1 Lungpaat aka ben hlang boeih te a tii loh a koelh, Te dongah hlang hoem neh aka yok uh khaw amah moek.

2 Hno a rhih aih khaw namah hamla thuek boel lamtah, namah lak aka tlung aka boei ngai nen khaw yok uh boeh. Me tlam lae ampul neh thi-am te a benbo uh thai eh? am rhoi te duel uh vetih rhek hae ni ta.

3 Boei long tah boethae a koel lalah khaw tholh la nawt pawh, Tedae khodaeng tah hlang khoboe a yok vaengah pataeng rhenbihnah nen ni a koep.

4 Anih te na hnonah sitoe cakhaw, boei long tah namah n'yoop vetih na ngoengaihnah a om vaengah namah te n'hnoo ni.

5 Bet na khueh vaengah tah nang taengah om vetih olpung muehla na khuehtawn te boeih han caep ni.

6 A ngoe vaengah tah nang te n'thainah vetih, na taengah cuepcuep a nuei doela nang n'thaphoh ni. Dingsuek la nang m'voek vetih, “Balae na ngaih dae?” a ti ni.

7 Butui antui neh nang n'kop vetih voeinit voeithum la nang te n'caep ni, a hnukkhueng tah nang taengah nuei ni.

8 Longhmang la m'mawt pawt ham ngaithuen na omngaih li vaengah khaw kunyun laeh.

9 Hlang rhoei long n'khue vaengah khaw cue uh, te daengah ni tlektlek n'khue eh.

10 Loloh mop uh boeh nang te hnuenah ve, cakdawk la pai aih boeh nang te vik n'hnilh ve.

11 Anih neh vanat la om ham khaw cai boeh, olthui a sen te khaw tangnah boeh. Puet a cal nen te nang n'noem cai vetih cuep a nueih vaengah nang te n'khe ni.

12 Ngukngak long tah na olhuep te tuem pawt vetih, nang ngawn ham neh thong hlak ham khaw m'hmaai mahpawh.

13 Namah dawn uh lamtah rhep ngaithuen, na cungkunah ham ni na pongpa coeng te.

14 He ol he na yaak vaengah tah, na ih neh na thoh ah khaw, Na hing khui boeih Boei pa te lungnah lamtah Na daemnah hamla amah te khue.

15 Mulhing boeih loh amah bang te a lungnah tih, hlang boeih long khaw a imben te a lungnah rhuem.

16 Hlang hing boeih khaw amah hui neh yok uh tih, pilnam khaw amah mih bang van ni tih a ben uh.

17 Metlam la uithang neh tuca te benbo benpang, hlang cim neh hlangtholh aisat te savisava.

18 Ui neh pongui laklo ah rhoepnah koe om a? Te dongah boei neh khodaeng rhoep uh thai aya?

19 Khosoek kah khohong marhang he sathueng kah maehham la poeh tih, khodaeng khaw boei rhoek kah buhham la poeh.

20 Tlayaenah te koevoeinah loh a tuei tih, khodaeng khaw boei loh a tuei.

21 Boei tah a cungdo vaengah a paya loh a duel, tlayae tah a cungkung vaengah a paya loh phawn a tulh.

22 Boei tah paloe koinih ka hlawt ham khaw muep a caeh pah tih a hong a thui akhaw boeih a tang sak uh. Tlayae tah a paloe vaengah amah te a hnael uh tih, oltang a thui akhaw a hnakaeng pa uh pawh.

23 Boei te a cal vaengah tah hil boeih a phah uh tih a olthui te khomai so duela a pacuet uh. Khodaeng tah a cal vaengah, “U long nim a ngaih pah van” a ti uh. Te dongah paloe mai cakhaw hnap a talh uh.

24 Boei he khaw tholhnah lamloh a cue uh atah then ngawn, khodae khaw lailak kah poeknah a hing tah thae coeng.

25 Thae cakhaw, then bala mai cakhaw, thinko kah long he maelhmai ah a phoe sak.

26 Lungbuei omngaih kah miknoek tah maelhmai ah hlampan tih, Laithae kah thuidoeknah long tah kopoek a tloh sak.