16
Ismairo nasitërinso'
1 Sarai co hua'huana'pihuë ni'ton, co Apran hui'nahuaninhuë'. Napoaponahuë', Saraiso a'nara cosonanën ya'huëtërin. Inaso iquipitoron. Acara itopi. 2 A'na tahuëri Saraiso', so'in itapon:
—Ni'quëchi, Sinioro co nohuantërinhuë ni'ton, co hua'huanahuë'. Napoaponahuë', cosonanëhuë acoanchinquën topirahuë. Tapona inaso', hua'huana'pi nisápirinhuë'. Hua'huanpachin cari masarahuë hua'huahuë pochachin nicacaso marë', itërin.
Napotohuachina, Apranta nohuantërin. 3 Naporo chachin Saraiso', Acara masahuaton, so'in acoantërin. Nani shonca pi'ipi Canaan parti ya'huapona pochin, napoapi. 4 Shiarahuaton Acaraso', cayorin huachi. Inaporahuaton, hua'anën nocanin. Nocanaton, co yanatërinhuë'. 5 Naporo' Sarairi Apran itapon:
—Quëma tëhuëran ni'ton, Acara nocaninco. Cari chachin acoantopiranquënhuë', iporaso' hua'huanaton, nocaninco huachi. Sinioro chachin inquënposona tëhuërëso' anitochinpo': Quëma tëhuëmaranquën, ca a'na napomaraco, itërin. 6 Napotohuachina, Apraniso' itapon:
—Ni'quë', cosonanënso', natëinquënso ya'huërin. Ma'sona nohuantëranso' nitëquë', itërin.
Naporo quëran huarë' Saraiso', Acara pa'pi aparisitërin. Napoaton, inaso ta'arin huachi. 7 Ta'apirinhuë', Sinioro anquëninëni* Sinioro anquëninën topachina: Yosë chachin tapon naporin. inotëro parti quënanin. Shor iraquë i'sha pipirinso' ya'cari', quënanin. 8 Quënanahuaton, natanin:
—Quëmaso' Acaranquën, nohuitëranquën. Sarai cosonanënquën. ¿Intoparanta huëcaton, intopata pa'saran? itërin.
—Patronanëhuë Sarai itopiso' ta'ananpiarahuë, tënin Acara. 9 Naporo' Sinioro anquëninëni, itapon:
—Naquëranchin patronanën paapantaquë'. Ma'sona camairinquënsopita, natëquë', itërin. 10 Napotahuaton itaantarin:
“Ca nohuanto, hua'huayátërahuë amiparinpita ya'huëtarinquën.
Co pichicasohuë' na'apona'.
11 Ipora cayoranso', quëmapia'huaya huaiyaran.
Huaihuatan, Ismairo itëquë'.
Co napion ancantaton na'nëranso',
Sinioro nataninquën ni'ton, ina nininën acotëquë'.
12 Mashotohuachin, tanan cahuario pa'pi notëraya pochin nisarin.
Ya'ipiya inimicotarin. Inanta', ya'ipiya quëran, inimicotapona'.
Quëmopinënpitari co quë'yapirinahuë',
inahua notënanquë chachin ya'huapon,” itërin.
13 Siniorori nontërin ni'ton, Acaraso' pa'yanënquë tapon: “¿Yosë chachin nontaporahuë co chiminahuë ti?” tënin. Ina yonquiaton, iso pochin Sinioro nohuitërin: “Nicatonco, catahuarincoso Yosë,” itërin. 14 Napoaton inaquë poso ya'huërinsonta', “Nanpiton, ni'sárincoso' posonën,” itopi. Ina pososo', Catisë ninano', Piriti ninano', inapita ninanoro'sari ahuancanapirin. 15-16 Acaraso' anquëni natërahuaton, patronanënquë chachin paantarin. Tahuëri nanihuachina huairin. Apran posa shonca saota pi'ipitaso', hui'nin nasitarin. Nasitohuachina, Ismairo itërin.