1 Cungkuem boeih Pathen aw, Kaimih soah he rhennah khueh lah.

2 Namtom boeih taengah khaw, namah rhimomnah te khueh pah lah.

3 Kholong namtom taengah na kut thueng lah, amih loh na tlungthangnah te hmuh van saeh.

4 Amih taengah na cimnah tuengnah nan hnonah bangla kaimih taengah thangpomnah tueng ham amih hnonah lah.

5 Ka ming uh bangla ming uh van saeh lamtah Boeipa namah phoeiah tah Pathen a tloe om pawh.

6 Minoek thai neh a tloe kopoekrhai bibi te pae lah

7 na kut neh bantang ban loh rhuepomnah tueng sak saeh

8 Na thintoek te haeng lamtah kosi te khaw sah laeh

9 rhal te phae lamtah thunkha te khoe laeh.

10 Thintawn khohnin neh, tuentahnah tue khaw poek laeh, na tlungalnah khoboe te pilnam loh tae van saeh.

11 Aka sueng duen khaw kosi hmailing dongah tlum saeh, na pilnam nganboh aka pae te pocinah tong saeh.

12 Ukkung boethae tah a lu pop saeh, Anih long te, “Kai phoeiah uh khaw om pawh,” a ti lah ko.

13 Jakob koca rhoek te boeih coi laeh, Na khopuei cim Jerusalem ke lungma ti mai laeh, Te ni na omnah hamla na tuek.

14 Zion Tlang kah na bawkim he Thangpo, mnah, koehnah laa neh baetawt sak lah.

15 A tongcuek lamloh na suen na pilnam ham tah phong lah, na ming neh na thui tonghma ol te khaw soep sak lah.

16 A tongcuek kah bangla a rho te amih taengah pae laeh,

17 Boeipa aw nan ming aka khue pilnam te rhen lah, Na caming, Israel la a ming na sui soah khaw.

18 Na hmuencin khopuei soah khaw lungma ti laeh, a omnah Jerusalem soah he khaw.

19 Zion te na rhuepomnah he baetawt sak, na bawkim te namah thangpomnah te baetawt sak.

20 A cuekca kah na suen rhoek hamla laipai pah, naming rhangneh tonghma ol a phong te soep sak.

21 Namah aka lamtawn te thaphu pae lamtah, na tonghma rhoek khaw uepom la phoe van saeh.

22 Boeipa aw na tueiyoeih kah thangthuinah he hnatun lah, namah kongaih te na pilnam taengah om van saeh. Diklai dongkah aka om boeih long khaw, Khosuen Pathen, Boeipa la na om te m'ming saeh.

23 Bungpuei loh caak khat khaw a doe coeng dae caak khat he pakhat lakah tui bal.

24 Dang loh maehkah khaw muep a ten bangla Lungbuei aka cueih loh laithae ol te a tuei.

25 Lungbuei aka maelh tah kothae a thoeng sak, tedae aka phaep uh tangtae loh anih koel a thuung ni.

26 Patong nu long tah tongpa boeih te a va la poek, hula long tah pakhat te ni rhep a tuuk.