ROMAHEA
Veia Pawluha Cayuk
Pyenhlüma
Romah cauk cun Pawluh naw Romaha veki sangcim veia a cehnak vaia mawng a yuka kyaki. Ania ngaih ta jumeikiea ksunga khut bi lü, Spain da cehnak üng jumeikie naw ami kpüi vaia phäha kyaki. Ania ksing Khritjan jumeinak ja akcanga Khritjan vecawh ning a yuka kyaki. Romah cauk üng Pawluha pyen hlü ktung avan cun veki.
Romaha veki sangcim jah hnukset päng lü a jah ktaiyü peta mawng cun a jah mtheha ca a yuk üng aktung bawk ta “Thangkdaw cun naw ihawkba Pamhnam naw khyange amät üng a jah ngsunpyunsak, acun hin akcük üngkhyüh apäihnak cäpa jumnak üng kyaki” (1.17).
Pawluh naw a yuka mawng a mdäm law. Khyang nghngicim avan, Judahe ja khyangmjükcee avan, Pamhnam üng ngsungpyun vai hlüki, isetiüngta khyang avan cun mkhyekatnak k'uma vea phäha kyaki. Jesuh jumnak phäha khyang cun Pamhnam naw amät üng ngsungpyunnak a jah pet. Pawluh naw a yuk be tü cun Khritaw am xüngnak kthai cun naw Pamhnam üng akthaia jah phungeisaki. Jumeikie cun Pamhnam üng dimyenak ja Pamhnama Ngmüimkhya ngcim a mkhyekatnak ja thihnak üng lätnak jah peki. Akyang kdäm 5-8 üng Pawluh naw a yuk cun Pamhnama thum ja mkhyangcima johit cun jumeikiea xünnak üng veki tia pyenki. Acun päng lü khyang avana phäha Pamhnama nümyannak üng ihawkba Judahea ja Khyangmjükcea phäh pi kyaki ni ti cun pyenki. Judahe naw Jesuh am ami doei cun khyang avan Pamhnama bäkhäknak k'uma pha law khaie Pamhnama mlungaih ja Judahe naw Jesuh cun dokhamei khaie ti cun ami juma kyaki. Ihawkba Khritjan ngneingnawng üng xün vai, aktunga jawngengnak üng püipaw am vecawh vai ti cun apäihnaka Pawluh naw yuki. Pamhnama phäh ihawkba bilawh vai, mat ja mat Khritjan ning üng vecawh vai ja mät ja mät ksingeinak ngthähnake Pawluh naw yuki. Kca a yuk cun amäta ngthu ja Pamhnam mhlünmtainak ngthu üng päihsaki.
Amawng Ktawie
Pyenhlüma ja luyüi (1:1-17)
Khyang üng hlükia küikyannak (1:18—3:20)
Pamhnama küikyannaka tuilam (3:21—4:25)
Khritaw am xünnak kthai (5:1—8:39)
Pamhnama nüm’yannak k'uma Isarele (9:1—11:36)
Khritjan vecawh ning (12:1—15:13)
Apäihnak ja Pawluha ümhlamnak (15:14—16:27)
1
1 Jesuh Khritawa mpya ja ngsä vaia khü, Pamhnama thangkdaw sang khaia xüa Pawluh üngkhyüh ni.
2 Cangcim üng ang’yuka kba thangkdaw cun ajana Pamhnam naw sahmae veia khyütam a jah peta kyaki. 3 Pumsa lama Davita mjü üngkhyüh hmi lawki, a capa, 4 mi Bawipa Jesuh Khritawa mawng, thihnak üngkhyüh a thawhnak be cun naw a johit dämduhki Pamhnama Cakpa üngka ngcimcaihnak mdanki. 5 Ani üngka Pamhnam naw kei cun Jesuha phäha ngsäa kya lü khyangmjü avan naw jum lü kcangnak vaia lam jah msüm khaia kcün kdaw a na peta kyaki. 6 Ahin cun nangmi Romahe Pamhnam naw Jesuh Khritaw üng a ning jah ka vaia a ning jah khüa kyaki ni.
7 Romah mlüh üng Pa Pamhnama mhläkphyanak ja, ngcimcaih khaia jah khüe naküta veia:
Mi Pamhnam ja Bawipa Jesuh Khritawa veia ka bäkhäknak ja dim’yenak be se.
Jenak mtheh lü ktaiyünak
8 Nami jumnak khawmdek avan üng ngthang hükia kyase, nangmia phäha, Jesuh Khritawa ngming üng akcüka, Pamhnam ka jenaki.
9 Nami phäha angläta ka ktaiyüki, a Cakpaa thangkdaw sangkhap lü, a khut ka mlungkyawng avan am ka bi hin ka juma Pamhnam cun saksi ni. 10 Pamhnam naw a hlükawei ta nami veia ka lawnak hlawt vaia ngläta ka ktaiyüki. 11 Aktäa ning jah hmu hlü veng. Isetiakyaküng nami khängceknak vaia ngmüimkhya dawkyanak ka ning jah teyet hlüa phäh ni. 12 Ka ti hlü ta, nami jumnak ja ka jumnak am ngjuktha mi ngpetei vai ka ti hlünaka kyaki ni.
13 Ka püie, nami veia ka law vaia ka ngtün üngpi am ka law vaia na khamki veki ni. Khyangmjükcee ami ngthunghlaia kba, nangmi pi nami ngthunghlai vaia ka hlüeia kyaki. 14 Kei hin Krike ja khyang kceea pi kyase, khyang ngmawnge ja akthemea pi kyase; khyangmjü naküta phäha ka mta veki. 15 Acunakyase, Romaha nami vekiea veia pi thangkdaw pyen khaia ka yüki ni.
Thangkdawa johit
16 1:16: Mk 8:38Thangkdaw cun Pamhnama johita kyase jumeikie naküta phäh küikyannaka kyaki tia ka üpeiki. Akcüka Judahe phäha kya lü, acunkäna khyangmjükceea phäha kyaki tia ksing lü thangkdaw cun kei naw am hmaisetei na veng.
17 1:17: Heb 2:4Thangkdaw cun ngdang lü ihawkba Pamhnam naw amät am jah ngsungpyunsaki ti cun jumeinak üng ni tüneinak üngkhyüh akpäihnak vei cäpa a kyak ve. Cangcim naw a pyena akba, “A jumnaka phäh Pamhnam naw a angsungpyunsaka khyang cun xüng khai.”* 1:17 jumeinak üngkhyüh Pamhnam üng ngsungpyunnak yahki cun xüng khai, am ani üng jumeinak üngkhyüh Pamhnam üng ngsunpyunsak xüng khai.
Nghngicima mkhyekatnak
18 Ngthu kcang ksingnak vai jah sungkhamkie khyang ksee jah mkhyenakea phäh Pamhnama mlungsonak cun khankhaw üngkhyüh ngdang lawki. 19 Isetiakyaküng, Pamhnam naw mkhyekatnak thungki, isetiakyaküng, amimi naw Pamhnam ami ksing vai jäki ni. Pamhnam amät kung naw a jäsak ni. 20 Pamhnam naw khawmdek a tüipyan üng am hmuh theia a khyaihnak, angsäia johit ja Pamhnama a kyaknak cun a tüipyange üng ngsingteeiki ni. Acunakyase, acuna khyange naw ami lätnak vai am pyen thei u. 21 1:21: Eph 4:17,18Pamhnam ksing u lü pi am mhlünmtai u; jenak pi am pyen u; am ngtähkia cungai u se, ami mlungkyawng axawn cun nghmüp am beki. 22 Akthemea ngaieikie cunsepi angkie, 23 1:23: Deut 4:16-18Am thi theikia Pamhnam cun am hjawhkhah u lü, Pamhnama nghnün üng thi theikia nghngicime, khae, khisae ja mcea ngvak hükiea mäih juktuh pyang u lü sawhkhahkie.
24 Acunakyase, Pamhnam naw ami mlung hlüa aksekhyue ja ngkekhyakeinak cun mat ja mata khana bilawh vaia a jah pet. 25 Pamhnama ngthu kcang cun hleihlaka nglatsak u lü, mhnünmcengki jum vaia hnün üng a mhnünmcenga ksai hjawkhah u lü mküimtokie. Mhnünmcengki cun angläta mküimto vai ni. Amen.
26 Isetiakyaküng ahin ami bi cun Pamhnam naw ngkekhyakei phyakia hüipawmnak a jah peta phäha ni. Nghnumie naw pi nglawi khaia venak vaia ami ngtüipüi cun am nglawi khaia nglat lü vecawhnakie. 27 Kpami he naw pi nghnumi nglawikia ami ihawm püi vai cun hawih u lü, am dawkia hüipawmnaka mlungmthin am kpami ja kpami am nglawi khaia ipawm u lü, acuna phäh mkhuimkhanak amimät naw amimäta khana pha law khaia bilokie.
28 Acunüng, Pamhnam ami ksing vai am ngaikiea kyase, am nglawiki pawh khaiea, am dawkia mlungmthin ta khaiea, Pamhnam naw jah hawihin se, 29 am ngsungpyunnak, mkhyekatnak, kamvanak, ngneingnawng am dawnak naküt am be lawki he; khyang hnimnak, ngvawknak, hleihlaknak, am dawkia vecawhnak am be u lü; am dawkia khyang pyeneikie, 30 khyang am mpyeneikia khyange, † 1:30 leisawngnak am taki cun Pamhnam naw cawkeiki; am ani üng Pamhnam naw cawkeiki, lü leisawngnak am taki. Pamhnam hnengkia khyange, khyang mlungso, kyäp säihkia ngaikia khyange, awcahkia khyange, mkhyekatnak akthai mtüikia khyange, nupaa pyen am cungaikia khyange, 31 mät naw mät ksingnak am takia khyange, ami pyena kba am vekie, mhläkphyanak am ngtüipüikia khyange, mpyeneinak am takia khyanga kya lawki he; 32 acuna ngkhaw jah pawhmsahkie naküt cun, thi khai kunga kyaki ni tia Pamhnama thuma pyen cun ksingkie. Amimät däka am kyase, khyang kce acukba pawhmsah khawikiea khana pi aktäa jekie.
1:16 1:16: Mk 8:38
1:17 1:17: Heb 2:4
*1:17 1:17 jumeinak üngkhyüh Pamhnam üng ngsungpyunnak yahki cun xüng khai, am ani üng jumeinak üngkhyüh Pamhnam üng ngsunpyunsak xüng khai.
1:21 1:21: Eph 4:17,18
1:23 1:23: Deut 4:16-18
†1:30 1:30 leisawngnak am taki cun Pamhnam naw cawkeiki; am ani üng Pamhnam naw cawkeiki, lü leisawngnak am taki.