1 Kotluepnah he a pha vaengah tah Lysias te manghai taengla mael tih Judah rhoek khaw amah lo la mael uh. 2 Tolrhum khoboei hlangvang, Gennaus capa Apollonius, Hieronymus neh Demophon, Cyprus rhalboei Nicanor loh Judah rhoek te bidip la a hlah moenih.

3 Te vaeng tue ah Joppa kah pilnam loh a khopuei kah Judah rhoek taengah boethae hno a saii uh. Judah im khui te paya bangla a rhaithinah tih sangpho a khueh dongla a cako la a luei sak. Judah rhoek tah uepvawtnah omueh la lungbuei then nen ni coepcaelnah te a doe. 4 Tedae tuitun li voelh a pha uh phoeiah tah Joppa kah pilnam loh Judah hlang ya hnih te boeih a tulh uh.

5 A hlang pawt moei la kho a boe uh te a hlang rhoek loh a yaak sak dongah Judah loh tlek a ming coeng. 6 Tiktamnah neh lai aka tloekkung Pathen taengah thangthui uh tih hlang aka ngawn rhoek te a ngawn uh. Khohmuep loh a khuk vaengah tah tuikaeng te hmai neh a hlae uh tih sangpho khaw boeih ung. Tekah aka thuh hlang rhoek te khaw boeih a ngawn uh. 7 Khopuei vongka tah khoep a kalh uh dongah omthawt tue vaengah paan tih te kah khosa boeih bit hamla cai.

8 Jamnia kah pilnam loh amah khopuei kah Judah rhoek ngawn ham a taeng te khaw Judas loh a yaak. 9 Te dongah Jamnia te khoyin ah a tloek. Tuikaeng boeih neh sangpho ne hmai neh boeih a hlup. A hmairhong te meng sawmthum aka hla Jerusalem lamloh tueng.

10 Te lamloh meng khat hlai a caeh uh phoeiah tah Timothy te a khong thil uh. Te vaengah Arab hlang a yol koek thawng nga neh marhang caem yanga tluk loh amih a tloek. 11 Judas neh a pueipo rhoek loh a kuel kahlak la a tloek vaengah Pathen kah bomnah rhangneh tanah a dang uh. Hlangpoeng rhoek te a yawk uh vaengah tah paya la khueh ham Judas taengah a bih uh. Te vaengah a boiva boeih te paek ham te a pilnam te a hnukhmai la bom ham ol a khueh. 12 Amih te mebang ah khawh boeih congpang ngai ni a tila Judas loh a poek. Te dongah amih neh rhoepnah saii hamla a ko tluep. Te phoeiah a bih bangla a rhoi pah tih amamih kah dap la mael uh.

13 A cak ka hlak la a thung Caspin khopuei te khaw Judas loh a tloek. Tekah pilnam tah Gentile hlangmih te pitpom tih kho a sak uh. 14 Amih te a vongtung a cak dongah hangdang uh tih, puet dum cakhaw caak a rhoeh hil a tung uh coeng dongah a ngaimong uh. 15 Tedae Judah rhoek tah lunglai boeih kah Boeipa Tlungthang taengah ni a thangthui uh. Jushua tue vaengah khaw Jericho vongtung te tutal ngawn pawt tih caemtloek-seh a muk mueh ah tih a tim sak. 16 Te tah Pthen kah kongaih la a om dongah khopuei khaw a loh uh. Judah rhoek loh pilnam te muep a ngawn dongah a kaep kah tuili meng langboeng tluk aka lo te thii neh bae pet.

17 Te lamloh meng sawmko panga tluk cet uh tih Charax la pawk uh. Te te Judah rhoek long tah Toubiani la a khue uh. 18 Te pingpang ah Timothy te hmu uh pawh. Anih loh tekah hmuen ah rhalmah ngawn tah khangmai la a khueh ngawn dae, bang a thui mueh la te lamloh vawl nong coeng. 19 Makkabi kut hmuiah rhalboei la aka om Doitheus neh Sosipater te cet rhoih tih Timothy loh a caeh tak hmuencak neh hlang thawngrha hlai te a tloek rhoi. 20 Tedae Makkabi loh a rhalkap neh a boelnah neh a boel tih, a boel pa khat dongah rhalboei a khueh. Te phoeiah rhalkap thawng yakhat thawngkul neh marhang caem thawng hnih yanga aka khueh Timothy te a hlak uh. 21 Judah loh a paan te Timothy loh a ming vaengah tah huta camoe neh hnopai te Carnaim kah rhalmah im la a tueih. Te kah hmuen tah a paannah khaw caek tih a cak la a tung dongah ah kun ham rhaisang la om. 22 Tedae Judas kah a rhoi lamhma te a moe vaengah cungkuem aka hmuh te amih taengah a tueng pah dongah mueirhih neh rhihnah loh a thing. Rhal rhoek te a hnuk hmai la a lu a hoei uh tih yong uh. Amamih kha muep caepah uh thae tih amamih kah cunghang dongah khaw muep rhu uh. 23 Judas loh amaih te a thadueng boeih te a hloem. Te dongah hlang tholh rhoek te cunghang neh a ngawn tih hlang thawng samthum tluk duek uh.

24 Timothy amah khaw Dosithues, Sosipater neh a hlang rhoek kut ah cungku van. Thailatnah a len ngaih neh amah te bidip la hla mai ham a bih. Anih long te tah amih kah a manu napa khaw, a manuca khaw muep a khoh dongah te rhoek ham poek pawt ve a ti uh. 25 Amih te bidip la kan hlah bitni tila ol muep a thui tih olkhueh a cak sak dongah amah huiko daemnah ham tah Timoty te koep a hlah uh.

26 Judas loh Carnaim neh Atagatis bawkim te a paa tih pilnam thawng kul thawng nga te a ngawn. 27 Cet mai tih, te te a tim phoeiah tah Ephron la cet. Te tah khopuei khaw cak tih, Lysias loh namtom boeih kah pilnam rhaengpuei kho a sak puei. Pumlen cadong rhoek tah vongtung taengah mai uh tih khak a tungaep uh. Te vaengah caemtloek saeh khaw, hmai thalmet khaw a muk uh. 28 Tedae Judah rhoek long tah thaomnah loh rhal a taek a yak ham khaw, a kut dongah khopuei koep a loh ham khaw Khohni ni a khue uh. Te dongah a khuikah aka om rhoek thawngkul thawng nga la muep a ngawn uh.

29 Te lamloh, Jerusalem neh meng sawmrhih meng nga aka hla Scythopolis te thintawn la a paan uh. 30 Tedae Scythopolis kah pilnam tah amih taengah boethen a tueng sak tih, yoethaenah hnin ah khaw a sitlohnah neh n'saii tila teka khosa Judah rhoek laipai uh. 31 Te dongah amih te a uem uh tih hmailong ah khaw a namtu taengah boethen tueng sak bal ham a thaphoh uh.

32 Pentikos khotue phoeiah tah Idumea khoboei Gorgias taengla a thintawn uh coeng. 33 Amih te rhalkap thawng thum, marhang caem yali neh puei uh. 34 Caemtloek neh a hum uh vaengah tah Judah hlang bet duek. 35 Tedae Bacenor hlang pakhat Doithues tah marhang dongah ngol tih tongpa tang la om. Anih long te Gorgias te a tuuk hatah a hlang hing loh yok kangna saeh a ti dongah a himbai a tuuk pa tih a thadueng boeih neh a sol. Te vaengah marhang caeh Thracian loh anih te a doek tih a ban ah a boeng. Te dongah Gorgia te loeih tih Marsia a pha.

36 Edris neh a hlang rhoek kum a sen caem a tloek dongah tawnba neh om uh. Te dongah Boeipa amah te amih kah patai neh caemtloek vaengkah mawtkung la a om te han tueng sak tila Judas loh Boeipa te a khue. 37 A napa rhoek kah ol bangla caemtloek ol te a laa neh a huel uh. Gorgias kah caem rhoek te a ngai-uep pawt vaengah a muk tih a yong sak.

38 Judas loh a rhalkap rhoek te a coi tih Adullam la cet uh. A hnin rhih nah a pha tom coeng dongah, amah khosing bangla amah ciim uh tih Sabbath pahoi a yaeh uh.

39 A vuen khohnin ah tah a kueknah te om coeng. Judas neh a hlang rhoek te rhal ah aka duek rhoek kah rhok te loh tih, a napa rhoek kah phuel ah amah hnuiko taengah yalh sak ham a khuen uh. 40 Te vaengah aka duek rhoek hnidung khuiah tah Jamnia mueirhol kah hmolung te boeih a hmuh pah. Te te Judah rhoek loh a oi ham khaw olkhueng loh ngaih pawt dae ta. He kah hlang rhoek a duek khaw he kawng dongah ni ti he a caih la tueng mai coeng. 41 Te dongah duengnah neh lai aka tloek kung Boeipa kah khosing te boeih a uem uh. Amah loh aka thuh uh khaw boeih a phoe. 42 Te phoeiah tholhnah saii uh mai sitoe cakhaw boeih khoe sak hamla rhenbihnah neh mael uh tih thangthui uh. Hlangcong Judas long tah pilnam te tholhnah lamloh loeihnah ham amamih tuemsom uh saeh tila a thaphoh. Rhal ah aka duek rhoek tholhnah phu metla a om khaw amih loh a mik neh a hmuh uh coeng. 43 Hlang khat phoeiah pakhat loh tangka thoh te khaw a coi vaengah cak drachmas thawng nit lo tih tholh dawthnah ham, Jerusalem la a pat. Thohkoepnah kawng dongah nih he khaw a then neh hinyah kap a saii. 44 Aka cungku rhoek te thohkoepnah hamla lamtawn pawt koinih rhae saii mahpawh. Aka duek ham thangthuinah he khaw a honghi neh hlang ang bibi lam ni a om eh. 45 Pathen ming neh aka ip tih aka yalh rhoek ham rhuepomnah he ni a sawt coeng. Te tah cim tih poeknah khaw a caih la om. Te dongah aka duek hamla dawthnah te a khueh pah. Te daengah ni a tholhnah khui lamloh a loeih uh eh.