1 Tonghma ol te ka pilnam hna ah thui pah, tete na ka dongah kang khueh bitni, Boeipa long ni a thui. 2 Amih a tingtawk neh oltak la aka om rhoek tah cahawn dongah daek sak. 3 Nang aka taeng rhoek te khaw rhih boeh, aka tangmueh rhoek loh nangmih n'tloelh dongah ngaihmang sak uh boeh. 4 Aka tangnah mueh tah a tangnah pawt bangla duek uh ni.

5 Boeipa loh a thui he ngaithuen, lunglai soah puenthae, cunghang neh khokha, dueknah neh pocinah ka khuen ni. 6 Tholhiknah he kho takuem ah cet coeng tih, rhih om la a saii uh khaw a khuetnah a pha coeng. 7 Te dongah Boeipa loh a thui coeng. 8 Khoboe lailak neh a bawt mueh la a sainah kawng dongah kam ka khuem pawt vetih, halang kah omihnah khaw ka ueh mahpawh. Ommongsitoe neh hlang dueng kah a thii he kai taengah pang coeng. Hlang dueng kah hinglu khaw phat pang coeng. 9 Amih te phu ka loh ni, Boeipa loh a ti lah ko. Amih lamkah ommongsitoe thii neh boeih ka loh ni. 10 Ka pilnam te ngawnnah kungah boiva bangla a mawt uh coeng ke. Egypt khohmuen ah khosak hamla ka hlah voel mahpawh. 11 Tedae amih te tlungluen kut neh, ban ka lam neh ka loh vetih, Egypt te lucik neh lamhma kah bangla a khohmuen te boeih ka phae ni.

12 Egypt neh a khoengim rhoek te nguekcoi laeh saeh, Boeipa loh a soah toelnah lucik neh cawhnah te a lung pah pawn ni. 13 Lotawn khaw lairhi duela nguekcoi saeh, a cang ti te a poe ham khaw ut coeng tih a thingkung te mawn neh, rhael neh, khonal tuihli loh a phae coeng. 14 Anunae, lunglai neh a khuikah khosa rhoek boeih ham aih te. 15 Cunghan neh citcaih tah amih taengla yoei coeng, namtom loh namtom tloek hamla a thoh thil ni, a kut dongkah cunghang nen te. 16 Pilnam taengah hinghongnah om aka tlung loh aka lung a rhoeng thil ni, a tlungtluen loh te a manghai neh khoboei boeilu rhoek hinyah mah pawh. 17 Hlang loh khopuei khuila cet ngaih mai cakhaw a saii ham noeng van mahpawh. 18 A koevoeinah dongah khopuei rhoek khaw kilkul uh vetih imlo a phae uh vaengah pilnam long khaw a rhih ni. 19 Pilnam loh a imben soah lungma ti mah pawt vetih amih te cunghang neh a cawk ni. A hno te khaw a poelyoe pah ni. Te khaw a bungpong uh tih longlonah muep a om coeng dongah ni.

20 Diklai manghai boeih te ka taengla mael ham tun ka khueng coeng he ne. Pathen loh a ti coeng lah ko, khomik a thoengnah lamkah khaw, tuithim lamkah khaw, khocuk neh Lebanon lamkah khaw, amih taengah ka paek te ha mael saeh lamtah n'thuung laeh saeh. 21 Tahae khohnin hil ka tuek rhoek taengah a saii uh bangla amih taengah ka saii vetih a rhang dongah ka thuung ni. Te dongah Boeipa loh he ni a thui. 22 Ka bantang kut loh hlang tholh te hlun pawt vetih, ka cunghang loh diklai ah ommongsitoe thii aka long sak taeng lamloh paa mahpawh. 23 A kosi dong lamloh hmai a caeh hlue atah, diklai neh hlangtholh kah khoengim te boeih a hlawp tih, divawt bang lamni a ung mai. 24 Anunae, tholh tih ka olpaek aka tuem pawt rhoek aih te, Boeipa loh a thui coeng lah ko. 25 Amih te ka hnaih mahpawh. Khoe uh laeh hoeih, nangmih hnukpoh ca rhoek aw, ka rhokso he poeih uh boeh. 26 Amah taengah aka tholh khaw Pathen loh a ming dongah ni amih te dueknah neh aka ngawn kut dongla a voeih. 27 Diklai pum ah yoethaenah ngawn tah pai tangtae coeng dae te khuiah ah ni na hing uh. Pathen loh nangmih n'hlawt mahpawh, amah taengah na tholh uh dongah.

28 Khothoeng lamkah aka phoe te mikhmuh ah thuen tangkik. Arabia kah tuihnam namtom tah leng neh muep ha thoeng. 29 Te khohnin atha hlah uh tih diklai hman ah phit uh ni. Te dongah aka ya boeih tah rhihnah neh thuen uh ni. 30 Carmonian khaw kosi neh kawk tih duup lamloh khohong okrhul bangla khong uh pawn ni. Thadueng len neh ha pawk vetih coemtloenah ah rhong a pai ni. A pumcunah a no loh Assyrian khohmuen kah khoyo te boeih a thoe pah ni. 31 Tedae tuihnam rhoek tah a hnun a poek vetih a thadueng koep om ni, a thaomnah te a len la a cului vetih amih te a hloem ni. 32 Te vaengah amih te taekyaek uh ni, a thadueng paa vetih a mael neh rhaelrham uh ni. 33 Te vaengah Assyria khohmuen lamkah rhal tah a rhongngol vetih amih a tloek ni, amih te pakhat la a phae ni. A rhal rhoek soah rhihnah neh thuennah pai vetih a manghai rhoek soah konoi uh ni.

34 Khothoeng lamkah, tlangpuei lamkah neh tuithim lamkha khomai thoeng coeng ke. A suisak khaw a toehnah a puehkan la om tih, kosi neh hlipuei muep bae. 35 Khat neh khaw boeng uh thae vetih tih diklai dongah thintoinah muep bae ni. Amih kah thintoinah rhangneh cunghang lamkah thii te marhang kah a bungpuei a muelh hil, 36 hlang kah a pumpu neh kalauk kah a uen hil li ni. 37 Diklai dongah rhihnah neh thuennah muep om ni. Tete aka hmuh rhoek tah kosi loh a let sak vetih thuennah loh a tuuk ni. 38 Te phoeiah tah hlipuei khomai tah tuithim lamloh, tlangpuei lamloh, a tloe te khotlak lamloh yolh uh ni. 39 Tedae khothoeng lamkah kholi long tah kosi neh aka thoeng khomai te a yawn vetih bang cing ni. Pocinah la aka om thintoinah te khaw khothoeng khohli loh a phae vetih khotlak tuithim la phaeng a vai ni. 40 Khomai len neh aka tlung, kosi thintoi aka hah te ha thoeng vetih diklai pum neh amah khosa te boeih phae ni. A thintoi rhihom te pomdoep hmuen sang boeih ah a hawk ni. 41 Hmai neh, rhael neh, cunghang aka ding neh, tuilii tui mai neh, lohma neh sokko boeih khaw tekah tui ni muep a bae eh. 42 Khopuei neh pangbueng khaw, tlang neh mol khaw, duup kah thing khaw, rhamtlim baelhing khaw, a vueithaih khaw a thup ni. 43 Babylon la tlueptluep cet vetih a palet ni. 44 A kaepvai te khaw a paan uh vetih, a thintoi neh a thinsanah boeih te a hawk thil uh ni. Te vaengah laipi neh laivai te vaan la luei vetih a kaepvai ah nguekcoi uh ni. 45 Aka sueng rhoek loh a phae rhoek te a khut ni.

46 Asia nang khaw Babylon kah rhuepomnah neh a thangpomnah aka bawn van ni. 47 Anunae, nang aih te, pocinah khomap coeng. Anih bangla na sa uh khangrhoep bal. Na kolo taengah tah na tanu khaw pumyoi la na det tih, na hlang ngaih neh, na hmatoeng kah aka cukhalh rhoek taengah na thangpom. 48 A khoboe neh a poeknah boeih dongah thiinah ham aka om te na awt. Te dongah Pathen loh, 49 ‘Nang soah yoethaenah kan tueih vetih, nuhmai, khodaeng, khokha, cunghang, duektahaw ka tueih vetih tih, na im khaw a imrhong la pai ni, dueknah neh cungkunah hang khuen ni. 50 Nang soah kholing kan tueih vaengah na thadueng thangpomnah khaw rhaipai bangla rhae ni. 51 Huta a boh tih hmasoe ah a rhawp bangla na kha ni. Te dongah na hlangtlung na lungnah te khaw na doe thai mahpawh,’ a ti. 52 Nang te thalaeng kan saii ni, Boeipa loh a ti coeng lahko. 53 Ka pillnam hlang coelh phat na ngawn te khaw, na thangpom te, na kut na paeng te khaw, na rhui vaengah a dueknah na thui uh te mah ana toeng boeh.

54 Na hmai te ana hluk ngawn. 55 Na pumyoih kah thaphu te na baeng ah kap lah ko. Te dongah namah dantatnah na dang pawn ni. 56 Boeipa loh a thui lah ko. Ka pilnam hlang coelh na saii bangla Pathen loh nang taengah han saii van ni. Na thunkha kut ah n'tloeng pawn ni. 57 Na ca rhoek te bungpong ah duek vetih cunghang dongah na kaeh uh ni. Na khopuei rhoek te a khoe vetih khohoeng kah na pilnam boeih khaw, na khohmuen khaw cunghang dongah cungku uh ni. 58 Tlang neh hmuensang kah aka om rhoek khaw bungpong neh lamlum uh ni. Buh a pong neh amah saa neh a caak uh vetih tui a halh ah amah thii te a ook uh ni. 59 Te boeih soah kothet khueh uh laeh, na pawk uh vaengah pumsa ah citcai neh na patang uh ni. 60 A caehpah doela a thiinah khopuei rhoek te a phop uh vetih na khohmuen rhakthuem a phae uh ni. Na thangpomnah khoyo khaw a koengloeng uh ni, Babylon khopong lamkah a mael uh vaengah. 61 Hmuitoel bangla nangmih te n'ngael uh vetih nangmih taengah hmai la ha poeh uh ni. 62 Na khopuei khaw, na khohmuen khaw, na molmae khaw a hlawp uh ni. Na duup neh thingkung thingthaih khaw hmai neh a hlup uh ni. 63 Na ca rhoek te tamna la a khueh vetih na khuehtawn te a poelyoe uh ni, na diklung diklai kha thangpomnah khaw a baeh uh ni.