1 Te phoeiah a koe kolla manghai loh a hamca Athens hoel te a tueih tih Judah rhoek ta a napa rhoek kah olkhueng te voeih sak ham, Pathen olkhueng dongkah khosak pawt ham khaw, 2 Jerusalem kah bawkim te poeih ham neh, te te Olympian Zeus bawkim la khue ham khaw, Gerizim kah te khaw te hmuen kah khosa pilnam loh a saii bangla kholong paya Zeus bawkim la khueh ham a tanolh.

3 Boethae aka om te tlo aih tih a ueh uh tloel coeng. 4 Bawkim te khaw boethae neh kholong kah rhuihahnah neh bae coeng. Pumyoihnah muep om coeng tih hmuencim khui ah khaw huta te a luk uh. A thuem a ham mueh hmueihhlutnah te khaw a khuen uh bal. 5 Olkhueng loh a ngaih mueh nen khaw mueihtuuk te rhalawt la a vuei uh. 6 Pilnam loh Sabbath khaw yaeh voel pawt tih, a napa rhoek kah khotue te khaw tuem uh voel pawh. Amamih nawn khaw kai Judah hlang ni tila phong uh voel pawh.

7 Manghai kah cunnah khohnin a saii vaengah khaw Judah rhoek te mangkhak a loh tih hmueihhlutnah te a bul sak. Dionysus kah khotue a bul vaengah khaw rhaipai samkhuem te a khuem sak tih Dionysus hinyahnah ham a khong uh vaengah khaw caeh hamla a tanolh uh. 8 Ptolemais kah pilnam taengah oltloek a paek bangla a kaepvai kah Greek khopuei rhoek taengah khaw a saii uh. Te kah khoboe te Judah taengla a khueh tih hmueihhlutnah te bul ham a saii uh. 9 Greek rhoek kah khosing dongla aka puen uh pawt te tah a ngawn pawn ni. Te dongah amih soah phacip phabaem aka pai ham te khaw a hmuh uh coeng. 10 Thuinuenah ah, huta rhoi loh a ca rhoek te yahhmui rhet lamloh a mael puei te a hmuh atah, a camoe te a sukbam la loplop a bat la a oi sak tih vongtung dong lamloh sungli la a tulh uh. 11 A tloe rhoek te a kaepvai kah lungko dongah tingtun uh te Sabbath te a yaeh uh dae a puen pa uh dongah amih te Philip loh hmai neh rhenten a hoeh. Amah ah tah khohnin cim koek la a ngai uh vaengah amamih kangna khaw huul thai boel saeh a ti.

12 He cabu aka tae rhoek loh te bang citcai dongah kobawtnah khueh pawt ham kan hloep. Tedae toelnah ti he phae ham pawt tih, mah pilnam hlinsainah ham ni. 13 Te tah sitlohnah miknoek la om tih boethae dongah phat buek boel saeh tila pahoi a toelnah ham ni. 14 He olka dongah Boeipa loh namtom rhoek te a tholhnah cungnuek khuek a hah daengah dantat ham khaw thinsennah neh a rhing. Tedae Mamih he dueknah nen tah mamih he m'ben sak moenih. 15 Mamih kah tholhnah he a sang koek la pha mai ca khaw mamih taengah thungnah khaw a khueh moenih. 16 Citcai neh mamih n'toel dae a pilnam lamloh mamih n'hnawt bal moenih. 17 Thui boeih te mamih aka rhalrhing sak la om saeh lamtah a cil he bawt thui bal lah sih.

18 Eleazar he tah cadaeknah dongah hmuen sang pakhat la om. He hlang he hinyah kap lamni a om. Anih ka te khak a phen pa uh tih ok sa a pai uh. 19 Tedae anih long tah rhalawt la hing lakah tah hinyah kapla dueknah he ni a doe ngai. Te dongah oksa te a tha tih amah a ngawnnah thaeh so la luei. 20 A hingnah te a lungnah mailai ham om mai dae, a ten ham tueng te khaw a thanah tih thinomnah neh boeih cet.

21 Olkueng neh aka kalh hmueihhlutnah aka taemrhai rhoek te anih ne puet hmat uh thae coeng. Te dongah amah kah maehham bangla ca mai a ti nah tih duem a hloep uh. Manghai kah olpaek bangla hmueih kah maeh te camai a ti na uh. 22 Te koinih a hingnah khaw sueng vetih, a taengkah a paya rhoek loh a patong hil kah sawtletnah lam khaw om sui dae. 23 Tedae a sangkoek la ko a tam coeng. A kum khaw rhoeh coeng tih hinyah kap la patong coeng. A sam pok long khaw hmakhahnah a pha coeng. A camoe lamkah a khosakanh khaw khuet coeng. Te phoeiah Pathen kah olkhueng cim a paek bangla, amih taengah, “Kai he Hell lam khang ngaih tah n'tueih uh,” tlek a ti nah.

24 “Te bang basanah he ka hingnah tue nen khaw a koih moenih, camoe te yet loh Eleazar he a kum sawmko vaengah kholong bawknah kun ti lah ve. 25 Ka basanah long he ka hing bet sen sitoe cakhaw, kai kongah amih kho khohmang la om uh ni ta. Ka patong soiah ka poeih uh vetih ka ming thae koinih. 26 Hlang kah dantatnah he lamloh tahae ah ka rhael mai ni. Tedae ka hing cakhaw, ka duek cakhaw, Tlungthang Pathen kut lamloh ka loeih he mah pawh. 27 Te dongah ka hingnah he thinom la ka paek coeng tih, ka patong hamca kah uepomnah he ka tueng sak eh. 28 Olkhueng cim hinyahnah dongah thahlue la duek he hnon then ni tila cadong hlangcong ham awt koi la ka khueh eh,” a ti.

A thui van neh amah te thaeh dongla pahoi luei coeng. 29 Tapaek ca kah anih taengah boethen aka thui rhoek long a lungbuei a thae la a poek uh coeng. A olthui te amih kah poeknah dongah hlang ang ol la rhep a poek dongah ni. 30 Tamnah hmui ah a duek tom vaengah tah a ngaih la pang tih, “Boeipa kah mingnah dongah tah phaeng cim ngawn, dueknah khui lamloh ka daem ngawn suidae, amih kah bohnah hmuiah ka pum loh patangnah puet a ueh. Tedae Boeipa ka rhih dongah he bang patang yok ham he ka hinglu a kohoe ngawn,” a ti.

31 He tlam he a duek dongah, camoe rhoek ham bueng pawt tih a namtu boeih taengah, hiyah tlak awtkoi neh a thinom poekkoep nah te a khueh pah.