1 Tlayae kah cueinah long tah a lu te a sang la a dangrhoek pah tih, amih te hlang len lakli ah a ngolhmuen sak.

2 Hlang te a sohman kah sawt then neh koeh boeh, a sohman kah suisak nen khaw konawh aih boeh.

3 Khoi he aka ding mulhing khuiah yitkoek mai dae, aka oi khuikah a then koek hno he a saii.

4 Himbai then na bai nen khaw koevoei uh boeh, nang n'thangpom vaengah khaw pacuet uh boeh. Boeipa kah bibi he khobae rhambae la om tih, a bibi he hlang taeng lamloh vik a phah ta.

5 Diklai khaw diklai la muep ngol uh coeng tih, a poek mueh ah rhuisam aka khuem khaw muep om.

6 Uuking rhoek khaw yah a poh uh tangkik coeng tih, a thangpom te khaw hlang tloe kut ah a paek coeng.

7 Na cae hlanah tah a tholh tlap boel dae, nuemnai lamhma lamtah kamkaih ne.

8 Na hnatun hlan ah doo boeh, A tloe loh ol a thui vaengah rhol boeh.

9 Nang neh aka tu uh pawh olka te oelh boeh, hlang tholh rhoek kah laithuinah khuiah ngol boeh.

10 Ka ca ol kak neh bi te haam boeh, na suvainah a yet vaengah coelcanah om mueh mahpawh. Na hloem cakhaw na kae hae pawt vetih, na yong cakhaw na loeih hae mahpawh.

11 Aka bi khaw, aka thingthuel khaw, aka tamto khaw om, tedae a ngaihnah ni muep a pung hae.

12 Thoh hawng neh bomnah aka ngoe khaw, thadueng aka vawtih tih khodaeng aka tlung khaw om. Tedae Boeipa mik long tah amih te rhennah neh a sawt, Amih te a tlayaenah hmuen lamloh a dangrhoek.

13 A lu te a dangrhoek uh dongah a yet long khaw a ngaihmang uh.

14 Hno then neh a thae khaw, hingnah neh dueknah khaw, khodaeng neh boei khaw Boeipa taeng lamkah ni a thoeng.

15 Cueihnah neh yakmingnah khaw, olkhueng mingnah khaw, Boeipa taeng lamkah ni. Lungnah neh bibi then kah longpuei he khaw amah lamkah ni,

16 Tholhhniknah neh a hmuep he khaw hlangtholh neh a suen tih, boethae he tah laithae la aka hoemdam neh hmaih patong.

17 Boeipa kah kutdoe he aka cuep taengah tah nguel tih, a kolonah he khaw a yoeyah la khophoeng a pha sak.

18 Hlang khat he a ckinah, luthutnah neh boei, he ni anih ham khaw thangpang la a dang van.

19 “Duemnah ka hmuh coeng tih, ka khuehtawn dongah khotue ka saii pawn ni,” a ti. Tedae meyet a om ham khaw a ming moenih. hlang tloe hamla a hnoo pah vetih ni a duek eh.

20 Na olkam dongah pai lamtah a taengla mop, na bibi dongah khaw patong hil ah rhoeng puei.

21 Hlang tholh kah bibi dongah kopoekrhai sak boeh, Tedae Boeipa dongah pangtung lamtah na bi te khuituk. He he Boeipa mikhmuh ah yoeikoek mai, Kikalh rhuet ah khodaeng te boei la tlek a saii ham khaw.

22 Boeipa kah yoethennah tah hlangcuem kah thapang la om, tedongah Pathen loh yoethennah nolnol a long sak.

23 “Balae ka ngoe bal pueng tih, banglae koep a hoeikhang bal pueng eh,” ti boeh.

24 “Ka rhoeh van coeng tih, mebang tlohnah lae halo bal pueng eh,” ti boeh.

25 Khobuh hnin ah tah patangpalai a hnilh tih, patangnah hnin ah tah khobuhnah khaw poek pawh.

26 Dueknah hnin ah tah a khoboe tarhing la thung ham te, Boeipa taengah yoeikoek mai ne.

27 Khonoek khat kah citcai loh hnukbuet kah hmaenah a hnilh sak tih, Hinglung a bawtnah long khaw a khoboe a phoe sak.

28 Hlang a duek hlanah uem om ti boel daeh, Metla a bawtnah long ni hlang te a phoe pueng.

29 Na im khuila hlang tom khue tarha boeh, laithae neh thailainah he muep om.

30 Aibaem dongah varhung a koei bangla, a oek uh kah lungbuei he khaw om tih, na vawtthoeknah te rhalyuep bangla a dawn.

31 Maehtawt bangla rhongol uh tih a then khaw a thae sak, A tuengta kah pongthohnah khaw thae a pak thil uh.

32 Hmaihli loh hmai alh muep a dom tih Hlang tholh khaw thii long sak ham rhongngol uh.

33 Hlang rhalawt rhoek te ngaithuen, amih te a thae ni a poek uh a yoeyah la na ming then te ham poeih uh ve.

34 Hlang lak te na im la na khuen dae, nang hamla lai hang kawk hae vetih na imkhui ah namah te yin hlang na ng'khue ve.