1 Darius kah a manghainah kum bae dongah tah, Iddo koca tonghma Haggai neh Zekhariah loh Judaea neh Jerusalem kah Judah rhoek hamla a tonghma pah. Amih ham te Israel pathen Boeipa ming nen ni a tonghma pah. 2 Te vaengah amih taengah aka om Boeipa tonghma rhoek kah bomnah rhangneh, Shaeltiel capa Zerubbable neh Jozadak capa Jeshua loh Jerusalem ah Boeih im te sak hamla a tong coeng.

3 Amah tue vaengah Syria neh Phoenicia kah khoboei Sisines khaw, Sathrabuzanes neh a pueipo rhoek khaw amih taengla cet uh tih, 4 “He im he saknah hamla ulong nangmih n'tueih uh tih a imphu neh a tloe rhoek khaw an coeng uh? Im sak rhoek neh hekah hno aka coeng khaw u rhoek nang nim?” a ti na uh. 5 Tedae Judah kah a hamca rhoek long tah amih te boethen nen ni a voem. Tamna rhoek soah Boeipa kah khokhannah khaw om coeng. 6 Amih kawng te Darius teangla ol a pa tih amih kawng a yaak sak hil tah imsak te khaw khang pa ngawn pawh.

7 Syrian neh Phoenician khoboei Sisinners, Sathrabuzanes neh Syiran, Syria neh Phoenican kah tolrhum khoboei rhoek long khaw ca a daek uh tih Darius taengla a pat uh.

8 Manghai Darius te kut kan tuk uh,

Ka boei manghai na mah long khaw boeih ming van laeh. Judaea khohmuen la ka cet uh tih Jerusalem ka ka kun uh vaengah tah, vangsawn ah aka om Judah a ham ca rhoek te tahra ana om uh. 9 Boeipa ham im a thai a le tloe la a sak uh tih, tlung rhaih khaw, thing ten khaw pang bueng dongah a up uh. 10 A pongthohnah khaw taemtaem cet tih, a kut dongah khaw hma a song dongah, rhuepomnah neh ngaithuen la a coeng uh.

11 He kah im sak ham khaw, a impum kah khoengim tloeng ham khaw nangmih te u long m'paek ti a ham ca rhoek te ka dawt uh. 12 Te nen u lae a lu la aka om ti khaw nang taengah kan ka uh mong eh. Amih te ka dawt tih a lu rhoek a ming te khaw boeih ka hoe uh.

13 Amih long ngawn tah, “Kaimih tah vaan neh diklai aka suen Boeipa kah sal ni. 14 Im he khaw yan hlamat daengrhae ah ni Israel manghai aka len koek loh a sak tih a coeng coeng. 15 Tedae a pa rhoek he vaan kah Israel Boeipa taengah tholh uh tih, Boeipa te a veet uh. Te dongah amih te Khalden manghai, Babylon kah manghai Nebukhadnezzar kut dongla a tloeng. 16 Te vaengah im te a phil uh tih a hoeh uh. Pilnam khaw Babylon ah tamna la bat a khuen. 17 Tedae manghai Cyrus he Babylon ah a ngolnah kum khat dongah tah, te im te koep sa saeh tila manghai Cyrus mah loh ca a daek. 18 Nebukhadnezzar loh Jerusalem bawkim lamkah a loh a cim sui neh cak hnopai kaw Cyrus loh koep a mael sak. 19 Olpaeknah neh hnopai boeih te a loh sak tih Jerusalem bawkim ah koep a khueh sak. Te kah hmuen ah tih Boeipa kah im te a sak eh a ti nah. 20 He lamkah loh Sheshbazzar a nong phoeiah tah, Boeipa im kah khoengim te Jerusalem ah a up.

21 Te dongah manghai aw, a cueih la n'saii mai koinih, Babylon kah ka boei manghai kah boei cabu dongah khaw khenah n'khueh mai mako. 22 Jerusalem kah im saknah te manghai Cyrus kah kotlingnah neh a saii te mhmuh tih, ka boei manghai loh a pom oeh atah, he olka bangla uentonah hem kaimih he n'tueih, a ti uh.

23 Te vaengah Darius loh Babylon ah aka om manghai cabu te khenah hamla ol a paek. Te vaengah, Media khohmuen rhalmahim kah Ecbatana ah a hmuh. Te kah cayol a khueh uh dongah a dangkah bangla a daek.

24 Manghai Cyrus kah a manghai kum cuek vaengah ah Jerusalem kah Boeipa im saknah te a paek coeng. Teah tih kumhal kah hmai neh a hlut uh coeng. 25 A sang te dong sawmrhuk, a dang te dong sawmrhuk, pangbueng te khaw a than thum hil te lungrhaih hnonah saeh lamtah a so te tolrhum kah thing thai hnonah saeh. A hnonah boeih te manghai thakvoh khui lamkah te pae saeh. 26 Sui neh cak hnopai boeih khaw, Nebucadnezzar loh Jerusalem bawkim lamkah, Babylon la a khuen rhoek te tah, mael saeh lamtah tah Jerusalem bawkim ah amah hmuen la om saeh,” a ti.

27 Te vaengah Darius loh Sisinnes taengah khaw, Syria neh Phoenicia puei kah khoboei khaw, Shetar Bozenai khaw, a boei hnukvai rhoek taengah khaw, Jerusalem lamloh a hla aka om torhum khoboei rhoek khaw, Zeubbabel khaw, Boeipa kah tueihyoeih neh Judah khoboei khaw, aka pai taengtae Boeipa im a thoh vaengkah Judah mawtkung rhoek khaw ol rhep a paek. 28 Te phoeiah a cong tih, “Te te a coengnah hil sa uh saeh, a coengnah rhi hil, thayung thamal boeih neh vangsawn lamkah aka mael Judah rhoek te bomnah khueh uh. 29 Syria neh Phoenicia puei lamkah mangmu a dang boeih khuikah te, khoboei Zerubbabel taengah pae saeh lamtah, Boeipa taengkah hmueih ham, vaito, tu phu la hnonah saeh. 30 Kum takuem ah khosoih a thuinuet bangla, a hnin takuem kah a ngoe te tah, cang khaw, lungkaeh khaw, misurtui khaw, situi khaw oelh mueh la pae saeh. 31 Te tlam te saii daengah ni, Khohni Pathen taengah misur nawnnah a khueh uh vetih mamih khosaknah dongah a yoethennah om ham a thangthui uh eh.

32 He tlam he ol koep a paek bal tih, “A so kah a daek bangla olpaek a aal tih, vai hamla a hloo atah, amah im lamkah thingpang dongah hoei uh saeh, a koerhang boeih te manghai kah kawn la om saeh. 33 Jerusalem kah Boeipa im phae ham, imsa rhoek kut tomta ham a kut aka thueng boeih tah, namtom khaw, manghai akhaw, Jerusalem ah ming a khue pah Boeipa loh phae van saeh.

34 Kai manghai Darius loh he oltloeknah he a tip la boeih yaksak hamla la kai manghai Darius loh ol ka paek,” a ti.