NEHEMIAH
(The Book of Nehemiah)
Nehemiah Cabu Kawng
A cuekca vaengah Ezra neh Nehemiah he pakhat la om. He rhoi dongah he Pathen pilnam rhoek Babylon vangsawn lamloh a mael vaengkah, bawkim koep a saknah, Jerusalem a thohnah, amamih Pathen olkhueng dogla a kunnah kawng a tael. Aboel parhuk hil he Ezea loh vangsawn lamkah pilnam a maelnah kawng, Jerusalem ah hmueihtuk a saknah kawng, Boeipa kongaih la hmueih a nawn lamhmanah kawng a tael. Nehemiah loh Persian manghai Artaxerxes taengah boei a bi dae, Babylon vangsawn lamloh Jerusalem la aka mael pilnam kah a patangnah te a ming. Jerusalem khopuei vongka kaw boeih a hoeh uh tih vongtung khaw boeih rhawp coeng. Pathen taengah rhenah neh hoihaengnah ham a bih. Jerusalem kah khoboei bi ham neh khopuei koep sak ham khaw Artaxerxes taengah a bih thai. Tolrhum khoboei rhoek loh amah tloelh mai cakhaw hlang boeih a cului thai tih khopuei vongka neh vongtung khaw koep a thoh uh. Ezra loh pilnam hamla Moses olkhueng a tae pah, te vaengah tholh a phong uh, tun thangthui uh, boeipa kah khotue khaw koep a saii uh.Nehemiah long he thinom la bi a saii, Judah kah bawknah khaw pan a tlaih. Khlongnu khaw boeih a tueih, olkhueng loh a thui bangla Sabath khaw koep a tuem uh. Ezra neh Nehemiah cabu he 300 b.c tluk vaengah a tael.
Sawt Yoeinah
I. Vongtung thohnah1.1—7.73
A. A hmuethma sawtletnah1.1—2.20
B. Imsak tongnah 3.1—6.19
C. Hlangmi soepnah7.1—7.73
II. Bawknah tlaivongnah 8.1—13.31
A. Paipi koep thoelhnah 8.1—10.39
B. Pilnam tlaihvongnah 11.1—13.13
C. A tlaivong bingbonah 13.14-31
1
Jerusalem Lamkah Olthang
1 Hakaliah capa Nehemiah ol khaw kum kul Kislev hla vaengah om coeng. Te vaengah kai tah Shushan rhalmah im ah ka om. 2 Te vaengah ka manuca rhoek khuikah pakhat Hanani ha pawk. Amah neh Judah lamkah hlang rhoek khaw om. Amih taengah tamna lamloh aka sueng rhalyong Judah kawng neh Jerusalem kawng te ka dawt. 3 Te vaengah paeng khuikah yoethae len khui neh kokhahnah khuiah tamna lamkah aka sueng, aka sueng rhoek loh kai taengah, “Jerusalem vongtung tim tih a vongka khaw hmai neh a hlup uh coeng,” a ti uh.
Nehemiah kah Thangthuinah
4 He ol he ka yaak vaengah ka ngol tih ka rhap. Khohniyung ah ka nguekcoi neh ka om. Vaan Pathen mikhmuh ah ka yaeh tih ka thangthui. 5 Te phoeiah,
“Aw, vaan kah Pathen, YAHWEH Pathen tah len tih rhih om pai. Amah aka lungnah taeng neh a olpaek aka ngaithuen taengah paipi neh sitlohnah a ngaithuen pah. 6 Na sal kah thangthuinah te yaak hamla na hna khui tih na mik aka dai la om laeh. Kai he tihnin ah khaw na sal Israel ca ham khoyin khothaih na mikhmuh ah ka thangthui coeng. Namah taengah ka tholh uh bangla Israel ca kah tholhnah te kam phoe. Kamah neh a pa imkhui khaw ka tholh uh coeng. 7 Na taengah laikoi la ka laikoi uh coeng tih na sal Moses taengah na uen olpaek neh oltlueh khaw, laitloeknah khaw ka ngaithuen uh pawh. 8 Tho 26.33Na sal Moses ol na uen tih, ‘Boe na koek uh dongah nangmih te pilnam lakli ah kan taekyak ni,’ na ti nah te thoelh laeh. 9 Olr 30.1-5Tedae kai taengla na mael uh tih ka olpaek he ngaithuen neh na vai atah vaan khobawt la nangmih aka heh te om cakhaw amih te, te lamloh ka coi vetih ka ming om sak ham ka coelh hmuen la amih te pahoi ka khuen rhoe ka khuen ni,’ na ti. 10 Amih te na sal neh na pilnam ni. Te rhoek te na len thadueng neh, na tlungluen kut neh na lat. 11 Ka Boeipa aw, na sal rhoek kah thangthuinah taengah khaw na ming rhih ham aka omtoem na sal rhoek kah thangthuinah dongah na hna aka khui sak la om laeh. Tihnin kah na sal te khaw thaihtak sak laeh. Anih te hlang mikhmuh ah haidamnah neh pae,” ka ti. Te vaengah kai tah manghai taengah tuitul kung la ka om.