1 Kai tah hno pathum soah ka hmae coeng, Te tah Pathen neh hlang mikhmuh ah khaw then Paca boeinah neh tanu lakli kah kotloepnah khaw, imben neh paya la om nah khaw, Yuu neh va laklo ah rhoeprhui la kho sak nah khaw.

2 Pilnam kah a hui khuikah ka thinah pathum tah, A bihduen neh aka cawklawih hlang khaw, Laithae laidang neh aka boei khaw, Patong hlang ang aka samphaih khaw ka thinah.

3 Na camoe vaengah a hong te puet na tung koinih, metlam lae na patong vaengah pakhat khaw na tung thai eh?

4 Sampok vaengkah laitloek ol tah dueng tangkik tih, patong long tah cilsuep then a khueh ham tueng pai.

5 Patong vaengah tah cueinah neh rhoeprhui tih, hlangcong he khaw yakmingnah, cilsuep neh rhoep.

6 Muep hmuhnah he Patong kah rhuisam la om tih, Boeipa rhihnah te a hoemdamnah la om bal.

7 Ka poek thai ngawn coeng, pako rhoek te a yoethen ka ti, A parha nah khaw ka hmuilai loh a thui. A ca rhoek soah aka omngaih thai hlang, a rhal rhoek a cungku te a hmuh duela aka hing.

8 A yuu aka cueih tih aka khuel hlang neh aka hing, Laak neh vaito aka bok tih lai aka nok pawt tah a yoethen. A hmuilai dongah tholhnah aka saii pawt tih, amah hmuikah hlang hmuiah aka thotat pawt tah a yoethen.

9 Paya aka hmu hlang neh aka hnatun rhoek kah, yaak ngaih la aka cal hlang tah a yoethen.

10 Cueihnah aka dang he bahoeng len coeng dae, Boeipa aka rhih lakah aka tanglue ngai a om moenih.

11 Boeipa rhihnah long tah a cungkuem khaw a poe, Te te aka khueh hlang te u nen lae n'thuidoek bal eh.

12 Boeipa rhihnah tah amah lungnah ham a tongnah la om, Tangnah khaw amah taengla ben ham a tongnah ni.

13 A hma om dae, thinko kah a hma tah tluk pawh, boethae khaw om dae, boethae nu tah tluk pawh.

14 Patangnah khaw om dae, lunguet taengkah patangnah tah tluk pawh, Tawnlohnah khaw om dae, thunkha kah tawnlohnah ta tluk pawh.

15 Rhul sue lakah aka thae sue khaw om pawt tih, huta kah kosi lakah aka thae thintoeknah khaw om pawh.

16 Huta thae neh khosak lakah atah, Sathueng tuihnam neh khosak te ka ngaih bet.

17 Halang nu loh a muei a sak a tho a vael tih, a mael hmai tah lopam bangla hmuep.

18 A va loh imben taengah a ngol vaengah, khuekhue a huei khaw phah thai pawh.

19 Huta kah konaehnah te thuidoek vaengah tah konaehnah boeih he a yit ca mai pueng ni. Hlang tholh kah hmulung tah anih soah tla nawn saeh.

20 A va hlang mong ham tah olyet nu he, laivin dongkah patong khokan banghui pawn ni.

21 Huta kah sakthen dongah khaw man boel lamtah, a khuehtawn dongah khaw huta te nai boeh.

22 A yuu loh a vaa te a duel vaengah kosi khaw, sawtrhoelnah neh yahpohnah tah tangtae coeng.

23 Kopoek khaw moelh, maelhmai khaw hmuep, Te dongah thinko a phatnah he huta thae lamkah ni. Ban khahoei neh khuklu tangdawtnah khaw, a yuu loh a va omngaih la a khueh pawt lamkah ni a thoeng.

24 Huta a tholhnah lamloh te te a tong coeng tih, Anih rhangneh mamih khaw boeih n'duek uh.

25 Tui khaw cae sak boel lamtah huta thae kah olcal khaw hmaitak pom sak boeh.

26 Na thuinuet bangla a pongpa pawt atah, anih taeng lamloh namah nong mai laeh.