JOHANA
Yuk Thangkdaw
Pyenhlüma
Ahina Johana Yuk Thangkdaw üng Johan naw Jesuh cun khyanga kba law lü mi ksunga khyanga kba xüng lawki, angsäi xüngki Pamhnama Ngthu ni ti lü pyenkia kyaki. Jesuh cun Pamhnam naw bekhüt a jah peta mäiha jah küikyan khaia Pamhnama Capa ni tia ca khekie naw ami jumnak vaia yuka kyaki. Acunkäna ani jum nakütki cun naw angsäi xünnak yah khai, tia mawng pi a yuk hmuha kyaki (20:31).
Angsäia xüngki Pamhnama Ngthu Jesuha mawng akcüka a pyen käna, Jesuh cun jah küikyankia Bawipa, Pamhnama Capa tia ngdangsaki müncankseea mawng a yuk hmuha kyaki. Acunkäna a pyene cun müncanksee üng jah mtheh ngkhaiki. Khyang he naw Jesuh ami jum law ja a hnukläkea ami thawn law, ja khyang avang naw ani mah u lü am ami kcangnak hlüa mawng jah mthehki. Akyangkdäm 13-17 naw Jesuh ja axüisaw he, Jesuh ami man law vaia mü üng ami awmih, ngcüngceinaka ngthue, ami taih law vaia mü üng axüisaw he a jah mcuhmcäia mawnge cun mi jah hmuhki. Akpäihnaka kyange naw Jesuh ami man, ami kcükcet, ami hnimnak ja a thawhnak be, a thawh be käna axüisaw he veia a ngdang hünake jah mthehki.
Kpami am bäühma ni se ami mana nghnumia mawng cun (8:1-11) bracketa k’uma ami tak. Isenitiüng, avang naw yuksih u se, a na yuk makie avang naw ami hawihin.
Johan naw Khritaw üngkhyüh yaha angsäia xünnak letsawng cun atuh hin cutei päng lü; Jesuh cun lam, ngthungtak ja xünnak ni ti lü doeiki naküta khana acuna letsawng cun a pha law vaia mawng aktunga yuki. Thangkdaw Johana hngalangnak ta; amhnüp tä mi jah hmuhtheh summange: tui, buh, akvai, toksäm ja a toe, capyit nghjung ja a ktheihe cun jah sumei lü ngmüimkhya lama a jah mtheimthangnakea kyaki.
Amawng Ktawie
Pyenhlüma (1:1-18)
Baptican Johan ja Jesuha axüisaw kcüke (1:19-51)
Khyang hea ksunga Jesuha khut pawh (2:1—12:50)
Akpäihnaka khawmhnüp üng Jerusalema pipei ja Jerusalema k'um (13:1—19:42)
Bawipa thawhnak be ja a ngdang hünak (20:1-31)
Akpäihnak: Kalilea a ngdangnak betü (21:1-25)
1
Ngthu cun nghngicima ngtüi lawki
1 Akcük ma säiha Ngthu a na veki; Ngthu cun Mhnam am atänga veki, Ngthu cun Mhnama kyaki. 2 Ngthu cun akcük ma säih üngkhyüh Mhnam am a na veki. 3 Ahmäi naküt ani üngkhyüh Pamhnam naw a mhnüna kyaki; mhnünmceng naküt üng ani am ngpüikia mhnün i pi am ve. 4 Ngthu cun xünnaka phungnua kyaki; acuna xünnak naw khyangea vei akvai lawpüiki. 5 Akvai cun anghmüpnaka vai law se, nghmüp naw am näng mkhüt.
6 1:6 1:6Mt 3:1; Mk 1:4; Lk 3:1,2Pamhnam naw a ngsä mat a tüih law, a ngming cun Johana kyaki. 7 Ani naw khyangea veia akvaia mawng cun pyen se, khyange naw ngja u lü ami jumei law vai ua phäha kyaki. 8 Amät cun akvai am ni, akvaia mawng pyen khaia lawki. 9 Ani cun akvai kcang, khawmdek khana law lü khyang naküta khana vaiki.
10 Ngthu cun khawmdek khana veki, khawmdek cun ani üngkhyüh mhnünmcenga kyaki. Acunsepi khawmdek naw ani am ksing. 11 Amäta khyangea veia lawki. Acunsepi, amäta khyange naw am dokhamei u. 12 Acunsepi, avang naw doei lü jumei u se, Pamhnama caea thawn theinak a jah pet. 13 Acun he cun nghngicima mtisa thithaü üngkhyüh cawmbei lawkie am ni. Khyanga pasang üngka naw ngtüi lawkie pi am ni u, amimia pa ta Pamhnam ni.
14 Ngthu cun nghngicima ngtüi lawki; bäkhäknak ja ngthungtak am be lü mi ksunga veki. Paa ca mat däka hlüngtainaka kba, a hlüngtainak cun mi hmuhki.
15 Johan naw ania mawng a pyen ta, ‘Ka pyen khawi cen ani ni, “Ani cun ka hnua law kyaw sepi ka maa a na ve pängki ni” a ti.
16 Kümceikia ania bäkhäknak am dawkyanaka thea dawkyanak mi van naw mi yahki. 17 Thum cun Mosia kut üngkhyüh Pamhnam naw a jah peta kyaki. Acunsepi, bäkhäknak ja ngthungtak ta Jesuh Khritaw üngkhyüh a jah peta kyaki. 18 U naw pi Pamhnam am hmuh khawi. Pamhnam am täng lü, Paa peia veki, a Capa mat däk naw paa mawng jah ksingsak pängki.
Baptican Johana ngthu pyen
(Mt 3:1-12; Mk 1:1-8; Lk 3:1-18)
19 Jerusalema veki Judah ngvaie naw, “Nang u ni?” ti lü, kthäh acun hea ktaiyü he ja Levihe Johana veia ami jah tüih.
20 Johan naw käh mjih lü, “Kei Mesijah am ni ngü,” ti lü a jah msang.
21 1:21 Mal 4:5Amimi naw, “Nang u ni? Nang Elijah aw?” ti lü ami kthäh.
Johan naw, “Am ni ngü” a ti.
“Nang Sahma aw?” ami ti.
Johan naw, “Am ni ngü” ti lü, a jah msang.
22 Amimi naw, “Acunüng nang u ni, jah mtheha? jah tüih lawkie kami jah mthehnak be vai ami ti. Namäta mawng hin ihawkba na pyenki ni?” ti lü ami kthäh betü u.
23 1:23 Hesa 40:3Johan naw, “Sahma Hesajah naw a pyena mäiha,
‘Bawipaa lawnak vai lam ngsungsak u,’ ti lü
khawmkyanga ngpyangki kthaia ka kyaki ni,” a ti.
24 Pharisee naw ami jah tüiha khyange cun naw, 25 “Mesijah am ni, Elijah am ni, sahmaa pi am na ni üng, ise Baptican na jah peki ni?” ti u lü ami kthäh betü u.
26 Johan naw, “Kei naw tui am Baptican ka jah pe khawiki, nami ksunga khyang mat am nami ksing ngdüiki. 27 Ani cun ka hnua law sepi, a khawdawk yüi suh pet khaia pi am nglawi ngü” ti lü, a jah msang.
28 Ahin avan cun Johan naw baptican a jah petnaka hnün Jordan mliktui pei Bethaniha thawnhlawkia kyaki.
Pamhnama Toca
29 Angawi üng Johan naw Jesuh a veia law se hmuh lü, “Khawmdeka mkhyekatnak cehpüiki Pamhnama Toca teng u! 30 Acan ni, ‘Keia kthaka dämduh bawki, ka hnua lawki kyaw, cunüngpi ka maa a na ve päng kungki ni,’ ka ti cen ani ni. 31 Akcüka ani am ksing ngü, cunsepi, Isarele naw ani ami ksing law vaia, kei naw law lü tui am Baptican ka jah peki,” a ti.
32 Johan naw a mawng pyen lü, “Ngmüimkhya cun müma mäiha khankhaw üngka naw kyum law lü a khana ngawki ka hmuh. 33 “Akcüka ta ani ni ti am ksing ngü. Cunsepi, tui am Baptican ka jah pe khaia na tüih lawki Pamhnam naw, ‘Ngmüimkhya a khana kyum law lü a ngawhnaka khyang na hmuh üng, ani cun Ngmüimkhya Ngcim am Baptican jah pe khaia Khyang ni’ ti lü a na mtheh. 34 Johan naw “Ani ka hmuh pängki, ani Pamhnama Capaa kyaki tia ka ning jah mthehki,” a ti.
Jesuha xüisaw kcüke
35 Angawi betü üng, Johan naw axüisaw xawi nghngih am ngdüi lü, 36 Jesuh law se hmuh lü, “Acan ni Pamhnama Toca,” a ti.
37 Axüisaw xawi naw a pyen ngja ni lü, Jesuh läki xawi. 38 Jesuh naw ani veia nghlat lü läk law ni se a jah hmuh üng, “I nani suiki” ti lü, a jah kthäh.
Anini naw, ‘Rabbi (Saja tinak), hawia na veki?” ani ti.
39 Jesuh naw, “Law ni lü nani hmuh khai,” a ti. Cit ni lü a venak ani hmuh, acuna mhnüp cun a hlawnga veeiki xawi; acun cun mülama (Naji kphyü bang) kyaki.
40 Johana ngthu pyen ngja ni lü, Jesuh läki nghngih üngka mat cun Sihmon Pita a na Andrua kyaki. 41 Andru naw akcüka a be Sihmon hmuh lü, “Mesijah hmuh ve ung” ti lü, a mtheh (Mesijah ti cun Khritaw tinak ni). 42 Acunüng, Sihmon cun Jesuha veia a lawpüi.
Jesuh naw teng lü, “Nang hin Johana capa Sihmon na ngmingnaki, Kephaa ning sui khaie,” a ti (Acun cun Pita üng täng lü, “Lung” tinaka kyaki).
Philip ja Natanelah Jesuh naw a jah khünak
43 Angawi üng Jesuh Kalile khawa cit khaia a ngtün üng, Philip hmuh lü, “Na läk lawa” a ti. ( 44 Philip cun Bethsaida mlüha kaa kyaki, acun cun Andru ja Pitaa ani venaka mlüha kyaki.) 45 Philip naw Natanelah hmuh lü, “Mosi naw ania mawng Thum üng a yuk, sahma he naw pi a mawng ami yuk, Nazaret üngka, Josepa capa Jesuh, kami hmuhkie” ti lü a mtheh.
46 Natanelah naw, “Nazaret mlüha cimvaiki ve khai aw?” a ti.
Philip naw, “Law lü, teng lawa” a ti be.
47 Jesuh naw, Natanelah a veia law se hmuh lü, “A mkhyenak lang am vekia Isarel khyang kcang, teng ua” ti lü, a pyen.
48 Natanelah naw, “Nang naw ihawkba na na ksing ni?” a ti.
Jesuh naw, “Philip naw am a ning khü ham lü, Fikdung phunga na ve üng ka ning hmuh päng ni” a ti be.
49 Natanelah naw, “Rabbi, nang Pamhnama Capa ni, Isarelea Sangpuxanga pi kya veki,” a ti.
50 Jesuh naw, “Fikdung phunga na ve üng ka ning hmuh päng ni’ ka tia phäha na na kcangnaki aw? Ahina kthaka dämduh bawki na hmuh law khai,” a ti. 51 1:51 Gen 28:12Jesuh bä naw, “Akcanga ka ning jah mthehki. Tuha khankhaw nghmawng lü Pamhnama khankhawngsäe Khyanga Capaa khana ju kyum jeng kai u se nami jah hmuh law khai,” a ti.