SAMUEL CABU
A Pabae Nah
(The Second Book of Samuel)
Cabu Kawng
Samuel cabu a pabae he khaw a pacuek kah ngencawn ni. David a manghai tue 1010 -970 b.c. vaengkah te a tael. David kah a boei a mang neh rhuepomnah khaw, a tlaknah khaw a tael dongah khokhuen cil aka tae boeih ham thaphohnah neh rhalrhingnah la om. Pathen kah a coelh vanbangla Israel manghai rhoek boeih lakah khaw David long caemtloek vaengah rhal a ta ngai. Aram kah khopuei la Jerusalem a saii, a im a sak, pipi thingkawng khaw te lamte a khuen. Pathen loh rhalmongnah a paek tih David kah cadil khui lamkah manghai la phat om saeh a ti. Te lalah khaw David loh hlang yuu a rhawt pah tih, amah tholh dah a ngaih uet ah uepom la aka om, ommongsitoe hlang te a ngawn. Te dongah David kah tholhnah loh Boeipa ni a veet coeng. Te dongah David imkhui te boekoeknah neh thekthek a phen pah. Cabu a bawtnah ah Pathen dongah pangtung atah thaomnah la coeng tih, altha atah puencaknah a om te a tueng sak.
Sawt Yoeinah
David rhaltanah 1.1—10.19
David puencaknah 11.1—20.26
David kawng a tloe 21.1—24.25
1
Saul A Duek Vaengkah Laikung
1 Saul a dueknah hnukah David te Amalek a tloek lamkah ha mael. Te vaengah David te Ziklag ah hnin nit om. 2 Hnin thum a om phoeiah Saul taengkah hlang te caem lamkah tarha ha pawk. A himbai te a pawnsoem la a lu dongkah laipi neh David taengla ha pawk vaengah lai la yalh tih a bawk. 3 Anih te David loh, “Me lamkah lae na pawk,” a ti nah.
Te dongah amah te, “Israel caem lamloh ka yong,” a ti nah.
4 Te dongah anih te David loh, “Olka aka om te kai taengah thui laeh,” a ti nah hatah pilnam te caemtloek lamkah rhaelrham tih pilnam muep a duek te khaw, Saul a duek te khaw, a capa Jonathan a duek khaw a thui pah.
5 Te dongah amah taengla aka puen cadong te David loh, “Saul neh a capa Jonathan a duek te me tlam lae na ming?” a ti nah.
6 1Sa 31.1-6; 1Kh 10.1-6Amah taengla aka puen cadong loh, “Gilboa tlang la ka thoeng rhoe ka thoeng. Te vaengah Saul te amah kah caai dongah hangdang tih leng neh marhang caem boei rhoek loh anih te tarha a cuuk thil uh. 7 Te vaengah a hnukla ha mael tih kai m'hmuh hatah ng'khue tih, ‘Kai ni he ue,’ ka ti nah. 8 Te phoeiah kai te, ‘Nang ulae,’ a ti. Te dongah anih te ka doo tih, Kai ‘Amalek ni,’ ka ti nah.
9 “Te vaengah, ‘Kai taengah pai lamtah kai he n'duek sak laeh, duekrhui loh kai n'tuuk tih ka khuiah ka hinglu khaw khak om pueng he,’ a ti. 10 Tedae a cungku coeng he tah hing mahpawh tila ka ming dongah anih te ka pai tih ka duek sak. Te phoeiah a lu dongkah rhuisam neh a ban dongkah cak ka loh tih ka boei taengla pahoi kang khuen,” a ti nah.
11 Te dongah David loh a himbai te a paco tih a phen hatah a taengkah hlang rhoek long khaw boeih a rhoi uh. 12 Cunghang neh a cungku uh coeng dongah Israel imkhui ham khaw, BOEIPA kah pilnam ham khaw, Saul ham neh a capa Jonathan ham khaw a rhaengsae uh. Rhap uh tih kholaeh duela a yaeh uh.
13 Te phoeiah amah taengla aka puen camoe te David loh, “Nang me lamkah lae,” a ti nah hatah, “Kai tah Amalek yinlai, hlang capa ni,” a ti nah.
14 Tedae anih te David loh, “BOEIPA kah a koelh te thup hamla kut na hlah te balae tih na rhih pawh?” a ti nah.
15 Te phoeiah David loh cadong pakhat te a khue tih, “Thoeih lamtah, cuuk thil,” a ti nah.
Te dongah a ngawn tih duek.
16 Anih te David loh, “ ‘BOEIPA kah a koelh te kai loh ka duek sak,’ na ti tih na ka loh namah taengah a phoe coeng dongah na thii khaw namah thii vanbangla namah lu soah tla saeh,” a ti nah.
17 Saul neh a capa Jonathan te David loh rhahlung neh a rhaengsae. 18 Jos 10.13Te dongah Jashar cabu dongkah a daek liva laa he Judah ca rhoek a cang ham a thui.
19 Israel kirhang hlangrhalh nang loh,
hmuensang ah balae tih a rhok la a cung uh.
20 Gath ah na puen pawh,
Ashkelon tollong ah khaw na phong pawh.
Philisti nu loh n'kokhah ve
pumdul nu rhoek sundaep uh ve.
21 Gilboa tlang ah buemtui tla boel saeh,
nang soah khotlan khaw bo boel saeh.
Saul kah photling, hlangrhalh photling te
na tuei dongah khocang hmuen loh
situi nen khaw koelh boel saeh.
22 Hlangrhalh tha neh salaem thii he,
Jonathan kah liva loh
a hnuk la balkhong tak pawt tih
Saul kah cunghang khaw kuttling la a mael moenih.
23 Saul neh Jonathan lung uh rhoi.
A hing khuiah naepnoi rhoi tih
a duek vaengah tuiphih pawh.
Atha lakah yanghoep rhoi tih,
sathueng lakah a na rhoi.
24 Nangmih a lingdik neh omthennah aka bawn tih,
na pueinak dongah sui cangen neh
aka cam Israel nu rhoek loh, Saul te rhah uh lah.
25 Na hmuensang kah Jonathan te,
hlangrhalh rhoek loh caemrhal laklo ah
a rhok la a cungku sak uh.
26 Ka manuca Jonathan nang ham kai n'daengdaeh.
Kai taengah na hlahmae sut tih,
yuu kah lungnah lakah khaw kai ham tah,
nang kah lungnah ni khobaerhambae coeng.
27 Balae tih hlangrhalh rhoek a cungku uh vaengah,
caemtloek kah hnopai khaw a paltham.