1 Judas neh a lambong rhoek te Samaria pingpang ah om tila Nicanor loh a yaak vaengah a dingsuek la duemnah khohnin ah tloek hamla mangtaengah a khueh. 2 Anih aka vai Judah rhoek loh amah te a hloep uh tih, “Tlungal neh muenying muenyang lamtah phae aih boeh. Hno cungkuem aka hmuh loh a hinyahnah tih a tloe khohnin lakah a cim sak khohnin te tah hinyanah mai saw,” a ti na uh. 3 Rhaepthum la aka halang loh, “Sabbath hnin tuem hamla ol aka pae vaan Khohni khaw om tang nim,” a ti nah. 4 Te dongah, “Boeipa amah hing tih vaan ah Khohni la om coeng, amah long kaimih he a hnin rhih dongah yaeh hamla ol m'paek coeng,” a ti nah hatah,

5 Kai khaw diklai ah khohni la ka om coeng, na pumcumnah te lo uh lamtah manghai kah bitat mah saii uh ka ti,” a ti nah. Tedae a mangtaengnah tueilaeh koi te a thaihtak la a thoeng pa thai moenih.

6 Nicanor tah a khuetnah hil ah oek uh tih, a thinlennah soah Judas neh a rhalkap rhoek a tanah lungpang te ling hamla cai. 7 Tedae Makkabi tah Boeipa lamkah bomnah om bitni tila ngaikhueknah neh a pangtung te a paa tlaih moenih. 8 Gentile rhoek kah a tloeknah te rhih boel lamtah, lamhma ah khaw vaan lamkah bomnah a pai te an lungbuei ah khueh uh, Tlungthang Boeipa loh amih soah tannah m'paek ham te so uh,” tila a thaphoh. 9 Amih te tonghma rhoek kah olkhueng nen khaw a thaphoh tih tanah dang ham a thingthuelnah te khaw amih a yaak sak dongah amih te thahluenah muep a paek. 10 Amih kah rhalthennah a huek phoeiah tah boesoepnah te a khueh. Te vaengah Gentile rhoek loh amamih kah olhlo a phaenah kawng te khaw a phoe pah. 11 Amih te photling neh cai lakah khaw rhalthennah ol dongkah thapaeknah nen ni a mih pumcumsak. A mangtuk mangthui neh, aka tueng tangnah loh amih te ko boeih a hoe sak.

12 He he Onias loh a hmuh. Anih he khosoih ham la, hlangcong neh hlang then la om coeng. A khuetnet la cal tih a camoe lamloh boethen neh phaep uh coeng. Anih loh Judah pum boeih hamla kut a phuel tih thang thui. 13 Te vaengah mah muei phek la a tloe pakhat phoe bal. Anih te a sampok neh, hinomnah neh thingcam uh. A rhuepomnah neh saithainah kho khobae rhambae la om. 14 Te vaengah Onias loh, “Hekah hlang tah Israel imkhui aka lungnah tih pilnam neh khopuei cim ham muep aka thangthui, Pathen tonghma Jeremiah ni,” a ti.

15 Jeremiah loh bantang kut koe a thueng tih Judas te sui cunghang koe a paek. 16 Te te a paek phoeiah tah, “Pathen taengkah kut doe, cunghang cim la lo, na thimkalh boeih khaw te nen ni na tloek eh,” a ti nah.

17 Judas kah ol loh a thaphoh uh dongah, bahoeng hapcawh uh tih thadueng khaw muep a huek pah. Cadong rhoek kah hinglu tah rhalthennah a haenghang pah. Te dongah rhaeh mailai ham pawt tih rhalthen la tloek ham a poek uh. Thinomnah boeih neh a kut, kut ah hnueih uh thae hamla ol a tloek uh. Khopuei rhokso neh a bawkim tah maeh la a mop uh coeng dongah. 18 Amih te a yuu a ca, ngannu nganca neh huiko kawng dongah hnorhih la a phueih moenih. Lamhma la rhoso a tim ham kawng dongah ni a mawn uh. 19 Khohoeng ah mawnnah a hmuh dongah khaw khopuei khuikah aka om rhoek kah ngaihmangnah he a yol mai moenih.

20 A taengla aka lo ham te boeih a hmuh coeng. Rhal rhoek te khaw a kut dongah rhel om coeng, a rhalkap rhoek te khaw caemtloek neh yoei coeng. Namtlak ah vuei boeih a khueh tih, a vae ah marhang caem boeih a pai sak coeng. 21 A hmai ah khawk a om pah tih, rhalkap soeprhae, vuei tlung neh a om te Makkabi loh a hmuh vaengah tah vaan la a kut a phuel tih kopoekrhai hno aka saii Boeipa te a khueh. Anih long tah rhal tanah he rhalkap rhangnen moenih, Boeipa rhnang nen ni. Amah aka tingtawk tah tannah a paek ti khaw a ming. 22 Boeipa te he ol neh a khue tih, “Aw Boeipa, Judea manghai Hezekiah tue vaengah khaw na puencawn na tueih tih amah loh Sennakherib rhaehhmuen ah hlang thawng ya sawmrhet panga a ngawn ta. 23 Te dongah vaan kah Khohni aw puencawn then han tueih laeh. Kamih hmai kah he mueirhih neh thuennah taekyak lah. 24 Na hmuen cim rhup tulh ham soehsalnah neh aka lo rhoek khaw na ban tha loh ngawn saeh,” a ti. He ol neh a thangthuinah te a bawk sak.

25 Nicanor neh a lambong rhoek te olueng neh, caemtloek laa te khong uh. 26 Tedae Judas neh a lambong rhoek long caemtloek kah rhal te Pathen khuenah, thangthuinah nen ni a doe uh. 27 Te dongah a kut neh a hnueih vaengah a thinko tah Boeipa taengah thui. Te vaengah hlang thawng sawmthum thawng nga tluk a cungku sak. Te dongah Pathen a pumphoenah rhangneh a kohoe uh.

28 A tatvuetnah a poeng phoeiah omngaih mael uh. Te vaengah Nicanor neh pumcumnah cungkuem neh a rhok la a yalh te a hmat uh. 29 Te vaengah tah yuhui uh tih he uh. A napa rhoek kah olka neh Khohni Boeipa te a uem uh.

30 Pum neh hinglu te a pilnam kah tungaepnah aka hmoel yoeyah hlang, a camoe lamloh a pacaboeina taengah boethen aka khueh hlang loh Nicanor kah a lu neh a ban te rhaih tih Jerusalem la khuen ham ol a paek. 31 Jerusalem a pha vaengah tah a pacaboeina te tun a khue tih khosoih rhoek te hmueihtuk hmaiah a pai te. Te vaengah rhalmah im aka om rhoek te khaw a tah. 32 Te phoeiah a koevoeinah te Tlungthang im cim la kut aka thueng hlang rhong Nicanor kah a lu neh a ban te amih taengah a tueng. 33 Pathen aka mingmueh Nicanor ka a lai te khaw a tloek tih, vaa taengah aipueng la vuelh ham a hoei pah. He tah rhokoso taeng a ang a sop phu coeng. 34 Te vaengah vaan la boeih oeloe uh tih amah aka phoe Boeipa te a uem uh. “Amah kah hmuen cim poeihlak pawt ham aka khoem Boeipa tah a yoethen pai,” a ti uh. 35 Nicanor kah a lu te rhalmah im a tai pah tih Boeipa kah bomnah kawng te hlang boeih ham miknoek ni tila a cimphan la a tueng sak. 36 Rhangpuei loh oltloeknah a khueh uh tih te khohnin te dalh uh tlaih pawh. Te tah Aramic loh Adar hla om tih Mordecai hnin hlanah te a khueh uh.

37 He tah Nicanor taeng lamloh hno aka thoeng te pawn ni. He lamlong tah khopuei te Hebrew rhoek kah khohut la om coeng. Te dongah ka cil he ka bawt sak. 38 A then la thui tih thuinuet ham ni kamah long ka ngaihnah a om. Then pawt tih vawt cakhaw ka sai thai khuiah ni ka saii van ngawn. 39 Yu amah bueng ok he rhih hamla om, tui tangsoeng ok khaw rhih hamla om bal. Tui neh yu neh thoek vaengah tah didip tih hlihlim, hlang khaw a omngaih sak. Te vangbangla he cil kah a then khaw a bibi kawng aka tae rhoek kah a hna ah tah ngaingaih koi la coeng. He nen he bawt mai pawn saeh.