1  Misurtui tah hmuiyoi la om tih yu long khaw hue a sak. Te dongah anih loh a palang sak hlang boeih tah cueih voel pawh. 2  Manghai kah a mueirhih tah sathueng kah a kawk bangla om tih, anih aka paan ngawn tah a hinglu ni a phai coeng. 3  Tuituknah lamloh aka hoep uh hlang ham thangpomnah la om tih, aka ang boeih long tah tohhaemnah a puek sak. 4  Kolhnaw loh sikca ah pataeng caai voel pawh. Te dongah cangah ah a dawt tah a dawt dae dang voel pawh. 5  Hlang lungbuei kah cilsuep tah tui aka dung bangla om tih, hlang lungcuei loh a dueh. 6  Hlang pilnu amah kah sitlohnah te boeih a doek dae, oltak hlang te u long a hmuh? 7  A thincaknah neh aka cet hlang dueng tah amah hnukah a ca rhoek khaw a yoethen. 8  Manghai tah laitloeknah ngolkhoel dongah ngol tih, boethae boeih te a mik neh a thaek. 9 “Ka lungbuei ka saelh tih ka tholh lamloh ka caihcil,” tila ulong a ti thai. 10  Lungto neh lungto khaw, cangnoek neh cangnoek khaw BOEIPA ham a boktlap la tueilaehkoi ni. 11  A khoboe dongah camoe pataeng khaw loha coeng. A bisai loh cil tih a thuem atah.

12  Hna loh yaak tih mik loh a hmuh he khaw a boktlap la BOEIPA long ni a saii. 13  Ih he lungnah boeh na khodaeng na pang ve. Na mik a tueng daengah ni buh na cung eh. 14 Hno aka lai loh a thae, a thae la a thui tih amah a khawk vaengah tah lat thangthen bal. 15  Sui neh lungvang he khawk mai dae, mingnah hmuilai he tah umponah hnopai bangla kuel. 16  Kholong ham rhi a khang pah vaengkah a himbai neh kholong nu, kholong nu ham a laikoi pah te khaw lo laeh. 17  Laithae buh he hlang hamla tui dae, a hnukah a ka dongah lungcang muep baetawt. 18  Kopoek he cilsuep neh cikngae sak lamtah, caemtloek khaw a niing khueh lah. 19  Baecenol he caemtuh loh a hliphen tih a caeh puei. Te dongah a ka neh aka hloih te rhikhang pah boeh. 20  A manu neh a napa aka hnaep tah a hmaithoi a thih pah vetih, yinthuem kah yinthuem ah hmaisuep la om ni.

21  Rho he khaw a lamhma lah banlak a kawt dae, a hmailong ah a yoethen mahpawh. 22 A thae te, “Ka thuung van ni,” ti nah boeh. BOEIPA mah lamtawn lamtah namah te ng'khang bitni. 23  Coilung neh coilung khaw BOEIPA kah a tueilaehkoi ni. Te dongah hlangthai palat kah cooi tah a then moenih. 24  Hlang kah a khokan he BOEIPA taeng lamkah ni. Te dongah hlang loh a longpuei te metlam a yakming eh?

25  Hmuencim te a cukhat thil tih olcaeng hnukah a hnukdawn te hlang ham hlaeh la om.

26  Manghai aka cueih loh halang rhoek te a thaek tih, amih te lengkho neh a paluet thil. 27  BOEIPA kah hmaithoi long tah hlang kah a hiil neh a bungko kah a khui khaw boeih a thaih. 28  Sitlohnah neh oltak loh manghai te a kueinah tih, sitlohnah loh a ngolkhoel a duel pah. 29  Tongpang rhoek kah a thadueng tah amamih kah a boei a mang la om tih, sampok he khaw patong rhoek kah rhuepomnah ni. 30  Tloh kah a hma a met vanbangla, bungko khui kah hmasoe loh a thae a cing sak.