11
Im La Maelnah
1 Nineveh imdan kah Kaserin kaep a pha uh vaengah Raphael loh, 2 “Na pa n'caeh tak te ngaithuen ne. 3 Na yuu hmai la yong sih lamtah amih a longpueng li vaengah im te rhoekbah sih,” a ti nah. 4 Te dongah yong rhoi tih Raphael loh anih te, “Nga kah a hmuet te oepsoeh la om ni,” a ti nah. Te vaengah amih rhoi hnukah ui pakhat cet.
5 Te vaengah Anna tah long taengah sawt ngol tih a capa halo ham te a lamtawn. 6 A hmuh thoeng la a pha vaengah a napa te, “Na capa halo coeng ke, anih aka caeh puei te khaw a ti nah.
Tobit A Mik Koep Tueng
7 A napa taeng a pha tom vaengah tah Raphael to Tobias te, “Na pa a mik tueng pawn ni tila ka ming. 8 Nga hmuet te a mik dongah phul pah. Si long te a mikbok a khaek sak vetih a mik he hel lip ni. Te vaengah na pa te a mik tueng vetih khoval a hmuh ni,” a ti nah.
9 Te dongah Anna te loh a capa te koe a cuk thil, a ban ne koe a kop tih, “Ka capa nang kam hmuh tih a mong la ka duek pawn ni,” a ti nah tih rhap.
10 Te vaengah Tobit te thoo tih cet dae vongtung thoka taengah paloe. 11 Tobias khaw a kung dongkah nga hmuet neh a napa taengla cet. A napa te khak a kop tih a mik te phat a hmuh pah. Te phoeiah, “A pa na rhalthen sak,” a ti nah. 12 Te khuiah te a mik dongah si malh a koelh pah. 13 Te phoeiah tah a mikbok te mikcawt lamloh a kut rhoi neh he hlih pah. 14 Te dongah a napa te rhap tih, “Ka capa aw, ka mik dongkah khoval ka hmuh coeng,” a ti nah. Te phoeiah khaw; Pathen tah a yoethen pai. A ming sang khaw a yoethen pai saeh, Amah kah a cim puencawn rhoek boeih a yoethen pai. A ming cim khaw a yoethen pai saeh, Lunglai a bawt duela a yoethen pai saeh.
15 Kai he n'phaep sitoe cakhaw, Kai soah rhennah a tueng sak Ka capa Tobias khaw ka hmuh coeng he.
Te dongah Tobit tah kohoe cet tih a ol boeih neh Pathen te a koeh. Tobias long khaw a yincaehnah a thaihtak kawng khaw, tangka a khuen te khaw, Raguel canu Sarah a yunah khaw, a thui pah. Te vaengah Sarah tah Nineveh taengkah vongka ah a longpueng uh li pueng.
16 Te vaengah Tobit te a kohoe tih Pathen a koeh. Nineveh vongka ah a canu doe hamla cet. Anih a caeh te khaw Nineveh kah pilnam boeih loh a hmuh. Thaomnah boeih neh cet tih anih pakhat long khaw mawt pawh. Te dongah a ngaihmang uh. 17 Te hlanah mah Tobit tah, Pathen loh anih a rhen tih a mik a tueng sak te a ming.
Tobit loh a capa Tobia yu te a hmuh vaengah a uem tih, “Ka canu, halo pai, kan uem. Kaimih taeng duela nang aka mawt Pathen tah a yoethen pai, ka ca. Na nu neh na pa khaw a yoethen pai saeh. Ka capa tobias khaw a yoethen pai, ka canu namah khaw na yoethen pai,” a ti nah. Te khohnin ah tah Nineveh kah Jews rhoek tah boeih omngaih uh. 18 Ahikar neh a cahlo Nabdah khaw Tobit kah omngaih nah te a bul puei. Yulohnah vanbangla Tobias kah yuloh poei te hnin rhih khui a saii uh tih anih te kutdoe muep a paek uh.