1 Simon kawng te thui tangtae coeng ni. A khohmuen soah tangka kawng te hlang taengla puen. Onias te khaw a soeh sal. Heliodorus te khaw a vueh tih boethae aka sai kung tah Onias ni a ti nah. 2 Khopuei ham aka hoeikhang, a pacaboeina aka tungaep, olkhueng dongah aka tlungmu vik te Simon loh barhan taengah hlang thae la a yoih. 3 Te bang oltloeknah long te thinah a rhoeng sak tih Simon aka paipuei rhoek loh hlang ngawnnah ham tha aka phoh la om coeng. 4 Khingkhoeknah yet coeng tih Coelesyria neh Phoenicia kah khoboei Menestheus capa Apollonius loh Simon kah laithae a paipuei te khaw Onias loh a ming. 5 Te dongah a pacaboeinah dongah khotohnah om pawt ham, langya neh a huep ah khaw, pilnam boeih ham te manghai taengah a thui. 6 Manghai loh rhaengpuei taengah a ngai huet pawt koinih khosaknah loh rhoepnah om pawt vetih Simon kah a angvawk te khaw bawt mahpawh tila a hmuh dongah ni.

7 Seleucus te a duek nen tah Epiphanes la a khue Anitochus loh ram te a ngol thi. Te vaengah Onias mana Jason loh khosoih ham ne a huen loh neh a bi. 8 Anih long te manghai taengah tah, cak talent yathum sawmrhuk neh, a tloe thahuelnah te mangmu la talent sawmrhet kam pae eh a ti nah. 9 Te phoeiah khaw, hlangnoe pum ham luemnah hmuen sak ham neh, Jerusalem kah pilnam boeih te Antioch kah khosa la om ham saithainah nan paek atah tangka ya sawmnga kan thap thil eh a ti nah.

10 Jason te manghai loh ngolhmuen a paek coeng atah a pacaboeina taengah Greek kah khosaknah singyoe vai hamla te a saii. 11 Roman rhoek neh huitai la om hamla Johan napa Eupolemus cet tih paya a om vaengah Judah rhoek ham ko a hlawt pah manghai olkhueh te khaw vik a rhoe. Olkhueng kah khosing te a phae tih olkhueng neh aka kingkalh khosing te lat a thawt. 12 Rhalmah im taengkah luemnah hmuen a thoh te a thahlue tih, hlangcong cadong hlang rhoek te Greek rhoek kah lumuek hamla tha a paek. 13 Jason kah a halangnah he a khawk coeng dongah te bang Greek khosing neh kholong kah khosing long he muep a et uh. Anih ngawn tah hlang rhalawt la om tih, khosoih ham taktak la a om pai moenih. 14 Khosoih rhoek long khaw hmueihtuk dongkah a bibi te ngai uh voel pawh. Hmuencim te a hnoelrhoeng uh tih hmueihhlutnah khaw a hlapham uh. Thiphael voeih ham darkhing ol a yaak uh nen tah olkhueng loh a ngaih mueh rhaknah hmuen cet paitok uh. 15 A napa rhoek loh hinyahnah la a khueh te a hnawt uh tih Greek kah khosing neh omih te a phu a sang la a khueh uh. 16 He kawng dongah ni amih te puenthae loh muep a nan uh. Amih loh a khosing bahoeng a hue uh tih a cungkuem la a ngawt pah rhoek te a rhal la poeh tih amih te a hnaemtaek coeng. 17 Pathen kah olkhueng a phaelh soah a phoeng pawt te khaw a hnuk kah loh a caih la a tueng sak bitni.

18 Tyre ah kumli danah vai a saii luemnah hmuen ah te manghai khaw thum van. 19 Te vaengah hlanghuen Jason loh Antioch rhoekca te Jerusalem lamoh laipai la a tuei tih Hercules taengkah hmueihhlutnah hamla dramas tangka yathum a khuen sak. Te rhoek loh tangka te a phueih uh ngawn dae, hmueihhlutnah la hnonah ham tah then pawt tih a rhoeprhui pawt dongah a tloe dongah a hnonah uh. 20 He tangka he tah Hercules taengkah hmueihhlutnah ham ni aka patkung long tah a cai ngawn dae, aka khuen rhoek kah oltloeknah bangla sangpho saknah hamla vik a hnonah uh.

21 Philometor te manghai la a khuehnah hnin ah tah Menestheus capa Apollonius te Egypt la a tueih. Te vaengah Philometor loh a ukknah a ngaih pawt te Anitouchus loh a ming dongah amah hiuepnah hamla rhoekbahnah a saii. Te dongah Joppa la cet tih Jerusalem la phat a pha. 22 Anih te Jason neh khopuei kah loh hmaithoi hmai neh, tamlung neh a rhimom tloe la a doe uh. Te phoeiah a caem neh Phoenicia la khong uh.

23 Kumthum a hnalak phoeiha Jason loh Simon kah a thuinuet coeng bangla a mana Menelaus te a tueih. Te vaengah manghai ham te tangka neh a ngoe bitat dongkah cabu boeih te a khuen sak. 24 Tedae manghai taeng a pha vaengah tah manghai te khohli dong hil a palawh. Jason kah tangka te khaw cak talent ya thum neh a pueh pah tih khosoih ham bibi te amah hamla vawl a loh. 25 Manghai kah olpaek te a dang tih mael coeng dae, khosoih ham la om ham tah thoemthainah a khueh moenih. Anih te thintoi neh muen la muen tih, khohong rhamsa bangla tlung. 26 Jason loh a manuca te a phok dae amah tue vaengah tah hlang loh a phok van. Te dongah anih te Ammon khohmuen ah rhalyong bangla a vai uh. 27 Menelaus loh a bibi te phat a tuuk coeng ngawn dae, manghai taengah ol a khueng bangla tangka te phat a paek voel moenih. 28 Te vaengah rhalmah im kah rhalboei Sostratus tah tangka aka hoe neh mangmu aka coi ham a hutnah a khueh. He kah olka kawng dongah amih rhoi te manghai loh bok a tah. 29 Te dongah Menelaus loh amah mana Lysimanchu te khosoih ham bibi aka hutnah la a khueh tih, Sostratus loh Cyprian caem kah rhalboei te Crates amah yueng la a caeh tak rhoi.

30 Te tlam te khosak rhamsak a om vaengah Tarus neh Mallus kah pilnam tah a khopuei te Antiochus taengah manghai kah yula vik a paek dongah boe a koek uh. 31 Te dongah manghai te olpungnah duem sak ham a loe la cet tih, amah yueng la aka thotat ham ham Anfronicus te rhaengsang la a khueh. 32 Tedae Menelaus long tah a tuetang tapkhoeh ka dang a ti dongah bawkim kah sui am te a huen tih Andronicus te a paek. A tloe te tah Tyre neh a kaepvai kah khopuei rhoek taengah a yoih. 33 Te tla a saii te Onias loh phaeng a ming dongah amih te phaeng a yan coeng. Hmuencim hmuen te khaw Antioch kaep kah Daphne la a puen coeng. 34 Te dongah Menelaus loh Andronicus te a tang la a loh tih Onias te ngawn ham a hloep. Andronicu te Onias taeng a pha vaengah tah tangka te khaw koep a paek, a olhlo neh a toemngam tih a bantang kut te Onias taengah a paek. Uepvawtnah om pawt hil anih te a hloeih tih hmuen cim lamloh poeng la a khueh. Te vaengah tah tiktamnah khaw a poek mueh la Onias te a ngawn.

35 He kawng dongah he Judah rhoek bueng kolla namnom boeih khaw huei uh tih, a tiktak mueh kah hlang ngawn te khaw ngaih uh pawh. 36 Manghai te Cilicia peng lamloh a mael vaengah tah, lunglilungla la Onias a ngawn te khopuei kah Judah rhoek loh manghai taengah a thui pa uh. Greek rhoek long khaw te bang dumla a ngaih pawt te a thui pah. 37 Te dongah Antiochus khaw a kothae tih a thinko ah te kosi la hah. A omih neh a boe then te a poek puei vaengah tah a mikphi la bo. 38 A thintoek loh a hlup coeng dongah Andronicus taengkah daidi himbai te tlek a dul pah coeng. Khopuei tom te a hil sak phoeiah tah Onias taengah kut a hlahnah van rhoe ah, thii aka ngaih soeh anih te khaw a ngawn. Boeipa loh anih te amah neh a tueng la dantatanah a paek coeng.

39 Lysimachus neh Menelaus yok uh rhoi tih khopuei ah boethae a saii nah khaw muep yet coeng. Te kah olthang te yilh cet coeng. Sui hnopai te muep a huen uh coeng dongah hlangping loh Lysimachus te a tingtun thil uh tih a tloelh uh coeng. 40 Te dongah hlangping khaw a thinhul tih a thintoek hah uh coeng. Te vaengah Lysimachus loh hlang thawng thum te a pumcum sak tih songrhai la hlang a tloek sak. Te te Auranus kah mawtnah hmuiah a khueh. Anih loh a mawtnah he yol mai pawt tih a ang mai moenih. 41 Songrhai loh Lysimachus loh amih a tloek te Judah rhoek loh a ming vaengah tah a ngen loh lungto a rhuh uh, a ngen loh thing long, a ngen loh diklai ah aka om laipi khaw a paco uh. Te nen te Lysimachus ne a hlang rhoek te a dae uh. 42 A hnukkhueng la amih te muep a hmalaem sak tih a tloe rhoek te yong uh. Bawkim kah dingca rhoek te thakvoh taengah a thup uh.

43 Hekah soekloeknah kawng dongah Menelaus taengah kungsutnah a khueh uh. 44 Manghai te Tyre la a caeh vaengah tah laipai hlang pathum te a tueih uh tih a taengah dumlai kawng te a thui uh. 45 Tedae Menlaus loh a then la a buem tangtae coeng ni. Manghai te ka vuei ka nan eh a ti dongah Dorymenes capa Ptlolemy te kavelh paek hamla ol a khueh coeng. 46 Te dongah Ptolemy loh manghai te yilh poeng hamla vaikhap ah a khue tih a ko hlawt sae tila a vueh. 47 Boethae boeih kah laikung la aka om Menelaus tah a taengah a kungsutnah boeih lamloh loeih tih hlang rhoek vik tih yoethae bangla duek uh. Amih te Scythian taengah thui koinih dantatnah lamloh loeih uh sui dae ta. 48 Te dongah khopuei vangca rhoek neh sui hnopai hamla aka thui pangrhaeng te songrhai la dantatnah pahoi a yok uh. 49 Tyre rhoek long khaw dumlai te a thinah te a tueng sak dongah amih kah rhokhlaknah khaw a rhuepom la a saii pah. 50 Tedae Menelaus ngawn tah a thaomnah dongah moo coeng tih a ngolhmuen ah khaw, halangnah khaw rhoeng tih, a pacaboeinah aka yoikung a lenkoek la coeng.