuve,
tiba kekaanuu jumu Dios ñunu mika ura' ikaanu tsuve!
¡Kai'sha selu jumuchi bain ñunu Dios ura' ikaanu tsuve!
¡Lamaa pi tainsha jumuchi bain ñunu Dios ura' ikaanu tsuve!
¡Dios ñunu pure' sera' jikaakenu tsuve!
26 Ñu' apa tsandi' ñunu Dioschi ura' isa ti' pakaya jumaa,
naa-uwanuba tsanamu aa kuyi jumula naake Dioschi ura' ikaamu deeñuba
juntsalanuba pullake Dioschi ura' isa ti' pakave.
Yumaa tinbu chumu kuyila naa-uwanuba tsanangama
entsa Dioschi ura' ikara pañu
José' mishunu tsanamu jusa,
matyu ya' naatalaatala yaa mi'ke' kayamunu.
27 Benjamínya jelekenu ajara jeengucha juuñuuve,
kepenene yachi tutamunu defi',
kepenusha juntsa laramu deveemu juve, timi Jacob.
28 Entsalaa Israelnu 12 bulu sera' jimu chachilla deeve, tsenmin entsaaya ya' apa ya' nalanu Dioschi ura' de-isa timi, main main naake Dioschi ura' inuu dejuñuba tsanditu.
Jacob peyami.
29 Bene entsandi pami ya' nalanu: Peyanu kalenayu. Iya peyanmala inu tinbu rukula' mennanu tenasha menkai, Hetnu sera' jimu chachi Efrón rukunu ati'kañu tunu tujuru juushu junu. 30 Entsa ati'kaya tu, Canaán tusha Macpelá jeendala Mamré bejkundala juve. Junaa in aa-apa Abraham ati'kamuwaave Efrón ruku' tunu, junu ya' bululanu ujkun mene menekenu. 31 Junaa Abrahamnu bain, ya' shinbu Saranu bain menmuwa deeve. Tsenmin junuren in apa Isaacnu bain, ya' shinbu Rebecanu bain menmuwa deeve, naa in shinbu Líanu bain junun menyu. 32 Juntsa tu bain, naa junu tujuru jumu bain Hetnu sera' jimu chachillanaa ati'kayave, timi.
33 Tsejtu Jacob ya' nalanu entsandi depa' dyatu, ya' tsunjuusha ya' neepa manchi'lareke' peyami, tsejtu ya' tinbu rukulaba manbuudiimi.