1 Te phoeiah tah manghai te a thintoek vik daeh. Te vaengah Vashti kawng khaw poek pawh. Anih a cal neh metla a thui te khaw poek voel pawh. 2 Te dongah manghai kah a sal rhoek loh, “Hlangthen neh aka haam huta te manghai ham tlap saeh. 3 Ram khuikah paeng tom ah khoboei tuek uh lamtah hlangthen neh oila nu te tuek saeh. Amih te Susa kah huta im la hang khuen saeh. Amih te manghai loh huta aka tawt la a khueh hlueikhu boeih taengah khueh saeh. Te vaengah amih te sitha neh a ngoe te boeih pae saeh. 4 Te vaengah manghai loh a ngaih te tah Vashti yueng manghainu la tloep om saeh,” a ti nah. Te te manghai long khaw a ngaih te a saii tangloeng.

5 Te vaengah Judah hlang pakhat tah Susa khopuei ah om. Anih tah Benjamin koca lamkah Kish cadil, Shimei kah a ca, Jair capa Mordekai ni. 6 Anih te Babylon manghai Nebuchadnezzar loh Jerusalem lamkah tamna la a khuen. 7 A taengah a manuca Aminadab canu Esther aka ming nah a cacah la a cun. A manu napa a duek phoeiah tah anih loh a khuen tih a hula due amah taengah a om sak. Te hula tah a suisak khaw then.

8 Manghai kah olhoe te a khuen van nen tah hula boeih te Susa khopuei kah Gai taengla a khuen uh. Anih taengah te huta thongim om. Te dongah Esther khaw Gai taengla a pha. 9 Anih te mikcop la a om pah dongah anih ham te sitha neh a buh khaw a paek. Te vaengah hlang parhih tah manghai im lam loh a tuek sak. Anih long te hula rhoek huta rhoek omnah im a then la a tukkil.

10 Te vaengah Esther loh a ram neh a pilnam te a hnilh moenih. Mordekai long khaw anih poek khuep ham a uen dongah. 11 Mordekai khaw hnin takuem huta rhoek im tol ah pongpa tih Esther metla a om khaw a dawn.

12 Hla hlai nit a lo phoeiah tah huta te manghai taengla a caeh ham om coeng. Te vaengah tue ah thoeihcamnah khohnin khaw boeih coeng. Hla rhuk khuiah ah amih te myrrh neh a hluk uh. Hla rhuk te bo-ul neh huta kah sitha neh a hluk. 13 Anih te manghai taengla a caeh vaengah a tuek hlang kut dongah a khueh tih manghai im kah huta im la a hnicu khaw pahoi a khuen sak. 14 Anih te hlaem ah tah huta im kah hlueikhu boei Gai taengla a pha. Anih te manghai loh a ngaih dongah a ming a khue hlanhil a taengla cet pawh.

15 Mordecai maya Aminadab canu Esther tue a pha vaengah tah manghai taengla cet van. Anih long tah huta aka dawn hlueikhu boei Gai kah ol te pakhat khaw aal pawh. 16 Te dongah Esther he hla hlainit dongah ah tah manghai Artaxerxes taengla cet. Te vaengah Artaxerxes he kum rhih manghai coeng. 17 Manghai loh Esther a lungnah tih oila boeih lakah khaw maelhmaithen a dang dongah anih te boeinu rhuisam a khuem sak. 18 Te phoeiah manghai loh Esther te imbuh a cah tih a hui boeih hamla hnin rhih khuiah buhkoknah a saii pah. Amah kah a taemnah tue khuiah tah mangmu khaw boeih a loeih sak.

19 Te vaengah Mordekai tah vongup khuah thotat. 20 Esther long khaw Mordekai kah uentonah bangla a ram te lakhla pawh. Tedae Pathen te a rhih tih a olkhueng te a tuem. A khuiah a om bangla amah long khaw a saii. Te dongah Esther loh a khosak a hloeh la kho boe pawh.

21 Te vaengah manghai taengom, hlueikhu boei loh manghai Artaxerxes te ngawn ham a taeng. Tedae Mordekai loh vik a ming dongah a thin toek. 22 Mordekai loh a ming bangla olka te Esther taengla a thui tih a rhalrhing sak. 23 Te dongah koe a cae tih hlueikhu rhoi te a kui-ok sak. Te phoeiah Modekai thangpomnah neh hnothen tuengnah te poekkoepnah khueh hamla manghai cabu dongah a khueh sak.