1 Tingtunnah kawtpoeng kah pilnam loh kholawknah a saii te a daeh phoeiah tah Assyria rhalboei Holofernes loh Achior te kholong hlanglang boeih kah mikhmuh ah,

2 U nang nim, Achior nang he Ephraim kah hlang vat a? Tihnin ah kaimih taengah na tonghma mai. Israel pilnam taengah caemtloeknah saii pawt ham neh amih te Pathen loh a thingthung ni tila na thui mai? Nebukhadnezzar phoeiah he pathen tloe om bal nim? A caempuei te a tueih vael amih te diklai hman lamloh a phae pawn ni he. A Pathen loh amih te khang kek pawh. 3 Mamih manghai kah tueiyoeih rhoek loh amih te hlang pakhat bang lamni m'pae mai eh. Mamih kah lambong thadueng he oel uh thai mahpawh. 4 Amih te n'hlawp vetih a tlang long khaw a thii ni a ok eh. Te vaengah a khohmuen ah a rhok khawk bae ni. Mamih loh n'tloek vaengah a khopha pataeng loeih pawt vetih bitbit milh uh ni. Te dongah ni diklai pum kah boei, manghai Nebuchadnezzar long khaw a thui. A ol he pakhat khaw yoe mahpawh.

5 Ammon hlangvat Achior nang loh ol he khungrhap la na thui. Te dongah tihnin kah Egypt lamloh aka yong koca rhoek phu hlan atah ka maelhmai na hmu mah pawh. 6 Ka cunghang neh, ka caem neh, ka cai neh ka mael vaengah ka tueihyoei rhoek loh na vae han thun bitni. Te vaengah amih kah rhok neh na yalh bitni. 7 Ka tueiyoeih rhoek loh nang te tlang la n'khuen pawn saeh lamtah puei caeh long kah tlang naeng ah n'khueh saeh. 8 Amih neh a poci hlan hil ngawn tah na duek mueh mahpawh. 9 Amih te yawk mahpawh tila na ngaiuep pueng a tah na kothae maelhmai te khaw khue a ngoe voel moenih. Ka thui coeng he, ka ol he hloo pawt vetih oltak la om ni,” a ti.

10 Te phoeiah tah Holofernes a dap khuiah anih aka tawt rhoek te, Achior tuk ham khaw, anih te Bethulia la khuen tih Israel ca taengah paek ham khaw ol a paek. 11 Te dongah sal rhoek loh anih te a tuuk phoeiah kol kah rhaehhmuen la a khuen uh. Kol lamloh tlang hmuen la luei uh tih Bethulia hmuikah sok te a pha uh. 12 Khopuei hlang rhoek loh a hmuh vaengah pumcumnah a pom uh tih khopuei lamloh tlang la luei uh. Te vaengah payai aka pom rhoek long khaw amih te a mah tih lungto neh a dae uh. 13 Te dongah tlang hmui te hlipyingnah la a khueh uh. Te phoeiah Achior neh a pin uh tih tlang yung ah a yalh sak uh daengah a boei taengla mael uh.

14 Israel ca rhoek te a khopuei lamloh a suntlak uh vaengah tah anih te a hmuh uh. Te dongah anih te a hlam uh tih a khopuei boei rhoek kah mikhmuh ah a tloeng uh. 15 Te khohnin kah Simeon koca kah Mikah capa Uzziah, Gothoniel capa Chabris neh Melchiel capa Charmis khaw om. 16 Amih loh khopuei kah patong rhoek te boeih a khue tih a ca huta tongpa khaw tingtunnah la yong uh. Achior te a pilnam lakli ah a khueh uh tih metla ol a om khaw Uzziah loh anih te a dawt. 17 Anih long khaw a hlat tih Holofernes kah ngoltunah dongah aka thoeng te khaw, Assyria mawtkung rhoek mikhmuh a cal boeih te khaw, Israel imkhui soah Holofernes a hoemdam boeih te khaw a thui pah. 18 Te dongah pilnam tah bakop uh tih Pathen te a bawk uh.

19 Te vaengah, “Vaan kah Pathe ka Boeipa aw, amih kah mangkhaknah khaw hmu lamtah pilnam kah a tlayaehnah he lungma ti mai laeh, na taengah a cim la aka rhoek taengah he na maelhmai tueng sak laem lah,” tila pang uh.

20 Te phoeiah Achior te a uem uh tih a sang la a koeh uh. 21 Uzziah loh anih rhaengpuei taeng lamloh a loh tih amah im la a khuen. A ham rhoek ham khaw buhkoknah a saii tih khoyin puet bomnah bih ham Israel Pathen te a khue uh.