5
A Bawtnah Miknoek
1 A bawtnah miknoek la, diklai khosa boeih te mueirhih loh muep a tuuk vaengah a khohnin ha pai ni he, oltak longpuei a phah vetih khohmuen kah tangnah khaw a hi la om ni. 2 Namah kah na hmuh voelah aka dueng pawt khaw pul ni, na yaak noek kah a voel ah khaw a pueh la om ni. 3 Khohmuen na hmuh he khaw khohmang rhaita loh a uk vetih pilnam loh khopong ni a hmuh eh. 4 Tedae Khohni loh nang hingnah m'paek atah, a khong thum dongah lukilnah dongah te te a voeih te na hmuh bit ni.
Khoyin ah aka sae la khomik pak thoeng ni,
Khothun ah hla vang ni,
5 Thing khaw a thii long vetih,
Lungto khaw huek pang ni,
Pilnam a ngai hmang vetih
Aisi rhoek khaw cuhu uh ni.
6 Aka ngaiuep pawh diklai khosa rhoek long khaw a manghai vetih, va khaw vai la bung ding uh ni. 7 Sodom tuitun ah nga kah vetih, ming mueh rhoek loh a ol te khoyin ah muep a huel vetih, a ol boeih a yaak uh ni. 8 Hmuen takuem ah hinghongnah om vetih hmai vawpvawp puek ni, khohong rhamsa khaw savai voelah rhung uh ni, pumomnu loh tuihnam a sak ni. 9 Tui oi lakli ah lungkaeh tui phul vetih paya boeih long khaw a hui te a vueinan ni. 10 Te te muep a tlap uh suidae hmu uh mahpawh. Diklai ah aka dueng pawt neh, aka cue uh pawt te puh ni. 11 Ram pakhat loh a hui te, “Hlang dueng om nim? pakhat khaw thuem nim, nangmih aka pah te?” a ti nah vaengah, “Om pawh,” a ti uh ni. 12 Tekah a tue vaengah pilnam loh a ngaiuep suidae dang mahpawh. Thakthae uh suidae a longpuei ah thaihtak mahpawh. 13 He rhoek ni nang taengah thui ham miknoek la m'paek. Koep na thangthui tih, tahae kah bangla na rhah a tah, hnin rhih na yaeh atah, tahae kah hno lakah a tanglue na yaak pueng ni,” a ti.
Mangthui A Bawtnah
14 Ka haenghang vaengah ka pum he hluih tat, ka hinglu a ngaihmang tih, kha sut. 15 Te vaengah kai taengla aka pawk tih, kamah taengkah aka cal puen cawn loh kai te n'tuuk. Kai m'moem tih ka kho dongah m'pai sak.
16 A pabae hlaem ah tah pilnam kah khoboei Phaltiel te kai taengla halo tih, “Me lam na om coeng? Balae na maelhmai a thae? 17 Vangsawn khohmuen ah nang sola Israel loh m'pangtung te na ming pawt nim? 18 Te dongah thoo lamtah buh bet ca dae, kaimih he n'hnoo boeh, uithang satlung lakli ah boiva a aka caeh tak tudawn banghui la,” a ti.
19 Te dongah nih te, “Kai taeng lamloh cet laeh, hnin rhih khuiah kai taengla ha yoei boeh, kai taengla na lo ve ne,” ka ti nah.
Ka thui te a yaak dongah kan n'caeh tak. 20 Te dongah hnin rhih ka yaeh tih, puencawn Uriel loh n'uen bangla ka nguek tih ka rhap.
Ezra kah Kohuet Thangthuinah Pabae
21 Hnin rhih phoeiah tah ka thinko kah poeknah loh kai muep n'cahoeh bal. 22 Te vaengah ka hinglu dongah yakmingnah mueihla ha phoe tih, Khohni mikhmuh ah ol koep ka cal bal. 23 “Tloeng khoelh boeipa aw, diklai duup boeih kah thing khuiah khaw sulyam pakhat ni na coelh. 24 Diklai khohmuen khui lamkah khaw namah ham manghai pakhat ni na coelh bal. Diklai hman kah rhaipai boeih khuiah ah khaw namah ham tuilipai ni na coelh, 25 tuitunli kah a dungnah boeih ah khaw namah ham tuiva pakhat ni na bae sak. Khopuei a thoh uh boeih khui lamkah loh Zion ni namah hamla na ciim. 26 Vaa a saii boeih khui lamloh vahu bueng ni namah hamla ming na phuk thil. Boiva a saii boeih kum lamkah loh tu bueng ni namah hamla na hmoel. 27 Pilnam hlangping boeih khum lamloh pilnam pakhat ni namah ham na loh. He pilnam ne na lungnah, olkhueng na paek te boeih a pom uh. 28 Boeipa aw, balae tih pakhat mai te hlang a yet kut dongla na voeih? A yung khat mai te a tloe rhoek lah yah na bai? Pakhat bueng mai te a yet sola na haek? 29 Na olkhueh aka tloelh rhoek loh na paipi aka tangnah rhoek te a suntlae. 30 Na pilnam te na thiinah tanglang atah, namah kut cing dongah milh uh mako,” ka ti.
Hlatnah Ol
31 Hekah ol he bawt ka thui vaengah tah hlaem yin ah kai taengla aka lo puencawn te koep han tueih. 32 Anih loh kai taengah, “Kai ol he hnatun lamtah nang kang uen eh, kai taengah hnatung lamtah nang taengah kan thui thil eh,” a ti.
33 Te vaengah, “Ka Boeipa thui saw,” ka ti nah hatah, anih loh kai te, “Israel soah nang te na lungbuei muep limlum a? Amih a amih aka saiikung lakah na lungnah ngai,” a ti.
34 “Moenih, ka Boeipa, tedae ka olthui dongah muep ka yut coeng. Khonoek takuem ah ka thinko phoena tih patang, Khohni kah longpuei yakming ham ka thingthuel tih a laitloeknah pakhat khaw bet ka khe vaengah he,” ka ti nah.
35 Amah loh kai taengah, “Na coeng moenih,” a ti. Te dongah, “Ka Boeipa balae tih? Me vaengah lae ka thang? Balae tih a nu bung he kai ham tah phuel la a poeh pawh? Jakob kah phacipphabaem neh Israel pilnam kah a tawnba he ka pawt palueng mako?” ka ti nah.
36 Kai te, “Aka thoeng hlan rhoek te kai taengah han tae lah, khotlang aka cip ke kai taengla han cului lah, rhaipai aka tloih tangtae te kai ham koep pailum sak lah, 37 imkhan a khaih ke hang ong lah, a khui kah khohli a up rhoek te ka taengla hang khuen lah, olkah a muei te kai n'tueng lah, te vaengah yakming hamla nan dawt phacipphabaem te kan thuicaih bitni,” a ti.
38 “Tloengkhoelh Boeipa, diklai hlang neh aka hing mueh rhoek voelah tah, u long he he kah hno he ming ham a coeng eh? 39 Kai aisat he, cueihnah khaw tal tih, kai nan dawt hno kawng te metlam ka thui thai eh?” ka ti nah.
40 Anih loh kai te, “Kan thuinuet hno pakhat khaw na saii thai pawt bangla, ka laitloeknah khaw na khe thai pawt vetih, ka pilnam ham ol ka khueh lungnah dongah a hmakhahnah te na ming thai mahpawh,” a ti.
Thaihtak Cadil Khaw A Khueh
41 “Ka Boeipa aw, a bawtnah hil a hing la na khueh khaw om ngawn, tedae ka hlankah aka hing rhoek tah me tlam a om eh? Kaimih, kamaih khaw, kaimih hnukah aka lo ham rhoek khaw,” ka ti.
42 Anih loh kai te, “Ka laitloeknah he kueluek la phek om, lamhnuk khaw hnong pawt tih, lamhma khaw a thintawn aih moenih,” a ti.
43 Te vaengah ka doo tih, “Aka om tangtae khaw, aka om li khaw, aka om ham khaw rhenten na suen thai moenih a? Te vaengah na laitloeknah te rhenten na khueh laeh mako,” ka ti nah.
44 Te vaengah kai te n'doo tih, “Suenkung lakah suentae loh thintawn la a thoeih thai moenih, a suen tangtae rhoek te diklai loh rhenten a tuuk thai moenih,” a ti.
45 “Na sal he metlam nim nam voek tih na suentae rhoek te hingnah rhenten la na paek eh? Te dongah suentae boeih rhenten la hing tih suentae loh amih te tuem koinih, tahae tue ah pataeng amih te rhenten a bom thai suidae,” ka ti.
46 Amah loh kai te, “Manu kah a bung ke dawt lamtah, ‘Camoe parha na cun te balae tih pakhat phoeiah pakhat na cun?’ ti nah lamtah parha te vaikhat ah rhenten cun ti nah saw” a ti.
47 “ Te ngawn tah coeng pawh, pakhat phoeiah pakhat amah tue om ta,” ka ti nah.
48 Amah loh kai te, “Ka khaw diklai kah a bungko he amah tue, tue ah a tuh ham ni ka paek. 49 Cahni loh ca a cun pawt bangla, manu patong long khaw ca a cun voel moenih. Te kah a rhimong bang lamni diklai khaw phek ka suen,” a ti.
Me Vaengah Lae A Bawt Eh
50 Te phoeiah ka cae tih, “Tahae hil a tuethen nan paek parhi te, namah taengah ka thui lah eh. Kamih manu kawng kaimih taengah nan thui te camoe pueng a? Patong ben la a paan coeng a?” ka ti nah.
51 Anih loh kai n'doo tih, “Huta cacun te dawt lamtah nang taengah a thui bitni. 52 Anih te, ‘Balae tih na cun tangtae te tahae kah na cun bangla a om pawh, a pumrho a yit,’ ti nah lah. 53 Amah loh nang taengah, ‘Thaom thuem vaengah a cun rhoek neh, patong tih ca-im a tlak phoeikah a cun rhoek tah lang ta,’ a ti bitni. 54 Te dongah nang khaw namah te poek uh lah. Na thawnpuei rhoek he tah na hlankah lakah yit ngai ta. 55 Nang phoeikah aka lo ham rhoek khaw nang lakah yit ni, suencuek vaengkah a sak rhoek te patong tih a camoe kah rhoek khaw khum coeng,” a ti.
56 “Boeipa aw, nang kan koeh. Na mikhmuh ah kolonah ka dang atah, na suentae rhoek na hip ham te khaw na sal he n'tueng lah,” ka ti.