1 Te tla a saii te boeih te Mordekai loh a ming vaengah a himbai a phen tih tlamhnin a yil. Hmaibu neh phul tih khopuei longpuei ah a pang ol neh vikvuek uh. 2 Manghai vongup a pha tom daengah ni paa pueng. Manghai vongup khuah he tlamhni aka yil tih hmaiphu aka phul he a kun sak moenih. 3 Ram tom ah manghai kah olhoe te a tai vaengah tah Judah rhoek lakliah kopangnah, nguekcoinah, rhungrhahnah muep om. Te vaengah tlamhnin neh hmaiphu te a yil uh.

4 Te dongah manghainu kah tanu rhoek neh hlueikhu boei rhoek te cet uh tih a puen pah uh. Aka om hno te a yaak vaeng aka kodang ah muep lakueng. Mordekai taengah khaw hlang a tueih tih tlamhni yueng la himbai a thak sak dae ngaih pawh. 5 Te dongah Esther loh a taengah aka om hlueikhu boei Hachratheus Mordekai taengkah olka te rhep cae hamla a tueih. 7 Tedongah Mordekai loh a taengah aka thoeng hno khaw, Judah rhoek a milh atah manghai thakvok dongah cak talent thawng rha paek ham Haman loh a kam te khaw a thui pah. 8 Amih thup hamla Susa ah ca a tai te khaw Esther tueng hamla a paek. Te phoeiah pilnam yuengla manghai taengah kun vetih rhennah buh ham a uen. “Hlang mailai la na om vaengah kai loh kang khut te khaw, manghai pabae Haman loh mamih n'taeng te khaw, mamih duek sak ham a bih te khaw poek. Boeipa te khue lamtah kaimih yuengla manghai te voek laeh. Kaimih he dueknah lamloh n'khang laeh,” a ti nah.

9 Te kah boeih te Hachratheus loh cet tih Esther taengah a thui pah. 10 Te vaengah amah te, “Mordecai taengah cet lamtah thui pah. 11 Namtom ram pum ah manghai boeih loh a ming coeng. A khue mueh hlang te manghai im khui la a kun moenih. Te bangla te a loeih moenih. Manghai loh mancai a doe hlang bueng ni aka daem. Manghai taengla caeh ham kai n'khue parhi te khohnin sawmthum lo coeng,” a ti nah.

12 Ol te Hachratheus loh Mordekai taengla a khuen. 13 Te vaengah Mordekai loh anih te a taengah cet lamtah thui pah. Esther nang namah bueng te Judah boeih lakliah ka sueng ni ti boeh. 14 Tahae bang vaengah olmueh la na om mai cakhaw namah neh na pa imkhui tah milh pawn ni. Manghainu la na om te tahae tue vaengkah ham moenih a, te bang te tahae kah ham moenih a? Te te u long a ming?” a ti nah.

15 Te dongah Mordekai taengah ol thak hamla Esther loh puen cawn a tueih. 16 Cet lamtah Susa kah Judah boeih loh kai yuengla yaeh uh saeh. Khothaih hnin thum neh khoyin hninthum buh ca uh boel saeh lamtah tui o uh boel saeh. Kamah neh ka tanu rhoek khaw buh mueh la ka om uh eh. Te phoeiah manghai taengla ka cet bitni. Olkhueng neh a kingkalh akhaw ka duek mai bitni,” a ti nah.

17 Te dongah Mordekai te cet tih Esther loh a taengah a uen bangla a saii.

18 Te phoeiah Mordekai tah Boeipa taengah thangthui tih Boeipa kah bibi cungkuem poekkoepnah te a phoei. 19 Boeipa, Boepa aw, a cungkuem boeih aka uk manghai la na om. Lunglai boeih he na thaomnah khuiah ni a om. Nang aka tloelh thai he pakhat khaw a om moenih. Te khaw Israel khang hamla na kongaihnah a om dongah ni. 20 Vaan neh diklai khaw, vaan hmuikah khobae-rhambae boeih khaw na saii coeng. 21 A cungkuem kah Boepa la na om, Boeipa nang aka tloelh thai he a om moenih. 22 A cungkuem he na ming rhoe na ming coeng. He tla ka saii tih Haman hlang oek taengah ka bakop pawt he mangkhaknah, oekhlawnnah neh thangpomnah ka ngaih dongah moenih. 23 Israel khangnah ham tah a kho dongkah khopha mok ham pataeng ka ngaih oepsoeh mai maco 24 Tedae ka saii moenih Pathen kah thangpomnah lakah hlang kah thangpomnah soah om pawt ham he te tlam te ka saii. Nang pawt atah mebang hlang khaw ka bawk mahpawh.

25 Pathen neh manghai boeipa aw, Abraham Pathen, na pilnam he hlun laeh. Kaimih soah aka om ka thunkha mikhmuh ah ka milh uh pawn ni. A tongcuek lamloh aka om nan phaengnah he khaw phae ham a ngaih uh coeng. 26 Na khoyo he hno boel mai. Te te namah long ni Egypt kho lamloh na hlawt. 27 Ka thangthuinah he hnatun lamtah na rho he khaw lungma ti mai laeh. Ka rhungrhahnah he omngaihnah khotue la poeh sak. Te daengah ni ka hing uh vetih na ming ka koeh uh thai eh. Boeipa aw, nang aka koeh rhoek kah hmuilai te tah poci sak boeh.

28 Te vaengah Israel rhoek tah a dueknah loh a mikhmuh ah a om coeng dongah bungbung pang uh.

29 Te vaengah Esther ah a duek dalh hil mawnnah loh a tuuk, tih Boeipa taengah cet. 30 A himbai then te a pit tih kothaenah neh rhungrhahnah himbai te a bai. Botui phutlo yuengla a lu ah hmaiphu neh aek a phul. A pum te rhep a tlayae sak. Phuekhlaknah a lungnah koek khaw a dul tih sampham la a sam a yil. 31 Amah te Israel Pathen Boeipa taengah thangthui tih, “Aw Boeipa, namah bueng ni kaimih kah manghai. Kai m'bom dae. Kamah bueng ka om tih nang pawt atah aka bomkung a om moenih. 32 Kai mueirhih khaw ka kut dongah om coeng. 33 Ka thang parhi te ka cako he namah kah ni tila ka yaak coeng. Aw Boeipa Israel he namtom boeih kah kut lamloh loeih sak laeh. Amih ham tah na olkhueh bangla boeih na saii coeng.

34 Na mikhmuh ah ka tholh uh pai tih ka thunkha kut ah nan voeih coeng. 35 Amih kah sungrhai te ka thangpom uh dongah ni. Boeipa aw, namah tah duengnah la na om pai. 36 Tahae sal khahing khuiah ka om uh khaw amih te damti uh hlan. Amih kah mueirhol neh kaimih n'daedum uh. 37 Na ka dongkah olkhueng aka phae rhung neh na rho aka poci sak rhung mai la. Nang aka koeh rhoek kah a ka buem pah ham neh na thangpomnah im kah na hmueituk aka suep sak rhung mai la. 38 mueirhol hong kah koehnah ham neh, aka duek manghai len sak yoeyah ham namtom kah a ka aka phen rhung mai la.

39 Boeipa aw, aka hing pawt taengah na maicai te hlahpham boeh. Kaimih kah cungkunah te amih uem sak boeh. Amih kah mangtaengah khaw amamih soah tlak sak. Kaimih taengah he tla aka saii te sawtkoi la tueng sak.

40 Boeiap aw poek mai lah, kamih kah phacipphabaem tue vaengah he namah ha phoe lamtah kaimih rhalthennah m'pae lah. Pathen rhoek kah Manghai boei neh ram boeih kah Boeikung aw. 41 Ka hmuilai he sathueng rhoek kah mikhmuh ah calthainah m'pae lah. Kaimih aka vathoh rhoek te thiinah ham lungbuei maelh pah. Te daengah ni amah neh anih aka yok rhoek te a khah eh. 42 Tedae na kut neh kaimih n'khang lamtah kai m'bom lah. Kamah bueng tih nang pawt atah bomkung a tloe a om moenih.

43 Namah tah a hno cungkuem mingnah na khueh. Halang rhoek kah rhimnah ka thiinah tih pumdul neh kholong kah thingkong ka tuei khaw na ming. 44 Ka kueknah khaw na ming coeng. Ka koevoeinah maehham miknoek khaw ka tuei coeng. Pilnam lakah ka phoe vaengah te la ka lu dongah ka doeng dae. Te te aek khawt bangla ka tuei tih a hoep la ka om vaengah pataeng ka bai moenih. 45 Na sal long khaw Haman kah caboei dongah khaw ka vael moenih. Manghai kah buhkoknah neh loeihnah misurtui ok ham khaw ka thangpom moenih. 46 He la n'khuen uh khohnin lamloh tahae due nang pawt atah, na salnu he kohoenah a om moenih, Abraham Pathen Boeipa aw.

47 A cungkuem soah aka om Pathen aw, phacipphabaem ol he hnatun lah. Kaimih he boethae kut lamloh n'khang lah. Ka rhihnah khui lamloh n'khang lah.