1 Palyal he khaw lung thae neh vai uh, Anih te hlang tom loh rhaidaeng la lu a hinghuen thil.

2 Palyal he aek bangla rhalawt la om, te te aka taek boeih loh a kut a khong ni.

3 Capa toel tloel kah ana pa om he khaw rhaidaeng, te bang canu aka cun khaw a hnmanah la om.

4 Canu olngai tah amah loh a va then a dang, Tedae rhaidaeng la kho aka boe loh ana pa ni a pae sak.

5 Mommom aka cu nu loh a napa neh a ya yah a bai, Te dongah boktlap la ming a thae sak.

6 A tuetang mueh kah olthui thingka he rhungrhah tue kah phungding bangla om. Teae phaepnah neh toelnah he tah, a tuetang boeih ah cueihnah la om.

7 Khosak then neh aka rhoeng camoe loh, a manu napa kah khodang la a cun khaw a dah.

8 Aka koevoei mangkah camoe long tah, a manu napa kah boeimang khaw dawih a koelh.

9 Hlang ang n'cang puei he khaw, khoi-ut neh paikaek m'ben banghui pawn ni. Aka ip muelh te a ihnah lamloh haeng banghui pawn ni.

10 Hlang ang taengkah cil thui pah he khaw aka ngam taengah thui banghui mai pawn ni. Te dongah a bawtnah ah tah,” Balae te,” a ti.

11 Aka duek te khaw rhah mai, vangnah loh a nong tak coeng, ka ang khaw rhah mai, anih te lungmingnah loh a nong tak coeng. Aka duek tah a duem coeng dongah, a rhoeh ah rhah aih, Tedae hlang ang kah khosaknah tah dueknah lakah thae ngai.

12 Aka duek ham te hnin rhih khuiah ni na rhah mai eh aka ang neh Pathen aka ming ham tah A hing tue khui puet na rhap pueng ni.

13 Ko aka talh taengah khaw muep cal boeh, lungcuei aka om mueh taengah lai-om boeh. A lakhla om ne, namah te n'lawn ve, te daengah ni a kopoek a talh khaw na patang pawt eh.

14 Kawnlawk lah balae aka rhih bal pueng, Te tah hlang ang moenih a?

15 Laivi, lungkaeh neh thi nuei khaw om dae hlang ang tanglong lakah tah yanghoep pueng.

16 Thingpang a longlae he im dongah khak a khing atah, lingluei long khaw a hling hlawk sak moenih. Thin aka caak long tah a poek tih ko a tam dongah rhainah khuiah khaw rhihnah khueh pawh.

17 Lungming poeknah dongah lungbuei aka hol tah taplai then neh bangbueng a pihling sak bangla om.

18 Hmuensang kah tanglung a khueng loh Khohli a oel thai pawt banghui la, rhalyawp lungbuei nen ni hlang ang loh a amah eh, mebang rhihnah khaw khak oel thai mah pawh.

19 Mik a hun vaengah mikphi long, thinko a hun vaengah khaw yakhuetnah thoeng.

20 Lungto aka dong loh vaa a hut tih, Paya aka soehsal loh a payanah te a phae.

21 Paya taengah cunghang na phong sitoe cakhaw, koep na khueh ham te mawn moeh.

22 Paya taengah ka na ang mai cakhaw, lakueng boeh, moetheinah ham coeng thai pueng. Tedae soehsalnah, thinthahnah, olhuep phoenah, hnukpohnah he na haeh khungdaeng coeng atah, He olka long he paya khaw boeih a haek ni.

23 Imben te a khodaeng vaengah nang n'uepnah saeh, Te daengah nih a khueh tawn vaengah khaw na omngaih eh. Ngaihmang tue vaengah anih te paipuei, Te daengah nih anih nen te rho hmaih na pang eh.

24 Tuihu hmai khu kah a ling he hmai lakah lamhma, thii longnah lakah tohhaemnah khaw lamhma bal.

25 Paya hlipdah ham te ka yak pawh, Te dongah anih te ka thuh tak mahpawh.

26 Tedae anih rhangneh kai taengla nganboh halo atah aka ya boeih long khaw anih te ngaithuen saeh.

27 U long nim ka ka he khoep ham buem lah vetih, ka hmui dongah rhodaek khoep han soei lah ve. Te daengah ni olka dongah ka cungku pawt vetih, ka olka loh kamah he n'ngawn pawt eh.