1 Judas Maccabaeus loh a napa Mattathias kah a hmuen te a loh. 2 A manu ca rhoek neh a napa kah hnukvai mangpa rhoek long khaw anih te a bom. Te dongah Israel caemtloek a mawt te khaw omngaih uh. 3 Judah loh pilnam ham a thangpomnah a len hang khuen, A pumcum nah dongah nih tah pumlen la om, A lungpokhaica a khuen tih caem la cet. A cunghang neh a rhaehhmuen a huul. 4 Anih tah phat aka cu sathueng bangla om. 5 Judah loh olkhueng aka phae te boeih a thup, a pilnam aka hnaemtaek soah hmai a hlup pah. 6 Anih a rhih dongah lailak hlang rhoek khaw a mueipuel, A yong ong te khaw boeih a hmaai uh. Anih kah a saii rhangneh sayalnah te a dang uh. 7 Manghai rhoek khaw ngaihmang khobing la a khueh, Israel pilnam ham tah omngaihnah a khuen pah. A bibi boeih te a yoeyah la koeh uh sih. 8 Judah kho tom ah cet tih, Pathen aka ming mueh hlang te boeih a phae. Israel kah lakueng ngaihmang te a khoe, 9 A mingthang loh diklai khobawt duela a pha, dueknah ham la a phaep rhoek khaw koep a coi.

10 Te vaengah Israel pilnam te muk hamla Apollonius loh Samaria lamloh Gentile rhaengpuei te caempuei la muep a hueh. 11 Te te Judas loh a ming dongah caemtloek la cet tih a rhalkap te a tloek, Apollonius te khaw a ngawn. Gentiles rhoek te a hingnah muep khum tih a tloe rhoek te yong uh. 12 Caemtloek vaengkah kutbuem te a coi uh vaengah Judas loh Apollonius kah cunghang te a loh tih a duen hnin hi caemtloek vaengah a hnonah.

13 Judas loh a rhalkap a coi nih hlang tang rhoihui a khueh te khaw, amih loh anih kah mawtnah hmuiah vathoh ham a sikim uh te khaw, Syria caem kah rhalboei Seron loh a ming. 14 Te dongah Seron amah te, Judas neh a hlang rhoek te ka hlak vetih ram pum ah kamah ham mingthennah ka sai ni, u long khaw ram kah opaek a ngai voel moenih,” a ti. 15 Te dongah Judas te hlang a hueh thil coeng, Pathen aka ming mueh rhoek khaw, anih aka bom tih Israel soah tawnloh aka ngaih rhoek khaw anih taengla kibaeng uh.

16 Beth Horon a poeng vaengah, Judas tah amih te mah hamla a rhoihui hlang a yol neh cet uh. 17 Amih taengla caem a caeh te Judas kah hlang rhoek loh a hmuh vaengah, “Mah rhoihui hlang a yol loh ke yet ke metla n'tloek eh? hnin at puet caak n'ca pawt tih, m'bong coeng ta,” a ti uh. 18 Tedae Judah loh, “A rhaisang aih moenih, rhoihui a yol loh muep aka yet khaw a ta. Pilnam hlawtnah ham he Boeipa taengah tah a yol a yet khaw a tloe moenih. 19 Caemtloek tanah he rhalkap a yet dongah a om moenih. Boeipa kah thaomnah uepnah dong lamkah ni a thoeng. 20 Mamih kah thunkha rhoek he huk ha cu uh coeng. Mamih kah khueh tawn neh, huta camoe te poelyoe ham cai uh. 21 Tedae mamih tah mamih khosaknah neh bawknah ham ni caem n'tloek uh. m 22 Mamih loh n'tloek vaengah mah thunkha te Boeipa loh a phop bitni, te dongah amih te rhih uh boeh,” a ti nah.

23 Judas loh bawt a thui vaengah amah khaw, a hlang rhoek long khaw Seron neh a rhalkap huek a cuk thil uh tih amih te a phop uh. 24 Amih te Beth Horon a poeng duela a hloem uh tih kolvan ah Philistia la aka yong hlang yarhet tluk a ngawn uh. 25 Te phoeiah tah Gentile boeih loh Judah neh a boeinaphung te a rhih uh. 26 A olthang te manghai Aniochus neh namtom pilnam taengla a pha tih Judah neh anih kah tanah te a thui uh.

27 Aka om hno te Antiochus loh a yaak vaengah a rhih coeng. Te dongah a ram kah caem boeih te caempuei la tingtun sak ham ol a paek. 28 A thakvoh khuikah te a rhalkap rhoek kah kumkhat thapang la boeih a paek. Puenpa vaengkah ham sikim la om ham khaw ol a paek. 29 Tedae a thakvok dongkah tangka voehvoeh a muei pa te a hmuh. Mangmu dongkah a hmuh te khaw voevoeh a yol pah. Hlamat tue vaengkah aka om olkhueng te a voeih tih a tloe la a saii dongah diklai dongah soekloeknah neh ngaihamngnah a pai sak. 30 Manghai lamhma Antiochus long tah moeihoeih loh kutdoe hlang a paek. Tedae anih he tah he he ka khuentoeng thai mahpawh tila mawn coeng. A ngoengaih kah hnonah ham khaw a noeng pawt dongah lamhma lakah rhaep nit a om pah. 31 Kho a bing pah dongah Persia la caeh ham neh, khotung lamkah mangmu coi ham cai. Te daengah ni tangka muep a dang thai pawn eh.

32 Lysias te manghai kah huiko la a khueh tih olpuei hlang pakhat la a tuek.

Eupharate tuiva laklo neh Egypt khorhi khui kah manghai bibi boeih te a nih a hut sak. 33 Manghai loh Lysias te amah a mael hil a capa Antiochus a panganah aka khut la a khueh bal. 34 Lysias kut dongah te vuei neh rhalkap rhakthuem a khueh bal. A ngaihnah bangla saii ham khaw anih taengah a tip la a uen. Jeruslaem neh Judea ram khuikah a saii ham a ngaih te khaw. 35 Lysias loh Judah caem neh, olpuei la Jerusalem kah Judah rhoek taengah ol a pat. Amih kah thaomnah neh thaomnah te phae tih amih taengah a longpuei khui boel saeh a ti. 36 A khohmuen te loh pah te kah hmuen boeih ah aka om ham koi kholong taengah paek pa ham ol a paek. 37 Te dongah kum 147 vaengah tah a rhalkap rhakthuem te a khuen tih a khopuei Antiockh lamloh thoo. Euphrate te kat tih Mesopotamia tom la cet.

38 Lysias loh Nicnor, Gorgias neh Dorymenes capa Ptolemy te caem kah rhalboei la a khueh. Amih pathum longtah manghai kah paya tila ming then boeih a pueih uh. 39 Anih kut dongah rhalkap thawng sawmli, hnopuei thawngrhi a paek. Te phoeiah Judah khohmuen te loh tih manghai opaek bangla boeih phae ham te a uen. 40 Rhalboei rhoek te khaw a rhalkap te cet tih Emmaus kol taeng a pha vaengah rhaeh uh. 41 Idumea neh Philistia lamkah caem rhoek khaw amih taengla kap uh. Te pingpang kah thenpom rhoek loh rhalkap kah thaomnah te a yaak. Te dongah hlong a khuen uh tih rhaeh uh. Tangka khaw muep a khuen uh tih Judah sal te lai hamla a ngai uep uh.

42 Judah neh amah boeinaphung loh a hmuethma te a hmuh vaengah rhainah ta-oe ta-oe a tong uh. Kholong kah caem loh amih khorhi ah a rhaeh pah coeng. Pilnam he boeih thup ham manghai loh ol a paek coeng tila a ming uh. 43 Te dongah a namtu aka poci te thoh ha, a khohmuen neh a Bawkim ham tah rhalthoh ham cai uh. 44 Te vaengah rhaengpuei boeih tun cet uh caemtloek ham rhuengphong tih Pathen kah rhennah ham thangthui uh.

45 Jerusalem tah khosoek bangla pong coeng, Khosa neh a khui la aka kun om voel pawh, Bawkim cim te kholong loh a poeih coeng. Khopuei rhalmah hmuenah Gentile rhoek rhaeh, Pilnam Israel taengkah omngaih a loh uh, Phungding ol khaw cai voel pawh a ti uh.

46 Judah neh a hlang rhoek khaw coi uh thae tih Jerusalem khaepdan Mizpah la cet uh. Hnubuet ah khaw te hmuen te Israel pilnam loh bawknah hmuen la a khueh. 47 Kosi a dung neh hnin at puet a yaeh uh, tlamhnin a bai uh, a lu dongah hmaiphu a phum uh, a himbai khaw a phen uh. 48 Te bang vaengah Gentile rhoek long tah a mueirhol ni a dawt uh. Tedae Israel ca long tah a cayol te a yol voel mueh la Pathen kah hoihaengnah te a tlap uh. 49 Te vaengah khosoih himbai khaw, thaicuek nawnnah khaw, parhapakhat khaw, a olhlo aka soep Nazarence khaw a khuen uh. 50 Rhaengpuei boeih khaw, “Boeipa, hekah hno soah he balae ka saii eh, amih he melam ka khuen eh.

51 Na bawkimcim te a tiltoi uh coeng tih, Gentile rhoek loh a tanghnong thil coeng, na khosoih khaw yahhat la rhap coeng. 52 Kaimih ngawn ham neh kaimih phae hamla Gentile rhoek halo coeng. Amih kah mangtaengnah khaw namah loh na ming. 53 Nang loh nan bom pawt atah amih taengah metlam ka pai eh,” a ti uh.

54 Te phoeiah tah tuki te a len la a ueng uh. 55 Te phoeiah Judah loh a hlang rhoek teh parha, sawmnga, yakhat ne thawngkhat ah hloep hloep a boel. Amah rhoihui takuem ah khoboei rhip a khueh pah. 56 Olkhueng kah a thui bangla ompaek thonglo neh im aka sa li khaw, rhalyawp te khaw boeih a mael sak. 57 Te phoeiah caem te a caeh puei tih Emmaus tuithim la a khuen.

58 Te ah tah Judas loh amih te, “Namah te caemtloek ham hlah uh laeh, rhalthen sak uh. Thangvuen mincang he Gentile rhoek rhoek ham he sikim la om uh. Amih tah mamih phae ham teh mah bawkim phae hamla hui uh thae coeng. 59 Palyal la m'pai tih mah namtu neh bawkim a cungku te tawt lakah tah caemtloek vaengah n'duek he then ngai. 60 Tedae Boeipa loh amah kongaih bangla khueh nawn saeh,” a ti nah.