1 Holofernes loh anih te, “Huta nu aw, namning sak lamtah na lungbuei ah rhihnah khueh boeh. Diklai pum kah manghai Nebukhadezzar aka bongyong boeih tah u khaw nganboh ka pae mahpawh. 2 Tahae ah khaw, tlang kah khosa boeih loh kai he m'veet pawt atah amih taengah ka cai he ka thueng mahpawh. He amamih longni a saii uh. 3 Kai taengah thui lah, amih taeng lamloh na yong tih kaimih taengla na lo he balae tih? Tahae ah tah hiluepnah khuila na lo coeng. Namning sak tihnin hlaem lamloh a voelvai hil khaw na hing bitni. 4 Nang te nganboh m'pae mahpawh. Nang tah ka boei manghai Nebukhadnezzar kah sal rhoek loh a saii bangla nang te a then lamni n'toi eh,” a ti nah.

5 Judith loh anih te, “Na sal kah ol he doe mai lamtah na sal loh na mikhmuh ah thui mai saeh. Tahae hlaem ah khaw ka boeipa taengah a hong ka thui mahpawh. 6 Na sal kah ol he na vai koinih Pathen loh nang dongah pakhat khaw a soep sak ni. Ka boeipa kah mangtaengah te thaihtak ham khaw hloo mahpawh. 7 Diklai pum kah manghai Nebukhadnezzar kah hingnah rhangneh, a thaomnah long ni mulhing boeih hoihaeng hamla nang n'tueih. Nang rhangneh hlang hing bueng loh amah te bong pawt tih, khohong rhamsa neh saelhung khaw, khohli dongkah vaa khaw hing. Nebukhadnezzar hmui kah neh a imkhui pum khaw nang rhangnen ni a om. 8 Na cueihnah neh na thoemthainah khaw ka yaak uh coeng. Te te diklai pum ah thang coeng. Ram pum ah khaw namah bueng ni na then. Caemtloeknah a longim dongah na khuet koek tila thang tangkik coeng.

9 “Na ngoltunnah khuiah Achior kah olthui bangla, a olka te khaw ka yaak uh ngawn coeng. Bethulia kah pilnam te a hlun tih namah taengkah a thui te ni amih taengah khaw a thui. 10 Te dongah ka boeipa neh boeikung aw, a thui te hnawt boeh. Na lungbuei ah kuem mai, te ta oltak ni. Pathen taengah a tholh uh pawt atah ka namtu khaw dan a tat pai moenih, amih te cunghang long khaw a cawk thai pai moenih.

11 Tedae ka boeipa tah yawk boel saeh lamtah a poeknah khaw paa boel saeh. Dueknah he amih soah tla pawn ni. A Pathen te a veet uh dongah tholhnah loh a vuei uh coeng. Boethae a saii uh tih Pathen thin a toek sak uh coeng. 12 Caak khaw a khawk uh tih tui khaw kak tom coeng. A rhamsa te ngawn hamla cai uh tih Pathen loh olkhueng neh a ha khaw caak hamla cai uh. 13 Cangvuei thaihcuek neh misur, situi parhapakhat khaw dolh hamla a ngaih uh coeng. Te la a ciim uh tih Jerusalem kah ka Pathen teangah aka thotat khosoih hamla a hoep uh dae. 14 Jerusalem kah pilnam rhoek khaw he tlam ni a om uh coeng. A hamca rhoek kah ngoltunah khuiah saithainah loh hamla puencawn khaw a tueih uh coeng. 15 Yaksaknah a pha vaengah te te a saii uh pawn ni. Te khohnin rhoe ah nang taengla han tloeng vetih na thup ni.

16 Na sal kai loh te te ka ming dongah ni amih taeng lamloh ka yong. Nang ol te thaitak sak ham ni Pathen loh kai n'tueih. Amih kawng te Pilnam boeih loh a yaak vetih diklai pum khaw a ngaihmang ni. 17 Tedae na sal he Pathen ka rhih tih khoyin khothaih vaan kah Pathen ni ka bawk. Te dongah ka boeipa nang taengah ka om mai eh. Tedae khoyin takuem tah kolvan la ka cet saeh lamtah Pathen taengah ka thangthui mai eh. Amih kah tholhnah a saii te amah loh kai taengah a thui bitni. 18 Te vaengah nang taengla ka lo vetih nang ham kan thui bitni. Te daengah ni na caem boeih te na caeh puei vetih amih khuikah pakhat khaw nang aka oel thai a om pawt eh. 19 Kai loh nang te Jerusalem na pha hil, Judea la kam mawt vetih na ngolkhoel pahoi kang hol bitni. Amih te tudawn aka tal tu bangla na vai vetih nang aka naak hamla ui pakhat pataeng om mahpawh. He he ka thui ham khaw mingnah m'paek coeng tih kai taengah a phong coeng dongah ni nang taengah thui hamla n'tueih.

20 He ol he Holofernes neh a tueihyoeih boeih long khaw a ngaih uh. Anih a hlangthen dongah khaw a ngaihmang uh. 21 Te dongah, “Diklai khobawt duela anih bangla aka cueih tih lungsak aka then huta he pakhat khaw a om moenih. 22 Te vaengah Holofernes loh anih te, “Pilnam kah a hmaila nang n'tuein he Pathen loh hnothen ni a saii coeng. Ka boeipa aka hnaep rhoek soah pocinah pai sak ham neh ka ban he tha aka om sak ham pawn ni. 23 Nang tah na suisak a then bueng kolla na olthui khaw cueih pai. Na thui bangla na saii atah na Pathen khaw ka Pathen la om ni. Nang te manghai Nebukhadnezzar im khosa lamtah diklai pum ah na ming om saeh.