1 Boeipa Manghai namah te kan uem, Ka Pathen neh ka khangkung nang kan koeh, Namah ming te ka uem.

2 Namah tah kai tungaepkung neh bomkung la na om, Kai he pocinah khui lamloh kan nan hlawt, Oltha kaling kah a tung hlaeh dong lamkah neh, Laithae thainawn hmuilai lamkah khaw. Kocaelh kah mikhmuh ah kai bomkung la nan hlawt.

3 Na rhennah neh na ming a len tangkik dongah, Kai he ngaeh ham no aka rhueng rhoek taeng lamkah khaw, ka hngnah aka tlap rhoek kut lamkah khaw, ngaihmangnah rhaepnit la ka ming khui lamkah khaw,

4 Kaepvai boeih kah hmai rhong khui lamkah khaw, Ka toih mueh kah hmai tak khui lamkah khaw,

5 Saelkhui bungko a dung khui lamkah khaw, a cim pawh ol neh laithae ol lamkah khaw,

6 Hlang loh manghai taengla laithae ol a thui khui lamkah khaw Ka hinglu he dueknah neh yoei tih, Ka hingnah he saelkhui khuirhai ah om coeng.

7 Amih loh loh a hnukhmai la khoep m'vael uh, Te vaengah kai bomkung pakhat khaw om pawh. Hlang kah bomcennah ka lamtawn dae, Pakhat khaw a om moenih.

8 Boepa nangkah rhennah ni ka poek, A rhuem lamkah na sitlohnah te khaw. Namah aka rhing hlang tah na hlawt tih, amih te a thunkha kut lamloh na khang coeng.

9 Te dongah diklai lamkah ka thangthuinah kan tueih, dueknah khui lamloh hlawt hamla kan bih.

10 Boeipa nang ni kan khue, nang kai napa ni, Ngaihmangnah khohnin ah kai n'hnoo boeh. Aka hoem rhoek mikhmuh ah bomkung ka khueh moenih.

11 Na ming te phat ka koeh vetih, Uemnah laa te ka sak ni.

12 Ka thangthuinah te na yaak coeng, Pocinah khui lamloh kan nan khang coeng. Ngaihmang tue vaengah kai nan hlawt coeng. He kongah ni nang kan uem tih nang te kan koeh, Te dongah Boeipa ming te Ka uem. BOEIPA te uem lah, amah tah then tih, a sitlohnah tah cak yoeyah. Pathen koehnah te uem uh lah, a sitlohnah tah cak yoeyah Israel dawndah kung te uem uh lah, a sitlohnah tah cak yoeyah. Hno cungkuem aka hlom aka bol amah te uem lah, a sitlohnah tah cak yoeyah. Israel tlankung te uem uh lah, a sitlohnah tah cak yoeyah. A taekyak tangtae Israel koep aka coi uem uh lah, a sitlohnah tah cak yoeyah. A khopuei neh a rhokso koep a thoh te uem uh lah, a sitlohnah tah cak yoeyah. David imkhui hamla ki aka cawn sak te uem uh lah, a sitlohnah tah cak yoeyah. Khosoih la Zadok koca aka coelh te uem uh lah, a sitlohnah tah cak yoeyah. Abrahma kah photling te uem uh lah, a sitlohnah tah cak yoeyah. Isaak kah lungpang te uem uh lah, a sitlohnah tah cak yoeyah. Jakob kah tlungthang te uem uh lah, a sitlohnah tah cak yoeyah. Zion aka coelh te uem uh lah, a sitlohnah tah cak yoeyah. Manghai rhoek kah Manghai te uem uh lah, a sitlohnah tah cak yoeyah. A pilnam hamla ki aka thoh te uem uh lah a sitlohnah tah cak yoeyah. Israel ca rhoek, a pilnam te amah ham ni, BOEIPA te koeh uh lah

13 Ka camoe vaengah pataeng, ka yincaeh hlan ah, Thangthuinah dongah cueihnah phaeng ka tlap.

14 Bawkim hmaiah cueihnah te ka toem tih, a bawtnah hil cueihnah te ka khe.

15 Misur a muem laloh a hmin duela, ka thinko he cueinah dongah hmae. Ka kho he namtlak dueng ah cet ih, ka coem lamloh cueinah kholaeh te ka thuih.

16 Ka hna vel ka kaeng vaengah cueihnah ka dang kai ham thuituennah la muep ka hmuh.

17 Cueihnah dongah cumphoek tih, Cueinah aka pae kung te thangpomnah ka khueh.

18 Cueinah bangla khosak long ka rhoek tih, a then dongah kocuknah ka khueh.

19 Ka hinglu he cueinah neh ka cun tih, ka omih dongah khaw ka cik. Ka kut he vaan la ka phuel, cueinah ka hnoel dongah te ka rhap.

20 Ka hinglu he cueihnah taengla ka hooi, a cim dongah ni cueihnah te ka hmuh. Cueihnah rhangneh lamhma kah yakmingnah ka dang, te dongah kai he n'hnoo tlaih voel mahpawh.

21 Cueihnah tlap ham na thinko niknuk coeng, te dongah khuetawnnah kutdoe ka dang.

22 Boeipa loh ka olka he thapang la m'paek, te dongah ka ol neh amah te ka koeh ni.

23 Aka cueih mueh nang kai taengla ha yoei lah, Thuituennah im ah he luei uh lah.

24 Balae tih hebang mai he ka vawt thoek na ti, balaeti te bangla tuihalh te puet na ueh.

25 Ka ka ka nang tih ka thui coeng, cueihnah he cocip uh lah, nangmih ham tangka a kuek moenih.

26 Cueihnah hamkun na rhawn ah vah lah, Na hinglu loh thuituennah te doe saeh, Te te a yoei ah ni rhep a om.

27 Na mik nen khaw hmu van lah, ka thakthae dae a yol ni, mongnah he kamah loh muep ka dang coeng,

28 Ka thuituennah he a yol mah hnatun van lah, ka dong lamloh sui neh ngun he na dang ni.

29 Na hinglu te Pathen sitlohnah dongah omngaih saeh, amah koeh ham te me vaengah khaw yak boeh.

30 A tue then vaengah na bi te saii Pathen mah kah a tue ah, na thapang m'paek bitni.