1 Cuꞌma̱ nguꞌ tyaꞌa na, ndiꞌya̱ ngaꞌa̱ chaꞌ cuaꞌni ma̱ loꞌo ñaꞌa̱ ma̱ chaꞌ ngua cuxi cresiya jiꞌi̱ sca nguꞌ tyaꞌa ngusñi ma̱ chaꞌ jiꞌi̱ ycuiꞌ Ndyosi, xquiꞌya chaꞌ nguaꞌni yu sca chaꞌ cuxi: ngaꞌa̱ chaꞌ xtyucua ma̱ xi jiꞌi̱ yu biꞌ, chaꞌ cati̱ quiꞌya nu ntsuꞌu jiꞌi̱ yu, chaꞌ tucuá yu cña jiꞌi̱ Cristo chaca quiyaꞌ, chaꞌ tyaꞌa ntsuꞌu chaꞌ jiꞌi̱ ma̱ loꞌo Xtyiꞌi ycuiꞌ Ndyosi laca yu. Tsa tsoꞌo ti chcuiꞌ ma̱ loꞌo yu biꞌ. Loꞌo juaꞌa̱ tii ti tiꞌ ma̱ tyiꞌi̱ ycuiꞌ ca ma̱ chaꞌ ná cuaꞌni ma̱ la cuiꞌ chaꞌ cuxi ñiꞌya̱ nu nguaꞌni yu biꞌ. 2 Cuaꞌni ma̱ chaꞌ stuꞌba ti caca tyiquee ma̱ loꞌo tyaꞌa ma̱, chaꞌ caca xtyucua ma̱ jiꞌi̱ nguꞌ loꞌo sca chaꞌ nu ntsuꞌu jiꞌi̱ nguꞌ, chaꞌ ná cuaꞌni nguꞌ sca chaꞌ cuxi. Juaꞌa̱ taca taquiyaꞌ tsoꞌo na lcaa cña nu nda Cristo chaꞌ cuaꞌni na.

3 Na ñiloꞌo ti na jiꞌi̱ ycuiꞌ ca na si culacua tiꞌ na chaꞌ tsoꞌo tsa laca na cuentya jiꞌi̱ ycuiꞌ Ndyosi; tsoꞌo la si ta na cuentya chaꞌ ná sca na laca na cuentya jiꞌi̱ ycuiꞌ Ni. 4 Ntsuꞌu chaꞌ cuiꞌya na cuentya ñiꞌya̱ nu ndiꞌi̱ scaa na chalyuu. Si chañi chaꞌ tsoꞌo tsa nduꞌni na, chaꞌ jiꞌi̱ ycuiꞌ na laca chaꞌ biꞌ; ná ntsuꞌu chaꞌ cuaꞌni tyucuaa tiꞌ na loꞌo xaꞌ la ñati̱. 5 Ngaꞌa̱ chaꞌ talo na jiꞌi̱ cña jiꞌna, lcaa chaꞌ nu ndyacua jiꞌna chalyuu.

6 Lcaa tyaꞌa na nu ndyaca tsaꞌa̱ na chaꞌ tsoꞌo nu cua nda Cristo biꞌ, ntsuꞌu chaꞌ ta na xi chaꞌ tsoꞌo nu ntsuꞌu jiꞌna chaꞌ caja cua ñaꞌa̱ ca na nu tyiji̱ yuꞌu jiꞌi̱ mstru nu nguluꞌu chaꞌ tsoꞌo biꞌ jiꞌna.

7 Ná culacua tiꞌ ma̱ chaꞌ caca cñiloꞌo na jiꞌi̱ ycuiꞌ Ndyosi. Ná tucui caca jiꞌi̱ cuaꞌni juaꞌa̱, chaꞌ ñiꞌya̱ nu ndyuꞌni sa scaa na chalyuu, juaꞌa̱ tyacua chaꞌ jiꞌna tiyaꞌ la nde slo ycuiꞌ Ndyosi. Ñiꞌya̱ ntiꞌ loꞌo cataa na sca siꞌyu ni, chaꞌ la cuiꞌ siꞌyu nu ndyataa na, nde loo la la cuiꞌ biꞌ tyuꞌu lo na nu ndyataa na, siꞌi xaꞌ lo siꞌyu; 8 juaꞌa̱ laca ñati̱ na loꞌo ndiꞌi̱ na chalyuu, chaꞌ loꞌo cuaꞌni na cua ñaꞌa̱ ca chaꞌ cuxi nu ndiya tiꞌ na chaꞌ cuaꞌni na, ná sca chaꞌ tsoꞌo tyacua jiꞌna nu loꞌo cua ndye chalyuu. Tsa lo cua ti chaꞌ, ntsuꞌu chaꞌ cajaa na, loꞌo juaꞌa̱ ti culiji yuꞌu ti lcaa chaꞌ tsoꞌo nu ntsuꞌu jiꞌna. Pana si cuaꞌni na lcaa ñaꞌa̱ cña nu ntiꞌ Xtyiꞌi ycuiꞌ Ndyosi chaꞌ cuaꞌni na, tsoꞌo tsa tyuꞌu chaꞌ jiꞌna liꞌ; caja chalyuu nu ná ngaꞌa̱ chaꞌ tye jiꞌna. Talo ycuiꞌ ca na liꞌ, ná tye cña jiꞌna juaꞌa̱ ti. 9 Biꞌ chaꞌ ná tsoꞌo si ca taja tiꞌ na chaꞌ cuaꞌni na chaꞌ tsoꞌo laja loꞌo ndiꞌi̱ na chalyuu. Loꞌo tyalaa hora biꞌ, liꞌ tyuꞌu tucua chaꞌ tsoꞌo nu nacui̱ Ni chaꞌ tyacua jiꞌna nde loo la, la cuiꞌ chaꞌ nu tyiqueeꞌ tsa ngujuatya na jiꞌi̱; pana ntsuꞌu chaꞌ talo na, chaꞌ ná ca taja tiꞌ na nduꞌni na cña tsoꞌo. 10 Biꞌ chaꞌ tsoꞌo si lcaa quiyaꞌ loꞌo ñaꞌa̱ na ñiꞌya̱ caca xtyucua na jiꞌi̱ cua ñaꞌa̱ ca ñati̱, liꞌ cuaꞌni clya na chaꞌ xtyucua na jiꞌi̱ nguꞌ biꞌ. Clyo nduꞌni chaꞌ xtyucua na jiꞌi̱ tyaꞌa na, nu nguꞌ nu ntsuꞌu chaꞌ jiꞌi̱ loꞌo Cristo.

11 Loꞌo juani scua ycuiꞌ ca ti naꞌ tucua sna tya siꞌyu chaꞌ lo quityi re. Tyaca̱ꞌ chaꞌ tonu letra nscua naꞌ. 12 Nu ñati̱ nu ndatsaa tsa jiꞌi̱ ma̱ chaꞌ siꞌyu quiji̱ ma̱ ñiꞌya̱ nu nduꞌni nguꞌ judío chaꞌ culacua̱ nguꞌ ni, nduꞌni nguꞌ juaꞌa̱ chaꞌ ntiꞌ nguꞌ chaꞌ caca stuꞌba chaꞌ jiꞌi̱ ycuiꞌ nguꞌ loꞌo tyaꞌa nguꞌ judío; liꞌ ná cuaꞌni lyaꞌ tiꞌ tyaꞌa nguꞌ judío jiꞌi̱ nguꞌ biꞌ si ngusñi nguꞌ chaꞌ jiꞌi̱ Jesucristo nu ngujuii lo crusi, ntiꞌ nguꞌ. 13 Loꞌo ycuiꞌ nguꞌ nu cua ngulacua̱ nguꞌ juaꞌa̱ ni, ná ndaquiyaꞌ nguꞌ jiꞌi̱ lcaa ca cña nu nscua lo chaꞌ cusuꞌ chaꞌ cuaꞌni na biꞌ. Tsa biꞌ ti chaꞌ ntiꞌ nguꞌ, chaꞌ caja ñiꞌya̱ nu chcuiꞌ nguꞌ chaꞌ tyixi loꞌo tyaꞌa nguꞌ: Cua ngulacua̱ nguꞌ jua xquiꞌya ycuiꞌ ya, ñacui̱ nguꞌ jiꞌi̱ tyaꞌa nguꞌ liꞌ. 14 Pana nu naꞌ ni, sca ti chaꞌ tsoꞌo ntsuꞌu chalyuu ntiꞌ naꞌ, chaꞌ nu ngujuii ycuiꞌ Jesucristo nu Xuꞌna na lo crusi cuentya jiꞌna; biꞌ chaꞌ ngaꞌaa ntiꞌ naꞌ ta naꞌ xaꞌ la chaꞌ loꞌo ñati̱. Loꞌo juaꞌa̱ xquiꞌya chaꞌ ngujuii ycuiꞌ Cristo, ngaꞌaa caca tatsaa nu cuxi nu ntsuꞌu chalyuu jnaꞌ, chaꞌ ngaꞌaa ntsuꞌu chaꞌ jnaꞌ loꞌo chaꞌ cuxi nu ntsuꞌu chalyuu juani. 15 Nu loꞌo stuꞌba ntsuꞌu chaꞌ jiꞌna loꞌo Jesucristo, ná nduꞌni chaꞌ masi ngulacua̱ na, masi ná ngulacua̱ na, sca ti cuayáꞌ laca na. Sca ti chaꞌ nu ndulo la jiꞌna juani, chaꞌ xcutsaꞌa̱ Ni tsiyaꞌ ti lcaa chaꞌ nu nduꞌni na loꞌo ndiꞌi̱ na chalyuu, chaꞌ xcuiꞌ chaꞌ tsoꞌo cuaꞌni na liꞌ. 16 Lcaa ñati̱ nu nduꞌni juaꞌa̱ xquiꞌya Jesús laja loꞌo ndiꞌi̱ nguꞌ chalyuu, taca tyiꞌi̱ tyiquee nguꞌ ti̱ ti liꞌ, loꞌo juaꞌa̱ cuaꞌni tyaꞌna tiꞌ ycuiꞌ Ndyosi jiꞌi̱ nguꞌ biꞌ liꞌ; juaꞌa̱ cuaꞌni Ni loꞌo lcaa na nu chañi chaꞌ laca na ñati̱ jiꞌi̱ Ni.

17 Tya tsubiꞌ la, tlyu tsa cña nda ma̱ ꞌna, chaꞌ ná ndaquiyaꞌ ma̱ jiꞌi̱ chaꞌ nu nchcuiꞌ naꞌ loꞌo ma̱; biꞌ chaꞌ juani ngaꞌaa cuaꞌni ma̱ chaꞌ cusu̱u̱ loꞌo naꞌ chaca quiyaꞌ. Cua ntsuꞌu cuayáꞌ nu nscua lo cuañaꞌ naꞌ, biꞌ laca cuayáꞌ su nguxcubeꞌ nguꞌ ꞌna xquiꞌya chaꞌ ndyuꞌni naꞌ cña jiꞌi̱ Jesús.

18 Cuꞌma̱ tyaꞌa ngusñi na chaꞌ jiꞌi̱ ycuiꞌ Ndyosi, lcaa hora tyiꞌu tiꞌ ma̱ jiꞌi̱ ycuiꞌ Jesucristo nu Xuꞌna na, chaꞌ xcuiꞌ tsoꞌo ti nduꞌni Ni loꞌo ma̱. Loꞌo juaꞌa̱ chañi tsa chaꞌ caca chaꞌ biꞌ.