1 Tahae ah tah Jonathan loh amah hamla a tue then la a hmuh. Hlang te a coelh tih amih neh a paya la om te koep thoelh ham neh cak sak ham Rome la a tueih. 2 Amah tetlam te Spartan neh a hmuen tloe lam khaw ca a pat. 3 Te dongah Rome la cet uh tih khoboei yung la kun uh. Te phoeiah, “Khosoih boei Jonathan neh Judah namtom boeih loh lamhma kah paya neh huitai la om te koep thoelh ham ca ham pat,” a ti nah. 4 Te dongah Roman loh amih te hmuen takuem kah pilnam hamla ca a pat tih, Judah khohmuen te a suengnah ham, laipai khueh pah a ti nah.

5 Jonathan taengkah catlaep bang he Spartan ham khaw a pat pah. 6 Khosoih boeih Jonathan, namtu mangpa rhoek, khosoih rhoek, Judah pilnam boeih loh manuca Spartan rhoek te kut kan tuuk uh. 7 Khum tangtae a tue vaengah capat pakhat te Arius lamkah khosoih boeih Onias taengah kan pat coeng. Amah khaw nangmih taengah om lah ko. Catlaep dongah a tueng bangla nangmih tah manuca la na om uh. 8 Onias loh laipai te hinyannah neh a doe. Paya neh huitai la omnah olkhueh a caih la aka om capat te khaw a doe ngawn. 9 He he koep a ngoe mai ngawn voel moenih. Kaimih kut ah cabu cim om tih kaimih ham mongnah la om ngawn coeng. 10 Tedae nangmih ne cako lah n'sunnah neh paya omnah te a thai la kam pat ni. Te daengah ni hlanglang bangla n'om pawt eh. Nangmih loh kaimih taengah ca nan pat te khaw muep hla ngawn coeng. 11 A tuetang neh, khotue vaengah khaw, a tuek khohnin ah khaw, hmueih ka nawn vaengah khaw, thangthui vaengah khaw nangmih te tlal kan poek. Manuca rhoek m'poek he rhoep tloe tih thuem tloe pai. 12 Nang thangpomnah dongah khaw ka omngaih uh. 13 Tedae kamaih rhaitat tah, rhainah soeprhaep neh caemrhal soeprhaep loh kaimih m'vael uh. Ka kaepvai kah manghai rhoek loh kaimih m'vathoh thil coeng. 14 He rhalthongnah kawng dongah paya neh huitai nangmih te khaw ngae lawn ham ka ngaih uh moenih. 15 Kaimih bomkung tah kaimih aka bom vaan lamkah ni ha lo. Te dongah ka thunkha kut lamloh n'hlawt tih ka thunkha khaw a kunyun sak. 16 Te dongah Antiochus capa Numenius neh Jason capa Antipater te ka tuek uh tih lahma kah paya neh huitai la omnah te thoelh ham Rome la kan tueih. 17 Amih rhoi te nangmih taengah caeh ham khaw, nangmih toidal ham khaw, mah cako a thai la koep sunnah capat he paek ham khaw ka uen coeng. 18 Te dongah nangmih lamkah hlatnah khaw ham pat uh van,” a ti nah.

19 He capat pakhat he tah Onias taengah a pat. 20 Sarpatan kah manghai Arius neh khosoih boeih Onias te kut kan tuuk. 21 Spartan neh Judah he tah manuca neh Abraham kah a cako la a om te ca dongah ka hmuh coeng. 22 He ka ming coeng dongah nangmih kah khosak-rhamok kawng khaw kaimih ham han pat van. 23 Kaimih kah koeva khaw nangmih kah, na boiva neh na hnopai khaw kaimih kah tih, kaimih kah he khaw nangmih kah van ni. Te dongah he a kawng tarhing la nangmih taengah yaak sak ham laipai rhoek he kang uen,” a ti nah.

24 Demetrius kah rhalboei rhoek tah lamhma kah lakah rhalkap a yet neh anih vathoh thil ham a mael te Jonathan loh a yaak. 25 Tedae a ram khui a kun sak te a ngaih pawt dongah. Jerusalem lamloh cet tih amih te Hamath paeng ah hum uh. 26 Amih kah rhaeh hmuen la rhapyuep a tueih tih a mael vaengah tah, Judah rhoek khoyin ah muk hamla cai uh tila a puen pah. 27 Khomik a tlak nen tah Jonathan loh a rhalkap rhoek te hueltue la om ham khaw, a pumcunah te a kutdongah pom ham khaw ol a paek tih khoyin ah caemtloek hamla om oepsoeh uh. Rhaehhmuen kaepvai ah rhaltawt khaw boeih a khueh. 28 Jonathan neh a rhalkap rhoek caemtloek ham a sikim te a rhal rhoek loh a yaak uh. Te vaengah tah lakhueng uh tih a thinko ah khaw thuen uh. Te dongah a rhaeh hmuen ah hmai a toih uh tih vik yong uh. 29 Tedae Jonathan loh te te mincang duela a ming moenih. Hmai a rhong te ni dawk a hmuh uh. 30 Jonathan loh amih te a hloem ngawn dae Eleutherus tuiva a poeng uh coeng dognah kae voel pawh. 31 Te dongah Jonathan te Zabadeans la a khue Arabs rhoek taengla hooi uh. Amih te a phop tih a poelyoe. 32 Te phoeiah rhaehim te a phae tih Damasku la cet. Te vaengah paeng tom khaw a hil.

33 Simon khaw cet tih Askalon khohmuen neh a kaepvai kah hmuencak khaw a pha. 34 Demetrius kah a tueih rhoek kut dongah hmuencak te a tloeng pawn ni te khaw a yaak coeng dongah, Joppa la hooi uh bal tih buengrhuet a tuuk. Te phoeiah te te aka tawt hamla raltawt boeih a khueh.

35 Jonathan a mael vaengah tah pilnam kah a hamca rhoek te a coi tih Judea ah hmuencak sak ham, 36 Jerusalem vongtung khaw a sang la koep sak ham, rhalmah im he khopuei laklo a lak a sang la khueh tih, rhalmah im te a tloe hoep ham, rhaltawt rhoek te a tloe la khueh tih, hno a yoih, a lai thai pawt ham te saii hamla cai. 37 Te dongah khopuei thoh hamla coi uh thae tih vongtung ngancawn, kolvan lamloh khothoeng duek aka bung khuiah Chaphennatha phai te koep a tlaih. 38 Simon long khaw Shephelah kah Adida te koep a sak tih vongka dongah thohkalh te khak a buen.

39 Trypho he Asia manghai la om ham a cai dongah rhuisam te a khuem. Te vaengah manghai Antochus khaw a kut a hlah thil. 40 Anih long te Jonathan te a rhih. A saii sak mueh te saii konih a nih soah rhal la thoo ni a ti. Jonathan te tuuk tih ngawn ham a ngaih dongah cet tih Bethshan te a pha. 41 Jonathan khaw anih neh hum uh hamla a hlangrhal thawng sawmli a coelh tih a caeh vaengah Bethshan te a pha van. 42 Rhalkap neh muep a caeh pah te Trypho loh a hmuh vaengah a rhih tih anih soah kut hlah pawh. 43 Te dongah anih te hinyahnah ne a doe. A paya boeih nen khaw noeknah a saii pah tih kutdoe te a paek. A paya rhoek a rhalkap rhoek taengah khaw amah bangla Jonathan te olngai pah ham ol a paek. 44 Te phoeiah Jonathan te, “Balae tih pilnam boeih nan khuen, caemrhal khaw a om pawt mai ah muep na patang sak. 45 Amih te amah im la boeih tuei laeh, na taengah aka om puei la halng a yol mah tuek. Kai neh Ptloemais la ce sih. Hmuencak aka om khaw, rhalkap aka om pueng khaw, rhalboei boeih khaw na kut ah kan tloeng pawn eh. Te phoeiah na im la mael. Te ham ni kai he la ka lo,” a ti nah.

46 Johnathan loh anih te a tangnah dongah a thui bangla a saii. A lambong te khaw vik a tueih tih Judah khohmuen la mael uh. 47 Amah te hlang thawng thum ngawn tah a khuen dae thawng nit tah Galilee ah vik a paih dongah thawngkhat bueng loh anih te a puei. 48 Tedae Jonathan te Ptolemai la a kun vaengah tah Ptolemaih kah pilnam loh vongka tloep a kahih tih anih te a tuk uh. Anih aka kun hmaih hlang boeih te khaw cunghang neh a ngawn uh.

49 Trypho loh rhalkap neh marhang caem te Galilee neh kolvan puei la a tueih tih Jonathan kah rhalkap te boeih a ngawn sak. 50 Jonathan neh a hlang rhoek a tuuk uh tih a paci uh khaw a ming uh coeng. Tedae khat neh thaphoh uh tih rhep thoeih uh, caemtloeknah kah hamla sikim uh. 51 Amih aka hloem rhoek loh a hmuh vaengah a hinglu ham tah amih koep n'tloeh ni a rhih dongah a mael tak uh. 52 Te dongah amih te sading la Judah khohmuen a pha uh. Jonathan neh a pueipo ham khaw rhungrhap uh. Israel pum boeih khaw kosi a dung la rhungrhap uh. 53 A kaepvai kah namtom boeih loh amih te thup a ngaih uh tih, “Amih te mawtkung neh bomkung a om moenih, amih te vathoh thil sih lamtah diklai hlangmi dongah a thum pawt ham khoe pawn sih,” a ti uh.